នៅព្រឹកថ្ងៃទី០៦ ខែមីនា ឆ្នាំ២០១៩នេះ ឯកឧត្តម កេង ប៉ុនណា អភិបាលរងខេត្តត្បូងឃ្មុំ បានអញ្ជើញជាអធិបតី កាត់វិញ្ញាសារប្រឡងចូលរៀនពុទ្ធិកអនុវិទ្យាល័យមណ្ឌលខេត្តត្បូងឃ្មុំ នៅសាលាពុទ្ធិកវិទ្យាល័យសម្ដេច ហ៊ុន សែន ក្រុងសួង ស្ថិតនៅសង្កាត់សួង ក្រុងសួង ខេត្តត្បូងឃ្មុំ។
ថ្លែងនាឱកាសនោះដែរ ឯកឧត្តម កេង ប៉ុនណា អភិបាលរងខេត្ត បានមានប្រសាសន៍ថា ៖បច្ចុប្បន្ននេះរាជរដ្ឋាភិបាលកម្ពុជា បានកំណែទម្រង់លើវិស័យអប់រំ ដោយផ្តោតលើការប្រឡងឲ្យមានតម្លាភាព ដូច្នេះគ្រប់វិញ្ញាសារទាំងអស់សុទ្ធតែ បានរៀបចំទុកដាក់យ៉ាងត្រឹមត្រូវ និងនាំយកមកឲ្យបេក្ខសាមណសិស្សដែលជាបេក្ខជន បានត្រួតពិនិត្យជាមុនរួចរាល់សិន ហើយបានកាត់បើកវិញ្ញាសារនេះ។
ឯកឧត្តម បានបន្តថា ការប្រឡងចូលរៀនពុទ្ធិកអនុវិទ្យាល័យមណ្ឌលខេត្តត្បូងឃ្មុំនាពេលនេះ គឺជាការរួមចំណែកក្នុងយ៉ាងធំធេង ជាមួយជារដ្ឋាភិបាលក្នុងការអភិវឌ្ឍន៍ជាតិ តាមការអភិវឌ្ឍន៍ធនធានមនុស្សក្នុងវិស័យព្រះពុទ្ធសាសនា ដែលជាសាសនារបស់រដ្ឋ ដើម្បីឆ្លើយតបទៅតាមយុទ្ធសាស្ត្រអភិវឌ្ឍន៍ជាតិ ក្នុងការបណ្ដុះបណ្ដាលធនធានមនុស្សតាមពុទ្ធចក្រ។
ជាមួយគ្នានោះ ឯកឧត្តម កេង ប៉ុនណា អភិបាលរងខេត្ត ក៏បានផ្តាំផ្ញើដល់បេក្ខសមណសិស្សទាំងអស់ ធ្វើយ៉ាងណាត្រូវខិតខំប្រឹងប្រែងព្យាយាមប្រឡង ឲ្យអស់ពីសមត្ថភាពដែលខ្លួនមាន ដើម្បីទទួលបានលទ្ធផលល្អក្នុងឱកាសនៃការប្រឡងនេះផងដែរ។
បើតាមការបញ្ជាក់ពីលោក ហាក់ ហុន ប្រធានមន្ទីរធម្មការ និងសាសនាខេត្តត្បូងឃ្មុំ បានឲ្យដឹងថា ៖ សាលាពិទ្ធិកសិក្សាទូទាំងខេត្តត្បូងឃ្មុំ១៤កន្លែង មានសមណសិស្ស១.៤៦២អង្គ/នាក់ ហើយពុទ្ធិកបឋមសិក្សាមាន១១សាលា ចំនួន ២៩០អង្គ/នាក់ សមណសិស្សមានសិទ្ធប្រឡងចូលរៀនពុទ្ធិកអនុវិទ្យាល័យ១៥៥អង្គ/នាក់ ដូចខាងក្រោម៖បេក្ខសមណៈ/បេក្ខជន មានចំនួន១៥៥អង្គ/នាក់ ចែកចេញជា ៦បន្ទប់ ក្នុង១បន្ទប់មាន២៦អង្គ/នាក់ មានគណៈមេប្រយោគមានចំនួន៣១រូប ចែកចេញជា៥គណៈកម្មការ។
ដោយឡែកវិញ្ញាសាប្រឡងមាន៤វិញ្ញាសារ ក្នុងនោះមាន ៖ ភាសារបាលី សរសេរតាមអាន ពុទ្ធវិន័យ ពុទ្ធប្បវត្តិ ពុទ្ធសាសនា និងគណិតវិទ្យាផងដែរ ៕
អត្ថបទ និង រូបថត : មន្ទីរព័ត៌មាន ត្បូងឃ្មុំ
