អភិបាលខេត្តសៀមរាប បានដាក់ចេញនូវគោលការណ៍ សម្រាប់សមត្ថកិច្ចដែលពាក់ព័ន្ធ យកចិត្តទុកដាក់ចំពោះស្ត្រីកំពុងជាប់ក្នុងពន្ធនាគារ និង បានដាក់ចេញនូវបំរាមដាច់ខាត មិនឲ្យមានការសម្របសម្រួលសុំសម្រាលទោស ចំពោះជនណាដែលប្រព្រឹត្តិអំពើរំលោភសេពសន្ថវៈលើអនីតិជន។
អនុសាសន៍ដ៏ខ្ពង់ខ្ពស់ សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានយកចិត្តទុកដាក់ជាខ្លាំង ចំពោះស្ត្រីជាទណ្ឌិត ដែលកំពុងជាប់ក្នុងពន្ធនាគារ ដោយសម្តេចបានឲ្យសមត្ថកិច្ច-ស្ថាប័នពាក់ព័ន្ធ ត្រូវសិក្សាអំពីការស្នើសុំបន្ធូរបន្ថយទោសដល់ទណ្ឌិតជាស្ត្រីផងដែរ ។
ឯកឧត្តម ទៀ សីហា អភិបាលខេត្តសៀមរាប បានលើកឡើងយ៉ាងដូច្នេះ នាព្រឹកថ្ងៃទី០៧ ខែមីនា ឆ្នាំ២០១៩ នៅក្នុងពិធីអបអរសាទរ ខួបលើកទី១០៨ ទិវានារីអន្តរជាតិ ៨មីនា ឆ្នាំ២០១៩ ក្រោមប្រធានបទ “លើកកម្ពស់សមភាពយេនឌ័រ និងការគាំពារសង្គម ដើម្បីអភិវឌ្ឍន៍ធនធានមនុស្ស” ។
ឯកឧត្តមបញ្ជាក់ថា គ្រប់អង្គភាព-ស្ថាប័ន សមត្ថកិច្ចជំនាញដែលពាក់ព័ន្ធ ត្រូវអនុវត្តអានុសាសន៍ដ៏ថ្លៃថ្លារបស់ប្រមុខរាជរដ្ឋាភិបាល ឲ្យមានប្រសិទ្ធភាពខ្ពស់ និង ទាន់ពេលវេលា ។ ឯកឧត្តមបានលើកឡើងបន្ថែមនៅក្នុងពិធីនោះថា ស្ត្រីជាមាតាដែលត្រូវបានទទួលទោសទណ្ឌ ពិតជាមានអារម្មណ៍ខ្លោចផ្សារណាស់ ចំពោះកូនតូចរបស់ខ្លួន ដែលជាប់នៅជាមួយ ទាំងរូបគេពុំមានទោសកំហុសអ្វីសោះនោះ ។
អភិបាលខេត្តសៀមរាប ( ឯកឧត្តម ទៀ សីហា ) ក៏បានបង្ហាញឲ្យដឹងផងដែរថា ឯកសារ ការប៉ាន់ប្រមាណអំពីយេនឌ័រនៅកម្ពុជា ដែលបានដាក់បញ្ចូលផងដែរនូវបញ្ហារបស់ស្ត្រី ទៅក្នុងក្រុមនៃជនងាយរងគ្រោះ នៃផែនការជាតិ ស្តីពីការទប់ស្កាត់អំពើហឹង្សាលើស្ត្រីលើកទី៣ ( ២០១៩-២០២៣ ) ។ ឯកឧត្តមថា ដូច្នេះនៅថ្នាក់ក្រោមជាតិ ត្រូវផ្តល់សេវានិងរួមគ្នាទប់ស្កាត់អំពើហឹង្សាលើស្ត្រីនិងក្មេងស្ត្រី រួមទាំងការរំលោភសេពសន្ថវៈ និង ការបៀតបៀនផ្លូវភេទ ឲ្យមានប្រសិទ្ធភាពខ្ពស់ ។
ដោយយោងតាមរបាយការណ៍របស់មន្ទីរសុខាភិបាលខេត្តសៀមរាប កាលពីថ្ងៃទី០៦ ខែមីនា ឆ្នាំ២០១៨កន្លងទៅ ដែលថា មានបទល្មើសរំលោភសេពសន្ថវៈ បានកើតឡើងជាមធ្យមចំនួន០៣ករណីជារៀងរាល់ថ្ងៃនៅក្នុងខេត្តសៀមរាប ហើយជនរងគ្រោះទាំងនោះ មួយចំនួនជាក្មេងស្រីមានអាយុក្រោម១៥ឆ្នាំនោះ ឯកឧត្តម ទៀ សីហា បានដាក់បំរាមយ៉ាងម៉ឹងម៉ាត់ចំពោះអាជ្ញាធរនិងសមត្ថកិច្ចពាក់ព័ន្ធ មិនត្រូវឲ្យមានការសម្របសម្រួល ឬ សុំសម្រាលទោស ចំពោះជនណាដែលបានប្រព្រឹត្តអំពើរំលោភសេពសន្ថវៈ លើអនីតិជនជាដាច់ខាត ។ ឯកឧត្តមអភិបាលខេត្តសៀមរាប ហៅជនដែលបានប្រព្រឹត្តអំពើអាណាចារទាំងនោះ ថាជាសត្វ មិនមែនជាមនុស្សនោះទេ មិនត្រូវលើកលែងទោសឲ្យ ជាដាច់ខាត ។
ក្នុងគោលនយោបាយលើកកម្ពស់សមភាពយេនឌ័រ ការទប់ស្កាត់អំពើហឹង្សាលើស្ត្រី ការលុបបំបាត់អំពើកេងប្រវ័ញ្ជជួញដូរនិងរំលោភផ្លូវភេទ រាជរដ្ឋាភិបាលម្ពុជា បានជំរុញឲ្យគ្រប់បណ្តាអង្គភាព-ស្ថាប័ន ចូលរួមគាំទ្រ សំដៅលើកកម្ពស់ភាពអង់អាចរបស់ស្ត្រីនិងក្មេងស្រី ដើម្បីធ្វើឲ្យប្រសើរឡើងនូវការអភិវឌ្ឍជីវភាពសេដ្ឋកិច្ចគ្រួសារ និងសង្គមជាតិ ។ សមភាពយេនឌ័រ ការពង្រឹងភាពអង់អាចដល់ស្ត្រី និង ការផ្តល់សេវាគាំពារសង្គម គឺជាកត្តាចាំបាច់បំផុត ដើម្បីធានាបាននូវដំណើរការសង្គម ប្រកបដោយសុខដុមរមនា ៕
អត្ថបទ និង រូបថត : លោក ជា ស្រស់ និងលោក ងិន គឹមឡេង
