នាព្រឹកថ្ងៃទី០៦ ខែមីនា ឆ្នាំ២០១៩ម្សិលមិញនេះ អង្គការអមរា បានប្រារព្ធពិធីអបអរសាទរ ទិវានារីអន្តរជាតិ ៨មិនា ឆ្នាំ២០១៩ លើកទី១០៨ សម្រាប់ស្ត្រីក្រុមប្រឹក្សាឃុំ នៃកម្មវិធី និងសកម្មភាពស្ត្រីដើម្បីទទួលបានសំឡេង និងភាពអង់អាច នាពេលបច្ចប្បន្ន នៅសាលាស្រុកប្រាសាទបាគង ដោយមានការអញ្ជើញចូលរួមពីសំណាក់លោកស្រី ជាសមាជិកក្រុមប្រឹក្សាឃុំ ទាំង ៩ឃុំ នៅក្នុងស្រុកប្រាសាទបាគង ។
លោកស្រី ហង់ ចន្ធី គ្រូបង្គោលបណ្តុះបណ្តាលកម្មវិធី និងសកម្មភាពស្ត្រីដើម្បីទទួលបានសំឡេង និងភាពអង់អាច នៃអង្គការ អមរា បានឲ្យដឹងថា ការប្រារព្ធពិធីអបអរសាទរទិវានារីអន្តរជាតិ ៨មិនា នាពេលនេះ ក្នុងគោលបំណងរំលឹកនូវពាក្យស្លោកដែលស្ត្រីទាមទារបាន គឺ ទី១. សិទ្ធិទទួលនូវការគាំពារមាតានិងទារក , ទី២. សិទ្ធិទទួលបាននូវប្រាក់បៀវត្សរ៍ស្មើៗគ្នាលើការងារ និង ទី៣. សិទ្ធិទទួលបាន ១ថ្ងៃធ្វើការត្រឹមតែ ៨ម៉ោងប៉ុណ្ណោះ ។
លោកស្រីបានឲ្យដឹងទៀតថា ដើម្បីឲ្យស្ត្រីទាំងអស់ចង់ចាំជានិច្ចក្នុងអារម្មណ៍ ឆន្ទ: មនសិកា និងថែរក្សានូវពាក្យស្លោកទាំងនេះ ឲ្យបានស្ថិតស្ថេរជារៀងដរាបនោះ ត្រូវមានគណនេយ្យភាពជាមួយប្រជាពលរដ្ឋ និងរាជរដ្ឋាភិបាលជាដើមខិតខំប្រឹងប្រែងរបស់អង្គភាពពាក់ព័ន្ធ ស្ថាប័នរដ្ឋ ដើម្បីបម្រើប្រជាពលរដ្ឋ និងអ្នកពាក់ព័ន្ធទាំងនោះ ដោយស្មើភាពរវាងគ្នានិងគ្នា មិនរើសអើងពូជសាស្ត្រពណ៌សម្បុរឡើយ ស្របទៅតាមយុទ្ធសាស្ត្រចតុកោណរបស់រាជរដ្ឋាភិបាលកម្ពុជា ដែលដឹកនាំដោយសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។
លោកស្រី សុខ សារ៉ាត់ ជំទប់ទី១ ឃុំបាគង បានលើកឡើងថា ដើម្បីឲ្យសមាជិកក្រុមប្រឹក្សាឃុំ សង្កាត់ ដែលកំពុងរស់នៅបច្ចុប្បន្ន ឲ្យកាន់មានភាពល្អប្រសើរ ចំពោះការពង្រឹង និងលើកកម្ពស់ដល់ស្ត្រីដែលមានភាពអង់អាច ព្រមទាំងមានអភិបាលកិច្ចល្អក្នុងដំណើរការអភិវឌ្ឍតាមបែបប្រជាធិបតេយ្យនៅថ្នាក់មូលដ្ឋាននោះ គឺត្រូវផ្តល់ឱកាសឲ្យក្រុមប្រឹក្សាឃុំ សង្កាត់ បានយល់ដឹងកាន់តែច្បាស់ពីច្បាប់ទម្លាប់ ដើម្បីចូលរួមផ្សព្វផ្សាយនៅគោលនយោបាលរបស់រាជរដ្ឋាភិបាលឲ្យបានទូលំទូលាយ នៅក្នុងការសម្រេចចិត្តអ្វីមួយ ដែលមានផលប៉ះពាល់ដល់ជីវភាពនៃការរស់នៅរបស់បងប្អូនប្រជាពលរដ្ឋទៅថ្ងៃអនាគត ។
លោកស្រី សុខ សារ៉ាត់ បានលើកឡើងទៀតថា ជាមួយគ្នានេះ ក្រុមប្រឹក្សាឃុំ សង្កាត់ ក៏ត្រូវធ្វើផែនការឲ្យឆ្លើយតបទៅតាមតម្រូវការរបស់បងប្អូនប្រជាពលរដ្ឋ ត្រូវផ្តល់ព័ត៌មានពីរបៀបប្រើប្រាស់ធនធានដែលខ្លួនមាន និងត្រូវធានាថា ធនធានទាំងនោះ ពិតជាត្រូវបានប្រើប្រាស់ហើយ ដើម្បីបម្រើឲ្យផលប្រយោជន៍របស់ប្រជាពលរដ្ឋ នៅក្នុងកាល:ទេស:ណាមួយដែលយើងអាចធ្វើទៅបានជូនពួកគាត់ ៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
