នៅព្រឹកថ្ងៃទី០៧ ខែមីនា ឆ្នាំ២០១៩ នេះ មន្ទីរកិច្ចការនារីខេត្ត សហការជាមួយរដ្ឋបាលខេត្តសៀមរាប បានរៀបចំប្រារព្ឋពិធីអបអរសាទរខួបលើកទី១០៨ ទិវាអន្ដរជាតិនារី០៨ មីនា ក្រោមប្រធានបទ លើកកម្ពស់សមភាពយេនឌ័រ ការគាំពារសង្គមដើម្បីអភិវឌ្ឍធនធានមនុស្ស ដែលពិធីនេះបានប្រព្រឹត្ត ទៅនៅសាលមហោស្រពអង្គរ ក្នុងក្រុងសៀមរាប ក្រោមអធិបតីភាពឯកឧត្តម ទៀ សីហា អភិបាលខេត្ត និងលោក ជំទាវ , ឯកឧត្តម អ៊ឹង ហឿន ប្រធានក្រុមប្រឹក្សាខេត្ត និង លោកជំទាវ ដោយមានការចូលរួមពីសំណាក់ឯកឧត្តម លោកជំទាវ លោក លោកស្រី ជាសមាជិកក្រុមប្រឹក្សាខេត្ត អភិបាលរងខេត្ត ភរិយាថ្នាក់ដឹកនាំខេត្ត ថ្នាក់ដឹកនាំមន្ទីរ អង្គភាពនានាក្នុងខេត្ត និង មន្ត្រីរាជការ កងកម្លាំងប្រដាប់អាវុធ ក្រុមហ៊ុន ពាណិជ្ជករ អង្គការដៃគូ សរុបប្រមាណជា៧០០នាក់ ។
មានប្រសាសន៍ក្នុងឱកាសនោះ ឯកឧត្តម ទៀ សីហា បានសម្ដែងនូវការគាំទ្រចំពោះប្រធានបទ ស្ដីពីពីការលើកកម្ពស់សមភាពយេនឌ័រ ការគាំពារសង្គមដើម្បីអភិវឌ្ឍធនធាន មនុស្ស ដែលក្នុងគោលបំណងបន្តរំលេច និងវាយតម្លៃពីសន្តិភាព ក្នុងការលើកកម្ពស់សមភាពយេនឌ័រ ដែលរាជ រដ្ឋាភិបាលកម្ពុជា បាននឹងកំពុងគាំទ្រ និងជំរុញឱ្យមានការចូលរួមពីគ្រប់ស្ថាប័ន រួមទាំងបុរស ទាំងស្ត្រី ដើម្បីវឌ្ឍនភាពសង្គម ឆ្ពោះទៅលើកកម្ពស់សិទ្ឋិ សន្តិភាព ជីវភាព ឋានៈ តួនាទី របស់ស្ត្រី ក៏ដូចជាសុខុមាលភាពសង្គម ដើម្បីអភិវឌ្ឍធនធានមនុស្សប្រកបដោយគុណភាព និងសមត្ថភាព ។
ឯកឧត្តម ទៀ សីហា ក៏បានធ្វើការវាយតម្លៃខ្ពស់ និងរំលឹកផងដែរ នូវកិច្ចខិតខំប្រឹងប្រែងតស៊ូ ជំនះគ្រប់ឧបសគ្គលំបាករបស់ស្ត្រីកម្ពុជា និងបានធ្វើឲ្យប្រសើរឡើងនូវសិទ្ធិ ឋានៈតួនាទី ជីវភាព រស់នៅរបស់ស្ត្រីកម្ពុជា ក៏ដូចស្ត្រីលើពិភពលោក ដោយបានប្តេជ្ញារួមគ្នា ឆ្ពោះទៅសម្រេចបំណងប្រាថ្នា ព្រមទាំងបង្កើត នូវសមធម៌ដល់ស្ត្រីឲ្យទទួលស្គាល់សមភាពយេនឌ័រ រវាងស្ត្រីនិងបុរស ក្នុងគ្រប់ទិដ្ឋភាព នយោបាយសង្គម សេដ្ឋកិច្ច សង្គមកិច្ច និង សិទ្ធិពេញលេញ ក្នុងតម្លៃជាមនុស្សជាតិ ឈានចូលរួមក្នុងភាពដៃគូ មិនអាចខ្វះបានជាមួយបុរស ក្នុងការអភិវឌ្ឍន៍ប្រទេស ។
