ដោយមានការគាំទ្រពីអាជ្ញាធរឃុំ នៅព្រឹកថ្ងៃទី០៧ ខែមីនា ឆ្នាំ២០១៩នេះ អង្គការ អមរា បានចុះផ្សព្វផ្សាយពីកម្មវិធី និងសកម្មភាពស្ត្រី ដើម្បីទទួលបានសំឡេង និងភាពអង់អាច ជូនដល់ប្រជាពលរដ្ឋនៅក្នុងឃុំរំចេក ស្រុកបន្ទាយស្រី ក្នុងឱកាសអបអរសាទរខួបលើកទី១០៨ ទិវាអន្តរជាតិនារី ៨មីនា ក្រោមប្រធានបទ លើកកម្ពស់សមភាពយេនឌ័រ និងការគាំពារសង្គម ដើម្បីអភិវឌ្ឍន៍ធនធានមនុស្ស ក្នុងគោលបំណងលើកកម្ពស់សមភាពយេនឌ័រ និងផែនការសកម្មភាពជាតិ ស្តីពីការទប់ស្កាត់អំពើហិង្សា ២០១៩-២០២៣ ដែលជាគោលនយោបាយទាំង៣ ក្រោមកិច្ចសហការជាមួយក្រសួង ស្ថាប័ន អង្គការសង្គមស៊ីវិល និងដៃគូអភិវឌ្ឍន៍ លើគោលការណ៍សំខាន់ ៣ ដូចជា៖ ១. ការធ្វើស្ថាប័ននីយកម្មក្របខណ្ឌផ្អែកលើសមភាពយេនឌ័រ តាមវិស័យនីមួយៗ , ២. បង្កើនធនធានមនុស្ស និងធនធានហិរញ្ញវត្ថុ ក្នុងការលើកកម្ពស់សមភាពយេនឌ័រ ក្នុងរាជរដ្ឋាភិបាលកម្ពុជា ក៏ដូចជាវិស័យផ្សេងៗទៀត និង ៣. បង្កើតប្រព័ន្ធតាមដាន ត្រួតពិនិត្យមានលក្ខណៈសង្គតិភាព និងផ្តល់គណនេយ្យភាពសាធារណៈដល់ស្ត្រី និងក្មេងស្រី ។
លោកស្រី នូ សារឹម គ្រូបង្គោលបណ្តុះបណ្តាលកម្មវិធី នឹងសកម្មភាពស្ត្រីដើម្បីទទួលបានសម្លេង និងភាពអង់អាច នៃអង្គការ អមរា បានលើកឡើងថា នេះគឺជាសារសម្រាប់ការប្រារព្ធពិធីអបអរសាទរ ទិវានារីអន្តរជាតិ ៨មិនា ឆ្នាំ២០១៩ លើកទី១០៨ ដែលយើងទាំងអស់គ្នាត្រូវចូលរួមលើកកម្ពស់សមភាពយេនឌ័រ របស់ស្ត្រីដែលជាក្រុមប្រឹក្សាឃុំ ក្នុងគោលបំណងរំលឹកនូវពាក្យស្លោកដែលស្ត្រីទាមទារបាន ៖ ១. សិទ្ធិទទួលនូវការគាំពារមាតានិងទារក , ២. សិទ្ធិទទួលបាននូវប្រាក់បៀវត្សរ៍ស្មើៗគ្នាលើការងារ និង ៣. សិទ្ធិទទួលបាន ១ថ្ងៃធ្វើការត្រឹមតែ ៨ម៉ោងប៉ុណ្ណោះ ៕
អត្ថបទ និង រូបថត : លោក ស៊ាន សុផាត
កែសម្រួលអត្ថបទ : លោក លីវ សាន្ត
