នៅរសៀលថ្ងៃទី០៥ ខែមីនា ឆ្នាំ២០១៩ម្សិលមិញនេះ ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប បានទទួលជួបក្រុមមន្ត្រីជំរឿន ដឹកនាំផ្ទាល់ដោយលោក ហាក់ សុធារ៉ា ប្រធានមន្ទីរផែនការខេត្តសៀមរាប នៅគេហដ្ឋានរបស់ឯកឧត្តម ស្ថិតក្នុងសង្កាត់គោចក ក្រុងសៀមរាប ស្របពេលដែលយុទ្ធនារការជំរឿន បាននឹងកំពុងអនុវត្តសកម្មភាពជំរឿន ប្រជាពលរដ្ឋទាំងអស់ នៅទូទាំងព្រះរាជាណាចក្រកម្ពុជា ។
ឆ្លៀតក្នុងឱកាសនោះ ក្រុមការងារ នៃមន្ត្រីជំរឿន បានជម្រាបជូនឯកឧត្តមអភិបាលខេត្ត អំពីដំណើរការមួយចំនួន ពាក់ព័ន្ធនឹងការជំរឿននេះ ដូចជា ត្រូវរៀបចំជាសំណួរតាមបច្ចេកទេសពាក់ព័ន្ធនឹងជីវភាពរស់នៅ របស់ប្រជាពលរដ្ឋ។ ជាក់ស្ដែងការជំរឿន នៅក្នុងគេហដ្ឋានរបស់ឯកឧត្តមនាពេលនេះ ក្រុមការងារបានលើកជាសំណួរ ដើម្បីប្រមូលយកទិន្នន័យពីសមាជិកទាំងអស់ នៅក្នុងគេហដ្ឋានរបស់ឯកឧត្តម រួមមានទាំង សមាជិក អ្នកបម្រើការប្រចាំ និងមិនប្រចាំក្នុងគេហដ្ឋាន អង្គរក្ស និងសួរពាក់ព័ន្ធនឹងការសិក្សា ការបង្កកំណើត ព័ត៌មានអំពីគេហដ្ឋាន អគារផ្សេងៗ សម្ភារប្រើប្រាស់សំខាន់ៗ ដោយធ្វើការសម្ភាសន៍ផ្ទាល់ នៅក្នុងគ្រួសារតែម្តង ព្រមទាំងមានការបង្ហាញ អត្តសញ្ញាណប័ណ្ណ សំបុត្រកំណើតផងដែរ ប៉ុន្តែទោះបីជាយ៉ាងណាក្តី មន្ត្រីជំនាញផ្នែកជំរឿន បានបញ្ជាក់ថា ក្រុមមន្ត្រីជំរឿន មិនបង្ខំ ឬតម្រូវឲ្យយកអត្តសញ្ញាណប័ណ្ណ ឬសំបុត្រកំណើត របស់ប្រជាពលរដ្ឋ មកបង្ហាញនោះទេ។
មានប្រសាសន៍ក្នុងឱកាសនោះ ឯកឧត្តមអភិបាលខេត្ត បានផ្តល់នូវកិច្ចសហការយ៉ាងពេញទំហឹងដល់ក្រុមការងារ និងបានផ្តល់បទសម្ភាសន៍យ៉ាងក្បោះក្បាយដល់ក្រុមការងារជំរឿន ដែលបានបង្ក ក្រុមការងារធ្វើជំរឿន ទទួលបានទិន្នន័យពេញលេញ។ ទន្ទឹមនឹងនោះ ឯកឧត្តម ក៏បានបង្ហាញនូវឯកសារទាំងអស់ពាក់ព័ន្ធនឹងទិន្នន័យសមាជិកក្រុមគ្រួសាររបស់ឯកឧត្តម ដល់មន្ត្រីចុះធ្វើជំរឿន ដែលសកម្មភាពនេះ បានបង្ហាញពីកិច្ចសហការស្មើភាពគ្នា ដូចប្រជាពលរដ្ឋកម្ពុជាទូទៅផងដែរ។
សូមបញ្ជាក់ដែរថា កាលព្រឹក ថ្ងៃទី០៣ ខែមីនា ឆ្នាំ២០១៩ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក៏បានផ្តល់បទសម្ភាសដល់ក្រុមមន្ត្រីជំរឿនរួចរាល់ផងដែរ នៅឯភូមិគ្រឹះរបស់សម្តេចផ្ទាល់ នាក្រុងតាខ្មៅ ខេត្តកណ្តាល។
គួររំលឹកថា នេះគឺជាការជំរឿនប្រជាពលរដ្ឋទូទាំងប្រទេសលើកទី៤ហើយ បើគិតចាប់ តាំងពីទស្សវត្សរ៍ឆ្នាំ១៩៦០ មកដល់ឆ្នាំ២០១៩នេះ។ ដោយឡែក ការជំរឿនប្រជាពលរដ្ឋទូទាំងប្រទេសសម្រាប់ឆ្នាំ២០១៩នេះ នឹងបញ្ចប់នៅថ្ងៃទី១៣ ខែមីនា ឆ្នាំ២០១៩ខាងមុខនេះ ដែលមានរយៈពេលសរុប១១ថ្ងៃ។
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក សេង ផល្លី
