ឯកឧត្តម តែ គុយស៊ាង រដ្ឋលេខាធិការក្រសួងសុខាភិបាល បានមានប្រសាសន៍ថា រយៈកាលកន្លងមក ក្រសួង សុខាភិបាល បានខិតខំអភិវឌ្ឍន៍ និងពង្រឹងសមត្ថភាពគ្រូពេទ្យនៅទូទាំងប្រទេស ឱ្យចេះគ្រប់គ្រងខ្លួនឯង ឲ្យមាន ការយល់ដឹងចំពោះភារកិច្ចព្យាបាលអ្នកជំងឺ មានជំនាញវិជ្ជាជីវៈ និងក្រមសីលធម៌ជាគ្រូពេទ្យ ក៏ប៉ុន្តែ ក្រុមគ្រូពេទ្យរបស់កម្ពុជា បាននឹងកំពុងទទួលរងនូវការនិន្ទា រិះគន់ខ្លាំងពីមហាជន ក៏ដូចជាអ្នកជំងឺ ទៅបញ្ហាក្រមសីលធម៌ ក្នុងការបំពេញការងារវិជ្ជាជីវៈ ។
ឯកឧត្តម តែ គុយស៊ាង មានប្រសាសន៍ទៀតថា ក្នុងឱកាសនេះ សូមសំណូមពរដល់ក្រុមគ្រូពេទ្យទាំងអស់ សូមឲ្យលើក កម្ពស់ក្រសមសីលធម៌វិជ្ជាជីវៈរបស់ខ្លួន ចៀសវាងមហាជន ក៏ដូចជាអ្នកជំងឺរិះគន់ ព្រោះគ្រូពេទ្យត្រូវតែអនុវត្តការងារឲ្យបានច្បាស់លាស់ ដោយពឹងផ្អែកលើជំនាញសុខាភិបាល ក្នុងស្មារតីគោរពក្រមសីលធម៌-វិជ្ជាជីវៈ ដើម្បីទប់ស្កាត់គ្រោះថ្នាក់ចំពោះអ្នកជំងឺ ពិសេស គ្រូពេទ្យត្រូវតែគោរពពេលវេលាការងារឲ្យបានត្រឹមត្រូវ ព្រោះទាំងនេះគឺជាតម្រូវការចាំបាច់ក្នុងការផ្ដល់សេវាសុខាភិបាលសម្រាប់អ្នកជំងឺ ។
ឯកឧត្តមរដ្ឋលេខាធិការក្រសួងសុខាភិបាល មានប្រសាសន៍បន្ថែមទៀតថា ក្រសួងកំពុងតែពិចារណា និងពិនិត្យឡើងវិញចំពោះគ្រូពេទ្យណា ដែលនៅតែមានការធ្វេសប្រហែស និងខ្ជីខ្ជាក្នុងការងារ ធ្វើឱ្យប៉ះពាល់ដល់អ្នកជំងឺ ហើយក្រសួងនឹងដាក់វិន័យ ធ្វើការព្រមាន និងអាចឈានទៅផ្អាកមិនឱ្យធ្វើជាគ្រូពេទ្យក្នុងមួយរយៈណាមួយ បើសិនជារកឃើញករណីបង្កបញ្ហាជាបន្តបន្ទាប់នោះ។
ឯកឧត្តម តែ គុយស៊ាង មានប្រសាសន៍បែបនេះ ក្នុងអង្គ សន្និបាតបូកសរុបសមិទ្ធផលការងារសុខាភិបាលខេត្ដសៀមរាប ឆ្នាំ២០១៨ និងលើកទិសដៅបន្តឆ្នាំ២០១៩ នៅមហោស្រពមន្ទីរពេទ្យគន្ធបុប្ផា ក្នុងខេត្តសៀមរាប នាព្រឹកថ្ងៃទី០៦ ខែមីនា ឆ្នាំ២០១៩នេះ ៕
អត្ថបទ និង រូបថត : លោក អ៊ិន សីហរិទ្ធ
កែសម្រួលអត្ថបទ : លោក លីវ សាន្ត
