មានប្រសាសន៍ក្នុងសន្និបាតបូកសរុបវាយតម្លៃសភាពការណ៍ និងលទ្ធផលកិច្ចប្រតិបត្តិការឆ្នាំ២០១៨ និង ផ្សព្វផ្សាយទិសដៅការងារឆ្នាំ២០១៩ របស់អគ្គស្នងការដ្ឋាននគរបាលជាតិ នៅស្នងការដ្ឋាននគរបាលខេត្តសៀមរាប កាលពីថ្ងៃទី០៦ ខែ មីនា ឆ្នាំ២០១៩ ម្សិលមិញនេះ ត្រូវបានបិទនារសៀលថ្ងៃដដែល ឯកឧត្តម ទៀ សីហា អភិបាលខេត្តសៀមរាប បានធ្វើការក្រើនរំលឹកដល់កម្លាំងសមត្ថកិច្ចគ្រប់ជាន់ថ្នាក់ក្នុងខេត្តសៀមរាប ត្រូវបង្កើនយកចិត្តទុកដាក់ ពង្រឹងលើការងារសន្តិសុខ និង សណ្តាប់ធ្នាប់សាធារណៈ សំខាន់ទៅលើបញ្ហាការទប់ស្កាត់ និង បង្ក្រាបការធ្វើចរាចរណ៍គ្រឿងញៀនឲ្យខាងតែបាន ដែលកំពុងកើតមាននៅក្នុងខេត្ត ជាពិសេស សូមមឲ្យន្ត្រីសមត្ថកិច្ចទាំងអស់ ត្រូវដកខ្លួនចេញឲ្យឆ្ងាយពីការពាក់ព័ន្ធនឹងបញ្ហាគ្រឿងញៀន ខណៈខេត្តសៀមរាប ជាខេត្តទេសចរណ៍ប្រវត្តិសាស្ត្រ ប្រមូលផ្តុំទៅដោយភ្ញៀវទេសចរ មកពីគ្រប់មជ្ឈដ្ឋានលើពិភពលោកចូលមកទស្សនាកម្សាន្ត ព្រោះថា វិស័យទេសចរណ៍នេះ គឺជាឧស្សាហកម្មគ្មានផ្សែង ដែលជាប្រភពចំណូលមិនចេះរីងស្ងួតរបស់ជាតិ និង ប្រជាពលរដ្ឋ ។
ពាក់ព័ន្ធនឹងបញ្ហានេះដែរ ឯកឧត្តមនាយឧត្តមសេនីយ៍ ប៉ែន វិបុល អគ្គស្នងការរងនគរបាលជាតិ នៃក្រសួងមហាផ្ទៃ បានមានប្រសាសន៍ថា រយៈកាលកន្លងមក កម្លាំងសមត្ថកិច្ចនគរបាលជាតិរបស់យើងនៅក្នុងខេត្តសៀមរាបនេះ បានបំពេញតួនាទី និងភារកិច្ចរបស់ខ្លួនយ៉ាងល្អប្រសើរ ធ្វើឲ្យបទល្មើសមានការថយចុះបើប្រៀបធៀបទៅនឹងឆ្នាំកន្លងមក ជាពិសេស លើការការពារថែរក្សាសន្តិសុខសុវត្ថិភាព និង សណ្តាប់ធ្នាប់សង្គមជូនប្រជាពលរដ្ឋ ប៉ុន្តែប្រការដែលសំខាន់ទៀតនោះ គឺការបង្ការ ទប់ស្កាត់ និងបង្ក្រាបឲ្យបានទាន់ពេលវេលា លើការរីករាលដាលនៃប្រើប្រាស់ ការជួញដូរ និង ការធ្វើចរាចរណ៍ដោយខុសច្បាប់ ចំពោះបញ្ហានៃគ្រឿងញៀន ពីព្រោះបញ្ហានៃគ្រឿងញៀននេះ វាមិនត្រឹមតែធ្វើឲ្យប៉ះពាល់ទាំងសេដ្ឋកិច្ច ទាំងសុខភាព និង កិត្តិយសផ្ទាល់ខ្លួនសាម៉ីប៉ុណ្ណោះនោះទេ វាថែមទាំងបានធ្វើឲ្យប៉ះពាល់ដល់ក្រុមគ្រួសារ និង សង្គមជាតិទៀតផង ៕
អត្ថបទ និង រូបថត ៖ លោក ម៉ី សុខារិទ្ធ និង លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
