ក្នុងឱកាសដែលបានអនុញ្ញាតឲ្យគណៈប្រតិភូអគ្គស្នងការនគរបាលជាតិសឹង្ហបុរី ដឹកនាំដោយឯកឧត្តម ហ៊ូន វីតិច(HOON GWEE TECK) ចូលជួបពិភាក្សាការងារនៅស្នងការដ្ឋាននគរបាលខេត្តសៀមរាប កាលពីរសៀលថ្ងៃទី០៥ ខែមីនា ឆ្នាំ២០១៩នេះ លោកឧត្តមសេនីយ៍ទោ ទិត្យ ណារ៉ុង ស្នងការនៃស្នងការដ្ឋាននគរបាលខេត្ត បានសម្ដែងនូវការស្វាគមន៍ និង ពេញចិត្ដចំពោះវត្តមានឯកឧត្តមអគ្គស្នងការនគរបាលជាតិសឹង្ហបុរី ក្នុងដំណើរទស្សនកិច្ចផ្លូវការនៅខេត្តសៀមរាប ជាពិសេសកិច្ចសហប្រតិបត្តិការទ្វេភាគីរវាងអគ្គស្នងការដ្ឋាននគរបាលជាតិកម្ពុជា និងអគ្គស្នងការដ្ឋាននគរបាលជាតិសឹង្ហបុរី លើកិច្ចសហការទប់ស្កាត់បទឧក្រឹដ្ឋឆ្លងដែន និងប្រយុទ្ធប្រឆាំងអំពើភេរវកម្មរួមគ្នា ។
លោកឧត្តមសេនីយ៍ទោ ទិត្យ ណារ៉ុង ក៏បានជំរាបជូនដល់គណៈប្រតិភូ ពាក់ព័ន្ធទៅនឹងលក្ខណៈភូមិសាស្ត្រ និងការរស់នៅរបស់ប្រជាពលរដ្ឋក្នុងខេត្ត អំពីតួនាទីភារកិច្ចរបស់កងកម្លាំងនគរបាលជាតិកម្ពុជា ក្នុងកិច្ចការពារថែរក្សាសន្តិសុខ សុវត្ថិភាព និងសណ្តាប់ធ្នាប់សាធារណៈ ពិសេសការអនុវត្តច្បាប់របស់នគរបាលជាតិកម្ពុជា ក៏ដូចការអនុវត្តច្បាប់អន្តោប្រវេសន៍របស់កម្លាំងនគរបាលកម្ពុជា ។
មានប្រសាសន៍ឆ្លើយតប ឯកឧត្តម ហ៊ូន វីតិច(HOON GWEE TECK) បានថ្លែងនូវការកោតសសើរដោយស្មោះ ចំពោះការដឹកនាំរបស់លោកស្នងការ ក៏ដូចជាកងកម្លាំងនគរបាលខេត្តទាំងអស់ នៃស្នងការដ្ឋាននគរបាលខេត្តសៀមរាប ក្នុងការអនុវត្តច្បាប់ និងការពារថែរក្សាសន្តិសុខ សុវត្ថិភាព និងសណ្តាប់ធ្នាប់ជូនប្រជាពលរដ្ឋ ភ្ញៀវទេសចរណ៍ជាតិ និងអន្តរជាតិ អ្នកវិនិយោគទុននានាបានយ៉ាងល្អប្រសើរ ដែលកន្លងមក ធ្វើឲ្យខេត្តសៀមរាបមានសន្តិសុខល្អ និងការអភិវឌ្ឍន៍រីកចម្រើនគួរជាទីមោទន ។
ព័ត៌មានជាតិ ថ្មីៗ
ឯកឧត្តម ហ៊ូន វីតិច(HOON GWEE TECK) បានថ្លែងអំណរគុណយ៉ាងជ្រាលជ្រៅផងដែរ ចំពោះថ្នាក់ដឹកនាំរាជរដ្ឋាភិបាលកម្ពុជា ក្រសួងមហាផ្ទៃ និងអគ្គស្នងការនគរបាលជាតិ ដែលបានដាក់បញ្ជូលកម្មវិធីទស្សនកិច្ចឲ្យក្រុមប្រតិភូរបស់ឯកឧត្ដម បានមកទស្សនកិច្ចនៅខេត្តសៀមរាប ដែលជាក្តីប៉ងប្រាថ្នារបស់ឯកឧត្តម ៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
