សមត្ថកិច្ចនគរបាលខេត្តសៀមរាប បានឲ្យដឹងថា ជនសង្ស័យចំនួន២នាក់ គឺ ១- ឈ្មោះ អ៊ួង វិបុល ភេទប្រុស ឆ្នាំកំណើត១៩៨៨ មុខរបរធ្វើឆត្រ័បាំងថ្ងៃ រស់នៅភូមិចុងកៅស៊ូ សង្កាត់ស្លក្រាម ក្រុងសៀមរាប ជាប់សង្ស័យនឹងករណីរក្សាទុក ជួញដូរ និងប្រើប្រាស់ដោយខុសច្បាប់នូវសារធាតុញៀន ព្រមទាំងមានសារធាតុញៀនក្នុងខ្លួន និង ២- ឈ្មោះ ធឿន ធូភេទប្រុស ឆ្នាំកំណើត១៩៩០ មុខរបរកម្មករ រស់នៅភូមិខ្នារ សង្កាត់ជ្រាវ ក្រុងសៀមរាប ជាប់សង្ស័យនឹងករណីចាត់ចែងនិងប្រើប្រាស់ដោយខុសច្បាប់នូវសារធាតុញៀន ព្រមទាំងមានសារធាតុញៀនក្នុងខ្លួន រួមទាំងវត្ថុតាងផងនោះ ត្រូវបានកម្លាំងជំនាញ បានរៀបចំកសាងសំណុំរឿងបញ្ចូនទៅសាលាដំបូងខេត្ត កាលពីល្ងាចថ្ងៃទី០៦ ខែមីនា ឆ្នាំ២០១៩ ម្សិលមិញនេះ ដើម្បីចាត់ការតាមផ្លូវច្បាប់ ។
សមត្ថកិច្ចនគរបាលខេត្តសៀមរាប បានឲ្យដឹងទៀតថា ជនសង្ស័យទាំង២នាក់នេះ ត្រូវបានសមត្ថកិច្ចឃាត់ខ្លួនបាន ក្នុងប្រតិបត្តិការមួយ កាលពីវេលាម៉ោង១៩និង៥០នាទី ថ្ងៃទី០៥ ខែមីនា ឆ្នាំ២០១៩កន្លងទៅនេះ ខណៈពេលដែលកម្លាំងការិយាល័យប្រឆាំងគ្រឿងញៀន សហការជាមួយកម្លាំងនគរបាលចរាចរណ៍ និង កម្លាំងនគរបាលអន្តរាគមន៍ចុះបង្ក្រាបករណីរក្សាទុក ជួញដូរ ចាត់ចែង និងប្រើប្រាស់ដោយខុសច្បាប់នូវសារធាតុញៀន នៅលើដងផ្លូវចំនុចត្រួតពិនិត្យសុវត្ថិភាពចរាចរណ៍ ស្ថិតនៅភូមិបន្ទាយចាស់ សង្កាត់ស្លក្រាម ក្រុងសៀមរាប ព្រមទាំងបានដកហូតវត្ថុតាងរួមមាន៖ ថ្នាំម្សៅក្រាមពណ៌សថ្លាចំនួន ១កព្ចាប់ ស្មើនឹងទម្ងន់ ០,៤ក្រាមទាំងសំបក , កូនថង់សម្រាប់ច្រកថ្នាំញៀន , កូនជញ្ជីងសម្រាប់ថ្លឹងគ្រឿងញៀនចំនួន ១ និង ទូរស័ព្ទដៃចំនួន ២គ្រឿង ៕
អត្ថបទ និង រូបថត : លោក ថាច់ ពិសុទ្ធ
កែសម្រួលអត្ថបទ : លោក លីវ សាន្ត
