លោកវរសេនីយ៍ឯក សុខ សុទ្ធាវុធ អធិការនគរបាលស្រុកជីក្រែង បានឲ្យដឹងថា កាលពីវេលាម៉ោង២៣ថ្ងៃទី០៣ ខែមីនា ឆ្នាំ២០១៩នេះ មានករណីគ្រោះថ្នាក់ចរាចរណ៍មួយបានកើតឡើង រវាងរថយន្តបុកជាមួយនឹងរថយន្ត នៅលើកំណាត់ផ្លូវជាតិ៦ ស្ថិតក្នុងភូមិចក ឃុំសង្វើយ ស្រុកជីក្រែង បណ្ដាលឲ្យមនុស្សម្នាក់បានស្លាប់នៅកន្លែងកើតហេតុ ខណៈមនុស្សម្នាក់ទៀតបានរងរបួសស្រាល ។
លោកវរសេនីយ៍ឯក សុខ សុទ្ធាវុធ បានឲ្យដឹងទៀតថា រថយន្តទាំងពីរគ្រឿងនេះ បានធ្វើដំណើរបញ្ច្រាសទិសគ្នា លុះដល់ចំណុចកើតហេតុរថយន្តម៉ាក ហ៊ីយ៉ាន់ដាយ ពាក់ស្លាកលេខ ព្រះសីហនុ 3A.6829 នៅខាងមុខ និងពាក់ស្លាកលេខ កំពង់ចាម 4A.0344 នៅខាងក្រោយ ដែលធ្វើដំណើរមកពីទិសខាងកើត បានរេចង្កូតទៅបុករថយន្តមួយគ្រឿងទៀតមិនស្គាល់ម៉ាក ដែលធ្វើដំណើរមកពីលិច ខណៈរថយន្តមិនស្គាល់ម៉ាក់នេះ បានបើកគេចបាត់បន្ទាប់ពីកើតហេតុ ។
លោកវរសេនីយ៍ឯក សុខ សុទ្ធាវុធ បានឲ្យដឹងបន្ថែមទៀតថា ក្រោយពីកើតហេតុ សមត្ថកិច្ចនគរបាលជំនាញបានចុះទៅដល់ទីកន្លែងកើតហេតុ ឃើញរថយន្តម៉ាកហ៊ីយ៉ាន់ដាយនៅនឹងកន្លែងកើតហេតុ ដែលរថយន្តនេះ បើកបរដោយឈ្មោះ ហ៊ាន សាវឿន ភេទប្រុស មានទីលំនៅភូមិកាច់ត្រក ឃុំលាយបូរ ស្រុកត្រាំកក់ ខេត្តតាកែវ បានស្លាប់នៅនឹងកន្លែងកើតហេតុ និង អ្នករួមដំណើរឈ្មោះ គឿត សុគុណ ភេទប្រុស អាយុ២៥ឆ្នាំ មានទីលំនៅភូមិបឹងកន្តួត ឃុំបឹងកន្តួត ស្រុកក្រគរ ខេត្តពោធិសាត់ បានរងរបួសស្រាល ។
ក្រោយពីពិនិត្យ និងវាស់វែងរួច សមត្ថកិច្ចនគរបាលជំនាញ បានយកវត្ថុតាងមករក្សាទុកនៅអធិការដ្ឋាននគរបាលស្រុក ចំពោះសាកសពកម្លាំងសមត្ថកិច្ចនគរបាលស្រុកបានប្រគល់ជូនក្រុមគ្រួសារនៅយប់ថ្ងៃដដែល ដើម្បីយកទៅធ្វើបុណ្យ រីឯអ្នករងរបួសស្រាល បានអនុញ្ញាតឲ្យវិលត្រឡប់ទៅលំនៅដ្ឋានខ្លួនវិញ ខណៈដែលរថយន្តម្ខាងទៀត សត្ថកិច្ចកំពុងធ្វើការស្រាជ្រាវរក ដើម្បីកសាងសុំណុំរឿងតាមផ្លូវច្បាប់ ៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
