ដើម្បីចូលរួមចំណែកជាមួយរាជរដ្ឋាភិបាលកម្ពុជាក្នុងការលើកកម្ពស់វិស័យអប់រំ ជាពិសេសការបង្កើតសាលារៀនឲ្យនៅជិតលំនៅដ្ឋានប្រជាពលរដ្ឋទាំងនៅក្នុងទីប្រជុំជន និងនៅតំបន់ដាច់ស្រយាលផងនោះ ឡាយអិនក្លឹបកូរ៉េ បានផ្ដល់អគារសិក្សា១ខ្នង និងបន្ទប់ទឹកចំនួន៦បន្ទប់ ជូនដល់សាលាបឋមសិក្សាចុងស្ពាន ស្ថិតនៅភូមិចុងស្ពាន ឃុំខ្វាវ ស្រុកជីក្រែង ខេត្តសៀមរាប ដែលមានចម្ងាយប្រមាណជា៧០គីឡូម៉ែត្រពីទីរួមខេត្តសៀមរាប។
លោក លុន លីម នាយកសាលាបឋមសិក្សាចុងស្ពាន បានថ្លែងនៅក្នុងពិធីសម្ពោធអគារសិក្សា នៅព្រឹកថ្ងៃទី០៥ខែមីនាឆ្នាំ២០១៩នេះថា កន្លងមកនេះសាលាបឋមសិក្សានៅតំបន់ស្រយាលមួយនេះ ជួបការលំបាកយ៉ាងខ្លាំង ទាំងអគារសម្រាប់សិស្សរៀន និងរចនាសម្ព័ន្ធផ្សេងៗ ដោយកន្លងមកមានតែសាលាឈើតូចៗចំនួនពីរខ្នងប៉ុណ្ណោះ សម្រាប់ឲ្យសិស្សរៀន។ ប៉ុន្តែឥឡូវនេះអង្គការ ឡាយអិនឃ្លិប តាមរយៈអាជ្ញាធរខេត្តសៀមរាប បានមកជួយសាងសង់អគារសិក្សា១ខ្នងមាន២បន្ទប់ និងបន្ទប់ទឹកចំនួន៦បន្ទប់ ដែលបានសម្ពោធដាក់ឲ្យប្រើប្រាស់នៅពេលនេះ ដែលសមិទ្ធិផលទាំងនេះ បានបង្កភាពស្រួលដល់កុមារតូចៗនៅតំបន់នេះបានចូលរៀនគ្រប់ៗគ្នា។
លោកបានស្នើអាជ្ញាធរ និងអង្គការនានា ជួយសាងសង់អាគារសិក្សាបន្តែមទៀត ព្រោះចំនួនសិស្សចេះតែកើនឡើង ជាពិសេសសុំជួយសាងសង់អាគាសម្រាប់គ្រូស្នាក់នៅ ព្រោះគ្រូដែលមកបង្រៀននៅសាលារៀនតំបន់ដាច់ស្រយាលមួយនេះសុទ្ធតែជាគ្រូកិច្ចសន្យាមកពីឆ្ងាយៗ គ្មានកន្លែងស្នាក់នៅឡើយ។
ព័ត៌មានជាតិ ថ្មីៗ
លោក លោក ហាង ចុង ហេអ៊ុន (Hwang Jong Heon)ប្រធានឡាយអិនក្លឹប បានថ្លែងថា ដើម្បីចូលរួមចំណែកជាមួយរាជរដ្ឋាភិបាលកម្ពុជាក្នុងការលើកកម្ពស់វិស័យអប់រំ ក្រុមរបស់លោក និងបន្តជួយដល់សាលារៀនមួយនេះជាបន្តបន្ទាប់ទៀត ក្នុងគោលដៅចង់ឲ្យកុមារតូចៗ នៅតំបន់នេះមានឱកាសបានចូលរៀនសូត្រដូចកុមារនៅទីប្រជុំជនដែរ។
លោក ពិន ប្រាកដ អភិបាលរងក្រុងសៀមរាប បានមានប្រសាសន៍ថា វិស័យអប់រំមានតួនាទីយ៉ាងសំខាន់ ក្នុងការបណ្តុះបណ្តាលធនធានមនុស្ស សម្រាប់ធ្វើការអភិវឌ្ឍប្រទេសជាតិ។ ហើយដើម្បីឲ្យកុមារបានទទួលបានការបណ្តុះបណ្តាលគ្រប់ៗគ្នា រាជរដ្ឋាភិបាលកម្ពុជា បានខិតខំសាងសង់អាគារ បង្កើតឲ្យមានសាលារៀននៅគ្រប់មូលដ្ឋាន ដើម្បីបង្កភាពងាយស្រួលដល់កុមារតូចៗ ក្នុងការធ្វើដំណើរទៅរៀនសូត្រ។ ជាក់ស្តែង សមិទ្ធផល នៅថ្ងៃនេះរបស់ឡាយអិនក្លឹប នៃសាធារណរដ្ឋកូរ៉េ តាមរយៈអាជ្ញាធរខេត្តសៀមរាប បានជួយឲ្យកុមារតូចៗនៅតំបន់នេះ ទទួលបានការអប់រំកាន់ប្រសើរបន្ថែមទៀត៕
អត្ថបទ និង រូបភាព៖ លោក ឃុត សៅ
