ព្រឹកថ្ងៃទី០៤ ខែមីនា ឆ្នាំ២០១៩នេះ ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តត្បូងឃ្មុំ បានដឹកនាំមន្ត្រីជំរឿនខេត្ត ចុះអនុវត្តការជំរឿនទូទាំងខេត្តត្បូងឃ្មុំ ក្រោមប្រធានបទ “ជំរឿនទូទៅប្រជាជនឆ្នាំ២០១៩ ជាកាតព្វកិច្ចរបស់យើងទាំងអស់គ្នា ដើម្បីចូលរួមអភិវឌ្ឍន៍កម្ពុជា”
ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តត្បូងឃ្មុំ លើកឡើងថា ក្រោមដំបូលសុខសន្តិភាពនិងការអភិវឌ្ឍន៍ ដឹកនាំប្រកបដោយគតិបណ្ឌិតរបស់សម្ដេចតេជោ ហ៊ុន សែន ប្រមុខរាជរដ្ឋាភិបាលកម្ពុជា បានយកចិត្តទុកដាក់ក្នុងការធ្វើជំរឿនទូទាំងប្រទេសនេះឡើង។
ឯកឧត្តមបណ្ឌិត គូសបញ្ជាក់ថា នេះជាការធ្វើជំរឿនលើកទី៣ នៅក្នុងប្រវត្តិសាស្ត្រកម្ពុជា ដែលជាទូទៅបាននឹងកំពុង ធ្វើឡើងរៀងរាល់ ១០ឆ្នាំម្ដង ដើម្បីទទួលបានទិន្នន័យស្ថិតិប្រជាសាស្ត្រ ជាក់លាក់ ប្រាកដប្រជា និងសុក្រឹត្យ សម្រាប់ប្រើប្រាស់ជាធាតុចូលក្នុងការ រៀបចំតាក់តែងគោលនយោបាយជាតិឲ្យបានត្រឹមត្រូវ និងដើម្បីធ្វើជាសូចនាករក្នុងការតាមដានត្រួតពិនិត្យ ផែនការយុទ្ធសាស្ត្រអភិវឌ្ឍន៍ជាតិ និងគោលដៅអភិវឌ្ឍន៍ប្រកបដោយចីរភាព របស់កម្ពុជា ២០១៦-២០៣០ ដោយមិនទុកឱ្យនរណាម្នាក់នៅឯការឡើយ។
ឯកឧត្តមបណ្ឌិត អភិបាលខេត្តត្បូងឃ្មុំ បានអំពាវនាវដល់ប្រជាជនទូទាំងខេត្តត្បូងឃ្មុំ សូមគាំទ្រសហការ និងចូលរួមក្នុងកិច្ចការដ៏មានសារៈសំខាន់នេះ ឱ្យបានគ្រប់ៗគ្នា ប្រកបដោយភាពស្មោះស្ម័គ្រ គ្រប់គ្រាន់ត្រឹមត្រូវ សុក្រឹត្យ និងស្មោះត្រង់ ក្នុងការផ្ដល់ព័ត៌មានតាមរយៈកិច្ចសម្ភាសន៍របស់មន្ត្រីជំរឿន ដើម្បីជាមូលដ្ឋាននៃការកសាងផែនការអភិវឌ្ឍប្រទេសជាតិរបស់យើងទាំងអស់គ្នា។
តាមការបញ្ជាក់របស់លោក អេង ណារ៉េត ប្រធានមន្ទីរផែនការខេត្តត្បូងឃ្មុំ បានឲ្យដឹងថា ៖ ការធ្វើជំរឿនមាន២០០៤មណ្ឌល មានមន្ត្រីអនុវត្តចំនួន២,០០៤នាក់ មន្ត្រីត្រួតពិនិត្យចំនួន៥០៧ នាក់ និងមន្ត្រីបំរុងចំនួន៤០នាក់។ ក្នុងការធ្វើជំរឿនសម្រាប់ខេត្តត្បូងឃ្មុំ មានចំនួន៨៧២ភូមិ ៦២ឃុំ ស្រុក\ក្រុងទាំង៧ ទូទាំងខេត្តត្បូងឃ្មុំ ។
ដោយឡែក កាលពីរសៀលថ្ងៃទី០៣ ខែមីនា ឆ្នាំ២០១៩ ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តត្បូងឃ្មុំ ក៍បានផ្តល់បទសម្ភាសរួចហើយផងដែរដល់ក្រុមមន្ត្រីជំរឿនខេត្ត ដែលដឹកនាំលោក អេង ណារ៉េត ប្រធានមន្ទីរផែនការខេត្តត្បូងឃ្មុំ នៅគេហដ្ឋានរបស់ឯកឧត្តម នៅភូមិដងកាំបិទ ឃុំស្រឡប់ ស្រុកត្បូងឃ្មុំ ខេត្តត្បូងឃ្មុំ។
អត្ថបទ និង រូបថត : មន្ទីរព័ត៌មានត្បូងឃ្មុំ
