សហភាពសហគមន៍កសិកម្មសៀមរាបមានជ័យ ខេត្តសៀមរាប បានរៀបចំមហាសន្និបាតប្រចាំឆ្នាំរបស់ខ្លួន ក្នុងគោលបំណងបង្ហាញភាពខ្លាំងរបស់ខ្លួន លើវិស័យកសិកម្មក្នុងខេត្ត ដែលបានបង្កើតត្រឹមតែរយៈពេលមួយឆ្នាំកាលពីចុងឆ្នាំ២០១៧ និងបង្ហាញពីបញ្ហាប្រឈមមួយចំនួន ដែលសមាជិកខ្លួនបានជួបប្រទះ និង ស្នើសុំឲ្យអាជ្ញាធរ និងអង្គការដៃគូជួយដោះស្រាយ និងគាំទ្រ។
មហាសន្និបាតបូកសរុបលទ្ធផលការងារឆ្នាំ២០១៨និងលើកទិសដៅការងារសម្រាប់ឆ្នាំ ២០១៩ របស់សហភាពសហគមន៍កសិកម្មសៀមរាបមានជ័យ នៅព្រឹកថ្ងៃទី ០៦ ខែ មីនា ឆ្នាំ ២០១៩នេះ មានការសម្របសម្រួល និងឧបត្ថម្ភ ពីអង្គការអាដដា-អង្គការរីដាកម្ពុជា និង គាំទ្រដោយក្រសួងកសិកម្ម រុក្ខា ប្រមាញ់ និងនេសាទ។
ក្រៅពីបង្ហាញសមិទ្ធិផលរយៈពេលមួយឆ្នាំរបស់ខ្លួន មហាសន្និបាតនេះ ក៏បានរៀបចំបោះឆ្នោតជ្រើសរើសក្រុមប្រឹក្សាភិបាលនៃគណៈកម្មាធិការត្រួតពិនិត្យដើម្បីដឹកនាំសម្រាប់ឆ្នាំ២០១៩ និងដើម្បីអនុម័តលក្ខន្តិកៈ បទបញ្ជាផ្ទៃក្នុង និងផែនការមុខរបររបស់សហភាពសហគមន៍កសិកម្មឆ្នាំ២០១៩ ក៏ដូចជាបើកបញ្ចូលសមាជិកថ្មី និងការលក់ភាគហ៊ុនបន្ថែម។ ក្នុងនោះដែរ សន្និបាតនេះ ធ្វើឡើងក្នុងគោលបំណងទទួលនូវគំនិតយោបល់ និងអនុសាសន៍ថ្មីៗ និងស្វែងរកកិច្ចគាំទ្របន្ថែមពីអាជ្ញាធរគ្រប់លំដាប់ថ្នាក់ មន្ទីរអង្គភាពជំនាញនិងអ្នកពាក់ព័ន្ឋទាំងអស់ សម្រាប់ជាយន្តការអនុវត្តបន្តក្នុងឆ្នាំ២០១៩។
ក្នុងរបាយការណ៍ លោក ផង់ សារ៉េត ប្រធានសហភាពសហគមន៍កសិកម្មសៀមរាបមានជ័យ បានបង្ហាញថា សហគមន៍របស់លោក ទទួលបានលទ្ឋផលយ៉ាងល្អប្រសើរ និងមានការរីកចម្រើនយ៉ាងឆាប់រហ័ស។ ប៉ុន្តែបញ្ហាប្រឈម របស់សហគមន៍ ក៏កើតមានជាបន្តបន្ទាប់ផងដែរ ក្នុងនោះទុនសហភាពសហគមន៍នៅមានកម្រិត ដោយស្ថាប័នមីក្រូហិរញ្ញវត្ថុ មិនទាន់មានទំនុកចិត្ត ក្នុងការផ្តល់កម្ចី ព្រោះសហភាពសហគមន៍ ទើបនឹងដំណើរការនៅឆ្នាំទី១។ ជាមួយគ្នានោះ សហភាពសហគមន៍ នៅពុំទាន់ទទួលបានការយោគយល់ និងអនុគ្រោះពីវិស័យឯកជន ក្នុងការសម្របសម្រួលទីផ្សារស្រូវចំណីសត្វ ដែលក្រុមហ៊ុនឲ្យតម្លៃបន្ថែមតិចពេក ត្រឹម ២០រៀលក្នុង ១ គ.ក្រ សម្រាប់ស្រូវសើម ខណៈសហភាពសហគមន៍ មិនទាន់មានអាជីវកម្មតាមកិច្ចសន្យា។ មួយវិញទៀត ធនធានមនុស្ស ក្នុងគណៈកម្មការដឹកនាំសហភាពសហគមន៍មួយនេះ ពុំទាន់មានចំណេះដឹង និងបទពិសោធន៍គ្រប់គ្រាន់ ក្នុងការប្រើប្រាស់ និង គ្រប់គ្រងទិន្នន័យរបស់សហភាពសហគមន៍តាមប្រព័ន្ឋកុំព្យូទ័រច្បាស់នៅឡើយ។
