សហភាពសមាគមន៍កសិកម្មសៀមរាប-មានជ័យ ខេត្តសៀមរាប បានប្រកាសនៅមហាសន្និបាតរបស់ខ្លួនថា គិតត្រឹមឆ្នាំ២០១៨ សហភាពសមាគមន៍មួយនេះ រកប្រាក់ចំណេញសរុប បានរហូតដល់៥៥លានរៀល នេះបើតាមប្រសាសន៍លោក ផង់ សារ៉េត ដែលជាប្រធានសហភាពសហគមន៍។
ក្នុងមហាសន្និបាត របស់សហភាពសហគមន៍កសិកម្មសៀមរាប-មានជ័យប្រចាំឆ្នាំជាលើកដំបូងរបស់ខ្លួន ដើម្បីបូកសរុបលទ្ធផលឆ្នាំ២០១៨ និង លើកទិសដៅអនុវត្តបន្តឆ្នាំ២០១៩ កាលពីថ្ងៃទី០៦ ខែមីនា ឆ្នាំ២០១៩
បានបង្ហាញថា នៅក្នុងឆ្នាំ២០១៨ សហភាពសហគមន៍កសិកម្មមួយនេះ ក្នុងខេត្តសៀមរាប មានសមាជិកសរុប ១០សហគមន៍ ដែលស្ថិតនៅក្នុងស្រុកចំនួន៦ រួមមានស្រុកជីក្រែង សូទ្រនិគម ប្រាសាទបាគង អង្គរធំ បន្ទាយស្រី និងស្រុកពួក។
តាមរយៈរបាយការណ៍របស់សហភាពសមាគមន៍កសិកម្មសៀមរាប-មានជ័យ ខេត្តសៀមរាប បានបញ្ជាក់ថា សហភាពសហគមន៍នេះ ធ្វើការវិនិយោគទៅលើមុខរបរចំនួន៥ ទី១ ទិញលក់ជីគីមី ទី២ ទិញលក់ចំណីសត្វ ទី៣ ទិញលក់ថ្នាំកសិកម្ម ទី៤ ផ្តល់ឥណទានកសិកម្ម ទី៥ សម្របសម្រួលទីផ្សារស្រូវពូជ និង ស្រូវចំណី ដើម្បីជួយសហគមន៍កសិកម្ម ឲ្យទទួលបានតម្លៃធាតុចូលកសិកម្ម និងអត្រាការប្រាក់ប្រសើរឡើង។ ក្នុងការវិនិយោគនេះ សហភាពសមាគមន៍ បានគ្រោងថវិកាសម្រាប់ការវិនិយោគ ប្រមាណជាង ៤ ពាន់លានរៀល ដោយរំពឹងថា នឹងទទួលបានប្រាក់ចំណេញប្រមាណជាង ៦៤លានរៀល។
លោក ផង់ សារ៉េត បានគូសបញ្ជាក់ថា សម្រាប់ការវិនិយោគជាក់ស្ដែង សហភាពសមាគមន៍របស់លោក ចំណាយទុនអស់ត្រឹមតែ ប្រមាណជាង៧រយលានរៀលប៉ុណ្ណោះ និងទទួលបានប្រាក់ចំណេញដុលជាង ៥៥លានរៀល។ ក្នុងនោះ ក្រោយការទូទាត់ សហព័ន្ធសហគមន៍ ទទួលបានប្រាក់ចំណេញសុទ្ធ ៣៦លានរៀល ស្មើនឹង ៥៦% បើធៀបទៅនឹងការរំពឹងទុកនៃប្រាក់ចំណេញ និង ស្មើនឹង ៥% បើធៀបទៅនឹងដើមទុនវិនិយោគជាក់ស្តែង ។
មានវត្តមានក្នុង ឱកាសនោះដែរ លោក ស្រ៊ុន សុខុម អគ្គនាយករងនៃអគ្គនាយកដ្ឋានកសិកម្ម នៃ ក្រសួងកសិកម្ម រុក្ខាប្រមាញ់និងនេសាទ បានផ្ដល់អនុសាសន៍ថា គន្លឹះសំខាន់ ឆ្ពោះទៅរកជោគជ័យគឺការធ្វើឲ្យមានតម្លាភាពនិង គណនេយ្យភាព នៅក្នុងសហគមន៍។
លោក ស្រ៊ុន សុខុម បានបន្ថែមថា ក្រៅពី រាជរដ្ឋាភិបាលបានផ្ដល់សិទ្ធិអនុគ្រោះ លើសហគមន៍កសិកម្មទាំងអស់ រាជរដ្ឋាភិបាលក៏បានបង្កើត គណៈកម្មការសម្របសម្រួលផលិតកម្មកសិកម្មតាមកិច្ចសន្យា ដែលមានតំណាងក្រសួងទាំង ២៧ បានចូលរួម ក្នុងនោះមានវត្តមានរដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ ជាប្រធាន។ រីឯអាជ្ញាធរថ្នាក់ក្រោមជាតិគ្រប់លំដាប់ថ្នាក់ មានភារកិច្ចសហការ ជួយដល់សហគមន៍ផងដែរ ។
អត្ថបទ និង រូបថត : លោក ងិន គឹមឡេង
កែសម្រួលអត្ថបទ : លោក សេង ផល្លី