ឯកឧត្តមអភិបាលខេត្តសៀមរាប មានប្រសាសន៍ទៀតថា ក្រោមការដឹកនាំប្រកបដោយគតិបណ្ឌិត និងឈ្លាសវៃ របស់សម្តេចតេជោ ហ៊ុន សែន នាយករដ្ឋមន្ត្រនៃព្រះរាជាណាចក្រកម្ពុជា បានផ្តោតការយកចិត្តទុកដាក់យ៉ាងខ្លាំង ក្នុងការលើកកម្ពស់សមភាពយេនឌ័រនិងពង្រឹងភាពអង់អាចដល់ស្ត្រីនិងក្មេងស្រី ដើម្បីឱ្យពួកគេក្លាយជាកម្លាំងចលករចូលរួមក្នុងកិច្ចអភិវឌ្ឍសង្គម និងសេដ្ឋកិច្ច ជាពិសេសនៅក្នុងយុទ្ឋសាស្ត្រអភិវឌ្ឍឆ្នាំ២០១៩-២០៣០ និងគោលដៅអភិវឌ្ឍប្រកបដោយចីរភាពរបស់កម្ពុជា រាជរដ្ឋាភិបាលបានដាក់ចេញនូវការងារលើកកម្ពស់សមភាពយេនឌ័រនិងការពង្រឹងដល់ភាពអង់អាចដល់ស្ត្រីនិងក្មេងស្រីគឺជាវិស័យអាទិភាពដាច់ដោយឡែក ក៏ដូចជាការងារអាទិភាពជាអន្តរវិស័យផងដែរ។
ឯកឧត្តម ទៀ សីហា បានមានប្រសាសន៍បន្ថែមទៀតថា មិនតែប៉ុណ្ណោះរាជរដ្ឋាភិបាលបានធ្វើឱ្យប្រសើរឡើងនូវកំណើនសេដ្ឋកិច្ច និងរក្សានូវសន្តិភាព ស្ថេរភាពនយោបាយ សន្តិសុខសង្គមព្រមទាំងសំដៅលើកកម្ពស់សិទ្ឋិ សេចក្តីថ្លៃថ្នូរ សីលធ៌ម របស់ប្រជាពលរដ្ឋ ដោយបានបង្កើតគណៈកម្មាធិការជាតិលើកម្ពស់សីលធម៌សង្គម តម្លៃស្ត្រីនិងគ្រួសារខ្មែរ ដែលមានសម្តេចកិត្តិព្រឹទ្ឋបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ក្នុងការលើកកម្ពស់សិលធម៌សង្គម តម្លៃស្ត្រីនិងគ្រួសារខ្មែរ រួមទាំងប្រពៃណីនិងវប្បធម៌ល្អផូរផង់របស់កម្ពុជាយើងផងដែរ។
ឯកឧត្តម ទៀ សីហា មានប្រសាសន៍បញ្ជាក់បន្ថែមទៀតថា ស្ត្រីបានដើរតួយ៉ាងសំខាន់ ក្នុងការលើកម្ពស់សេដ្ឋកិច្ច ការអប់រំនៅក្នុងក្រុមគ្រួសារ និង សង្គម ហើយទិវាអន្តរជាតិនារី៨មីនា ឆ្នាំនេះ គឺជាការលើកកម្ពស់សមភាពយេនឌ័រ ការគាំពារសង្គម និង ការអភិវឌ្ឍន៍ធនធានមនុស្ស ដែលគ្រប់ក្រសួង ស្ថាប័ន កំពុងអនុវត្ត ដើម្បីប្រជាពលរដ្ឋកម្ពុជា ជាពិសេសស្ត្រី និង យុវវ័យ ក្នុងការរួមចំណែកអភិវឌ្ឍន៍ប្រទេសជាតិ ជួយជំរុញនូវកំណើនសេដ្ឋកិច្ច រក្សានូវសន្តិភាព ស្ថិរភាពនយោបាយ និង សន្តិសុខសង្គម លើកកម្ពស់សិទ្ធិសេចក្តីថ្លៃថ្នូរ និងសីលធម៌ផងដែរ ៕
អត្ថបទ និង រូបថត : លោក យូ វង្ស
កែសម្រួលអត្ថបទ : លោក លីវ សាន្ត
