នៅព្រឹកថ្ងៃទី ០៥ ខែមីនា ឆ្នាំ២០១៩ ក្នុងពិធីជួបសំណេះសំណាលរវាងគណៈប្រតិភូ គណៈកម្មការសិទ្ធិមនុស្ស ទទួលពាក្យបណ្តឹង អង្កេត និងទំនាក់ទំនងរដ្ឋសភា ព្រឹទ្ធសភា នៃរដ្ឋសភា និងគណៈអភិបាលខេត្តសៀមរាប
ប្រធានគណៈកម្មការទី១នៃរដ្ឋសភាកម្ពុជា ឯកឧត្តម ប៉ា សុជាតិវង្ស បានជម្រុញឲ្យអាជ្ញាធរខេត្តសៀមរាប ត្រូវខិតខំដោះស្រាយទំនាស់ដីធ្លីឲ្យបានត្រឹមត្រូវ និងប្រុងប្រយ័ត្ន ដើម្បីធានាដល់សិទ្ធិរបស់ប្រជាពលរដ្ឋ។
ក្នុងឱកាសនោះ ឯកឧត្តម ប៉ា សុជាតិវង្ស បានលើកឡើងថា នៅពេលប្រទេសជាតិរីកចម្រើន បញ្ហាដែលត្រូវដោះស្រាយ ក៏កាន់តែមានច្រើនដែរ ជាពិសេសបញ្ហាទំនាស់ដីធ្លី។ ឯកឧត្តមសង្កត់ធ្ងន់ថា បញ្ហាដីធ្លីនេះជាកត្តាសំខាន់ ដែលអាជ្ញាធរនៅគ្រប់មូលដ្ឋានត្រូវមានការប្រុងប្រយ័ត្នខ្ពស់ ព្រោះបច្ចុប្បន្នមានក្រុមឆ្លៀតឱកាស ជ្រកក្រោមសិទ្ធិមនុស្ស និង ប្រជាធិបតេយ្យ បានធ្វើការអុចអាលដល់ប្រជាពលរដ្ឋ ឲ្យរំលោភបំពានកាប់ទន្ទ្រានយកដីរបស់រដ្ឋ និងបំផ្លាញធនធានព្រៃធម្មជាតិ ។ ម្យ៉ាងទៀតក៏មានការពាក់ព័ន្ធដល់អង្គការសង្គមស៊ីវិល អ្នកមានអំណាច និង មានទ្រព្យមួយចំនួន បានប្រើប្រាស់ប្រជាពលរដ្ឋជាមធ្យោបាយ ក្នុងការបំផ្លិចបំផ្លាញសម្បត្តិធម្មជាតិ។
លោកលី សំរិទ្ធ អភិបាលរងខេត្តសៀមរាប បានលើកឡើងថា តាមរយៈកាខិតខំដោះស្រាយជាបន្តបន្ទាប់មកនោះបច្ចុប្បន្ននេះនៅទូទាំងខេត្តសៀមរាប មានទំនាស់ដីធ្លីដែលនៅសល់មិនទាន់បានដោះស្រាយមាន ៣៣០ករណី ក្នុងនោះមាន១៨ករណីធំៗ។ លោកលី សំរិទ្ធ បានឲ្យដឹងបន្ថែមថា ការកើតនៅទំនាស់ដីធ្លីនេះ បានកើតឡើងពីកត្តារួមផ្សំជាច្រើន ដូចជាកត្តាភូមិសាស្ត្រស្មុគស្មាញ កត្តានយោបាយ កត្តាយល់ដឹងរបស់អាជ្ញាធរមូលដ្ឋាន ជាដើម។ ជាមួយគ្នានេះដែរ កត្តាផ្សាភ្ជាប់ទំនាស់ដីធ្លី និងសិទ្ធិមនុស្ស ក្រោមលេសប្រជាធិបតេយ្យ ក៏ជាបញ្ហាស្មុគស្មាញក្នុងការដោះស្រាយទំនាស់ដីធ្លីនេះដែរ។
ប៉ុន្តែទោះជាយ៉ាងនេះក្តី លោកលី សំរិទ្ធ បានអះអាងថា បើទោះបីជាទំនាស់ដីធ្លីនៅមានច្រើនក្តី រដ្ឋបាលខេត្ត បានប្រកាន់យកវិធានការទន់ភ្លន់មកដោះស្រាយទំនាស់ ជាជាងការប្រើវិធានការច្បាប់ ជាហេតុធ្វើឲ្យទំនាស់ដីធ្លីនៅក្នុងខេត្តសៀមរាប មិនសូវមានបញ្ហាស្រួចស្រាល់ដូចបណ្តាខេត្តដទៃ។
សូមជម្រាបថា ជំនួបពិភាក្សានេះដែរ បានរៀបចំនៅក្នុងរដ្ឋបាលខេត្តសៀមរាប ដោយមានវត្តមានចូលរួមពី ឯកឧត្តម លោកជំទាវ ជាសមាជិកគណៈកម្មការ និងសហការី រួមជាមួយ ថ្នាក់ដឹកនាំមន្ទីរ អាជ្ញាធរជាតិអប្សរា រួមនឹង អាជ្ញាធរក្រុងស្រុក ជាច្រើនរូបផងដែរ ៕
អត្ថបទ៖ ជា ស្រស់
រូបភាព៖ ស៊ាន សុផាត
សម្រួលអត្ថបទ៖ សេង ផល្លី
