ឯកឧត្តម ទៀ សីហា អភិបាលខេត្តសៀមរាប បានមានប្រសាសន៍ថា ក្នុងនាមអាជ្ញាធរខេត្ត និង ប្រធានគណៈបញ្ជាការឯកភាពរដ្ឋបាលខេត្ត សូមឲ្យកងកម្លាំងសមត្ថកិច្ចទាំងអស់ ត្រូវត្រៀមឲ្យបាននូវគ្រប់លក្ខណៈក្នុងការចុះជួយអន្តរាគមន៍ទាល់ពេល សម្រាប់ការជួយសង្គ្រោះប្រជាពលរដ្ឋ ព្រោះថា នៅចំពោះមុខនេះ ជារដូវប្រាំង ហើយក៏មានការក្តៅហួតហែង និង អាចជួបនូវប្រធានស័ក្តិកើតឡើងផ្សេងៗជាយថាហេតុផងដែរ ជាពិសេសលើការខ្វះទឹកប្រើប្រាស់ដោយយោងតាមការជូនដំណឹងរបស់ក្រសួងធនធានទឹកនិង ឧតុនិយម ដែលបានឲ្យដឹងថា នៅរយៈពេលពីរបីខែខាងមុខនេះ នៅតាមតំបន់មួយចំនួន នឹងជួបនូវបញ្ហាខ្វះទឹកប្រើប្រាស់ ដូច្នេះចំពោះមធ្យោបាយ សម្ភារៈ ដែលកងកម្លាំងមានស្រាប់ ត្រូវធ្វើការត្រួតពិនិត្យឲ្យបានជាប្រចាំ ។
ឯកឧត្តម ទៀ សីហា មានប្រសាសន៍យ៉ាងដូច្នេះ ក្នុងសន្និបាតបូកសរុបវាយតម្លៃសភាពការណ៍ និងលទ្ធផលកិច្ចប្រតិបត្តិការឆ្នាំ២០១៨ និង ផ្សព្វផ្សាយទិសដៅការងារឆ្នាំ២០១៩ របស់អគ្គស្នងការដ្ឋាននគរបាលជាតិ នៅស្នងការដ្ឋាននគរបាលខេត្តសៀមរាប កាលពីថ្ងៃទី០៦ ខែ មីនា ឆ្នាំ២០១៩ម្សិលមិញនេះ ៕
អត្ថបទ និង រូបថត ៖ លោក ម៉ី សុខារិទ្ធ និង លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត