បើតាមការឲ្យដឹងពីក្រុមការងារអង្គការអ្នកស្ម័គ្រចិត្តសហប្រជាជាតិ បានឲ្យដឹងថា អង្គការនេះមានសហការជាមួយក្រសួងអប់រំយុវជន និងកីឡា ដោយបានបង្កើតវគ្គបណ្ដុះបណ្ដាលយុវជនពីជំនាញសហគ្រិនភាព។ លើគម្រោងសាកល្បងលើកទីពីរ ស្ដីពី “យុវជនស្ម័គ្រចិត្តដើម្បីសហគ្រិនភាពសង្គម ” ដែលមាន៥ខេត្តត្រូវបានជ្រើរើស គឺ ខេត្តសៀមរាប កំពង់ធំ កំពង់ឆ្នាំង កំពង់ចាម និងខេត្តតាកែវ ដោយក្នុងមួយខេត្តជ្រើសយក១០នាក់។ គម្រោងនេះបានចាប់ផ្ដើមហើយ នៅថ្ងៃចន្ទ ទី០៤ ខែមីនា ឆ្នាំ២០១៩ ម្សិលមិញនេះ ដោយនឹងជម្រុះយកតែយុវជនឆ្នើម១០នាក់តែប៉ុណ្ណោះ។
ជាយុវជនស្ម័គ្រចិត្តនៃមជ្ឈមណ្ឌលជាតិយុវជនកម្ពុជា កញ្ញា យ៉ន ពិសី បានបង្ហាញនូវចំណាប់អារម្មណ៍ចំពោះកម្មវិធី “ យុវជនស្ម័គ្រចិត្តដើម្បីសហគ្រិនភាពសង្គម ” ថា កម្មវិធីនេះពិតជាកម្មវិធីដែលមានសារៈសំខាន់យ៉ាងខ្លាំងចំពោះយុវជន ព្រោះវាបានផ្ដល់ចំណេះដឹង ជំនាញជាច្រើនក្នុងការទំនាក់ទំនង និងការធ្វើការងារជាដើម។
យុវជនស្ម័គ្រចិត្តនៃមជ្ឈមណ្ឌលជាតិយុវជនកម្ពុជាមួយរូបទៀត ដែលបានចូលរួមក្នុងកម្មវិធីនេះដែរ លោក លោក សៀន ពុទ្ធិវឌ្ឍនៈ ក៏បានបង្ហាញនូវទស្សនៈជាវិជ្ជមានថា កម្មវិធីបណ្ដុះបណ្ដាលនេះ បានផ្ដល់ឱកាសដល់យុវជនជាច្រើនក្នុងការទទួលបានបទពិសោធន៍ និងចំណេះដឹង សម្រាប់ជាស្ពានក្នុងការស្វែងរកការងារ និងបើកអាជីវកម្មផ្ទាល់ខ្លួន។
ជាមួយគ្នានេះដែរ កញ្ញា ចាន់ ស៊ូលី ប្រធានការងារអង្គការអ្នកស្ម័គ្រចិត្តសហប្រជាជាតិ បានមានប្រសាសន៍ថា កម្មវិធីបណ្ដុះបណ្ដាលយុវជននៅពេលនេះមាន មានគោលបំណងបង្កើនសមត្ថភាពយុវជនកម្ពុជាអាចទទួលបានការងារ អាចបង្កើតការងារដោយខ្លួនឯង ជាពិសេសអាចចូលរួមកាត់បន្ថយភាពក្រីក្របានយ៉ាងច្រើន។
គម្រោងសាកល្បងលើកទី០២ ស្ដីពី “ យុវជនស្ម័គ្រចិត្តដើម្បីសហគ្រិនភាពសង្គម ” នេះ មានការគាំទ្រពីប្រទេសឥណ្ឌា ប្រេស៊ីល និងអាហ្វ្រិកខាងត្បូង ដែលមានគោលបំណងលើកកម្ពស់ការងារស្ម័គ្រចិត្ត និងសហគ្រិនភាពក្នុងកម្រិតថ្នាក់ជាតិ ក្នុងការចូលរួមចំណែកដោះស្រាយបញ្ហាយុវជនគ្មានការងារ និងបញ្ហាសង្គមនានាដែលកំពុងកើតឡើង៕
អត្ថបទ៖ ហេង វណ្ណនី
រូបភាព៖ ហាំ ម៉េងហួត