លោក ផង់ សារ៉េត បានស្នើសុំដល់ អង្គការអាដដា អង្គការរីដា អង្គការនានា និងស្ថាប័នពាក់ព័ន្ឋ ជួយពង្រឹង និងបណ្ដុះបណ្ដាលសមត្ថភាពដល់សមាជិកសហភាពសហគមន៍ និងសូមឲ្យរាជរដ្ឋាភិបាល រួមនិងស្ថាប័នពាក់ព័ន្ធជួយផ្តល់ទុនកម្ចីក្នុងអត្រាការប្រាក់ទាប ដល់សហភាពសហគមន៍ សម្រាប់សហភាពសហគមន៍ធ្វើការវិនិយោគ និងផ្តល់កម្ចីជូនសមាជិករបស់ខ្លួនក្នុងអត្រាការប្រាក់ទាប។
លោក ស្រ៊ុន សុខុម អគ្គនាយករងនៃអគ្គនាយកដ្ឋានកសិកម្ម នៃ ក្រសួងកសិកម្ម រុក្ខាប្រមាញ់និងនេសាទ បង្ហាញថា នៅក្នុងឆ្នាំ ២០០៣ គឺមានតែមួយសហគមន៍ប៉ុណ្ណោះ មកដល់ចុងឆ្នាំ២០១៨ សហគមន៍កសិកម្មនៅក្នុងទូទាំងប្រទេសបង្កើតបាន ១,១១៦សហគមន៍ និងមានចំនួន ៨ សហភាពសហគមន៍ ប៉ុន្តែសហគមន៍ទាំងនោះ មិនមានដំណើរការរីកចម្រើនដូចៗគ្នានោះឡើយ ហើយបញ្ហាគន្លឹះសំខាន់ គឺការធ្វើឲ្យមានតម្លាភាពនៅក្នុងសហគមន៍។
ឆ្លើយតបទៅនឹង បញ្ហាប្រឈមសហភាពសហគមន៍កសិកម្មសៀមរាបមានជ័យ លោក ស្រ៊ុន សុខុម បានបញ្ជាក់ថា នៅក្នុងច្បាប់ស្តីពីសហគមន៍កសិកម្ម មាត្រទី១៥ បានចែងថា សហគមន៍កសិកម្មទាំងអស់ នឹងត្រូវទទួលបានសិទ្ធិអនុគ្រោះពីរាជរដ្ឋាភិបាល ។ អគ្គនាយកដ្ឋានកសិកម្ម កំពុងសិក្សាអំពីអ្វី ដែលជាបញ្ហាប្រឈម ដើម្បីមានវិធានការដំណោះស្រាយ រៀបចំសេចក្តីព្រៀងអនុក្រឹត្យ ដាក់ជូនរាជរដ្ឋាភិបាល សុំសេចក្តីសម្រេច ។
បើទោះជាយ៉ាងណាក៏ដោយ លោក អគ្គនាយករងនៃអគ្គនាយកដ្ឋានកសិកម្ម បានបញ្ជាក់បន្ថែមថា ដើម្បីការពារសហគមន៍កសិកម្ម នូវសុវត្ថិភាពក្នុងជំនឿទុកចិត្ត លើការអនុវត្តផលិតកម្មកសិកម្មតាមកិច្ចសន្យា រវាងសហគមន៍ជាមួយក្រុមហ៊ុនឬវិស័យឯកជននោះ រាជរដ្ឋាភិបាលបានបង្កើត គណកម្មការសម្របសម្រួលផលិតកម្មកសិកម្មតាមកិច្ចសន្យា ដែលមានតំណាងក្រសួងទាំង ២៧ បានចូលរួម ក្នុងនោះមានវត្តមានរដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ ជាប្រធាន ។ អាជ្ញាធរថ្នាក់ក្រោមជាតិគ្រប់លំដាប់ថ្នាក់ មានភារកិច្ចសហការ ជួយដល់សហគមន៍ ផងដែរ ។ ដោយឡែក អាជ្ញាធរអគ្គិសនី នឹងត្រូវបានចូលរួមផងដែរ ដោយផ្អែកលើសំណូមពររបស់សហគមន៍កសិកម្ម ដែលទាមទារឲ្យមានការបញ្ចុះតម្លៃថាមពលអគ្គិសនី បម្រើឲ្យវិស័យសេដ្ឋកិច្ចក្នុងសហគមន៍កសិកម្ម ។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
