ថ្លែងនៅក្នុងពិធីផ្សព្វផ្សាយពីវិធីសាស្ដ្រការវាយតម្លៃលើផលប៉ះពាល់នៃលិខិតបទដ្ឋានគតិយុត្ដ ដល់និស្សិតនៅសាកលវិទ្យាល័យបៀលប្រាយខេត្ដសៀមរាបកាលពីថ្ងៃទី០៧ខែមីនា ឯកឧត្តម ប៉ិច សុខា អគ្គលេខាធិការរងក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ និងជាអនុប្រធានអចិន្ត្រៃយ៍ក្រុមប្រតិបត្តិលិខិតបទដ្ឋានគតិយុត្តនៃទីស្ដីការគណៈរដ្ឋមន្ដ្រីបានថ្លែងថា ប្រទេសណាក៏ត្រូវមានច្បាប់ និងលិខិតបទដ្ឋានគតិយុត្ត ហៅកាត់ជាភាសាអង់គ្លេស R I A (Regulatory Impact Assessment) ដើម្បីគ្រប់គ្រងសង្គមនិងសេដ្ឋកិច្ច ប៉ុន្តែយើងក៏ត្រូវប្រុងប្រយ័ត្នអំពីផលអវិជ្ជមាននៃបញ្ញត្តិកម្មទាំងនោះ ដូចជាការរារាំងដល់ភាពប្រកួតប្រជែង ឬការដាក់បន្ទុកចំណាយធ្ងន់ធ្ងរទៅលើធុរកិច្ចជាដើម។
ឯកឧត្តម បានបន្ដថា ការផ្សព្វផ្សាយនេះ គោលដៅធ្វើយ៉ាងណា ផ្តល់ឱកាសដល់សាស្ត្រចារ្យ ប្អូនៗនិស្សិត បានស្វែងយល់បន្ថែមអំពីកម្មវិធី និងវិធីសាស្ត្រRIAនៅកម្ពុជា ព្រមទាំងផលប្រយោជន៍នៃRIA ក្នុងការរៀបចំតាក់តែងសំណើបញ្ញត្តិកម្មឲ្យកាន់តែប្រសើរ សំដៅធានាឲ្យបានជាអតិបរិមានូវផលប៉ះពាល់ជាវិជ្ជមាន ក៏ដូចជាកាត់បន្ថយឲ្យនៅកម្រិតអប្បបរមានូវផលប៉ះពាល់ជាអវិជ្ជមាននៃបញ្ញត្តិកម្មនីមួយៗមកលើសង្គមជាតិយើង ហើយសូមចងចាំថា “លិខិតបទដ្ឋានប្រសើរ ធ្វើឲ្យជីវិតប្រសើរ។
ឯកឧត្តម បានបញ្ជាក់ថា កម្មវិធីRIAនេះ គឺជាផ្នែកមួយនៃកិច្ចខិតខំប្រឹងប្រែងរបស់រាជរដ្ឋាភិបាលក្នុងការធ្វើកំណែទម្រង់ដ៏ស៊ីជម្រៅ សំដៅជំរុញការអភិវឌ្ឍសេដ្ឋកិច្ច-សង្គមឲ្យកាន់តែប្រសើរឡើង ដូចមានបញ្ជាក់ច្បាស់នៅក្នុងយុទ្ធសាស្ត្រចតុកោណ និងផែនការយុទ្ធសាស្ត្រអភិវឌ្ឍន៍ជាតិ។ ការអនុវត្តRIA សាកល្បងនៅកម្ពុជាទទួលបានលទ្ធផលវិជ្ជមានជាជំហានៗតាំងពីឆ្នាំ២០១១មក ក្រោមជំនួយឥតសំណងរបស់ធនាគារអភិវឌ្ឍន៍អាស៊ី(ADB)។
សូមជម្រាបថា ឆ្នាំ២០១៦កន្លងទៅ សមេ្តចតេជោនាយករដ្ឋមន្ត្រី ក៏បានចេញសេចក្តីសម្រេច ស្តីពីការបង្កើតក្រុមការងារRIAនៅគ្រប់ក្រសួង-ស្ថាប័ន សម្រាប់ធ្វើការងារRIA ដើម្បីរៀបចំលិខិតបទដ្ឋានគតិយុត្ត។ មកដល់បច្ចុប្បន្ននេះមានក្រសួងចំនួន១៦ ព្រមទាំងស្ថាប័នចំនួន២បានចូលរួមក្នុងកម្មវិធីRIA រួមមាន ក្រសួងរ៉ែនិងថាមពល ក្រសួងពាណិជ្ជកម្ម ក្រសួងទេសចរណ៍ ក្រសួងបរិស្ថាន ក្រសួងឧស្សាហកម្មនិងសិប្បកម្ម ក្រសួងអប់រំ យុវជននិងកីឡា ក្រសួងការងារនិងបណ្តុះបណ្តាលវិជ្ជាជីវៈ ក្រសួងកសិកម្ម រុក្ខាប្រមាញ់និងនេសាទ ក្រសួងសុខាភិបាល ក្រសួងសាធារណការនិងដឹកជញ្ជូន ក្រសួងរៀបចំដែនដី នគរូបនីយកម្មនិងសំណង់ ក្រសួងប្រៃសណីយ៍និងទូរគមនាគមន៍ ក្រសួងសេដ្ឋកិច្ចនិងហិរញ្ញវត្ថុ ក្រសួងការពារជាតិ ក្រសួងយុត្តិធម៌ រដ្ឋលេខាធិការដ្ឋានអាកាសចរស៊ីវិល អគ្គលេខាធិការដ្ឋានព្រឹទ្ធសភា និងអគ្គលេខាធិការដ្ឋានក្រុមប្រឹក្សាធម្មនុញ្ញ។ ក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ ជាអ្នកគ្រប់គ្រងកម្មវិធី ដើរតួនាទីជាស្ថាប័នបណ្តុះបណ្តាល និងទីប្រឹក្សាយោបល់៕
អត្ថបទ និង រូបថត : លោក ទ្រា ពន្លឺ
