ក្រុមកីឡាបាល់ទាត់សិស្សនៃវិទ្យាល័យ ១០មករា ១៩៧៩ បានរក្សាតំណែងជើងឯកបន្ត ដោយទទួលបានជ័យជម្នះលើក្រុមកីឡាបាល់ទាត់សិស្សវិទ្យាល័យ ហ៊ុន សែន សៀមរាប នៅថ្ងៃបិទបញ្ចប់ការប្រកួតកីឡាចម្រុះសិស្សបឋមសិក្សា និង មធ្យមសិក្សា សម្រាប់ឆ្នាំ ២០១៨-២០១៩ !
នារសៀលថ្ងៃទី០៤ ខែមីនា ឆ្នាំ២០១៩ នៅកីឡដ្ឋានខេត្តសៀមរាប ស្ថិតនៅ ឃុំកណ្ដែក ស្រុកប្រាសាទបាគង ខេត្តសៀមរាប មានរៀបចំពិធីបិទការប្រកួតកីឡាសិស្សបឋមសិក្សា និង មធ្យមសិក្សា ជ្រើសរើសជើងឯកប្រចាំឆ្នាំ២០១៨-២០១៩។
ក្នុងឱកាសនោះមាន ក៏មានការប្រកួតកីឡាបាល់ទាត់ផ្នែកបុរស នៃសិស្សសាលាមធ្យមសិក្សា វគ្គផ្ដាច់ព្រ័ត្ររវាង វិទ្យាល័យ ១០មករា និង វិទ្យាល័យ ហ៊ុនសែន-សៀមរាប ផងដែរ ដែលជាលទ្ធផលម្ចាស់ជើងឯកចាស់ប្រចាំឆ្នាំសិក្សា ២០១៧-២០១៨ វិទ្យាល័យ ១០មករា នៅតែបន្តរក្សាតំណែងសម្រាប់ប្រចាំសិក្សាឆ្នាំ២០១៨-២០១៩ ដោយលទ្ធផល ១ ទល់នឹង ១ និងកាត់សេចក្ដីដោយទាត់បាល់ចម្ងាយ ១១ម៉ែត្រ ដោយ ១ក្រុម ចំនួន ៥គ្រាប់។ ក្នុងនោះ ក្រុមកីឡាករបាល់ទាត់ វិទ្យាល័យ ១០មករា ស៊ុតបញ្ចូលទីបាន ៤គ្រាប់ និងយកឈ្នះលើក្រុមកីឡាករ វិទ្យាល័យ ហ៊ុនសែន-សៀមរាប ដែលស៊ុតបញ្ចូលទីបានតែ ២គ្រាប់ប៉ុណ្ណោះ។
ព័ត៌មានជាតិ ថ្មីៗ
នៅក្នុងឱកាសថ្លែងបិទការប្រកួតនោះ លោក ង៉ាន់ ភិរុណ អភិបាលរងខេត្តសៀមរាប បានបង្ហាញនូវការចាប់អារម្មណ៍ចំពោះការចូលរួមពីសំណាក់លោកនាយក-នាយិកាសាលាទាំងអស់ក្នុងខេត្តសៀមរាប ដែលបានសហការគាំទ្រ នាំឲ្យការប្រកួតនាពេលនេះមានដំណើរការល្អ ចាប់ពីថ្ងៃបើក រហូតដល់ថ្ងៃបិទបញ្ចប់ប្រកបដោយជោគជ័យ ។
លោកបន្ថែមថា ៖ ការចូលរួមគាំទ្រដោយមាតា-បិតា អាណាព្យាបាលសិស្ស គឺជាកំណត់សម្គាល់វិជ្ជមានមួយនៃសង្គម ក្នុងដំណើរឆ្ពោះទៅរកការស្រឡាញ់សុខភាព តាមរយៈនៃការចូលចិត្តលេងកីឡា ។ ការចូលចិត្តលេងកីឡា របស់កុមារា កុមារី យុវជន យុវនារី ដែលនេះជាការកសាងទម្លាប់ដ៏ល្អ ដើម្បីមិត្តភាព សុខុមាលភាព ចម្រើនបញ្ញា ដើម្បីការសិក្សា ចៀសឆ្ងាយពីគ្រឿងញៀន និង ដើម្បីអនាគតដ៏រុងរឿង ។
គួរបញ្ជាក់ឲ្យដឹងថា ៖ កម្មវិធីប្រកួតកីឡាសិស្សសាលាបឋមសិក្សានិងមធ្យមសិក្សា ជ្រើសរើសជើងឯកប្រចាំឆ្នាំសិក្សា ២០១៨-២០១៩ របស់ខេត្តសៀមរាប ចាប់ផ្តើមកាលពីថ្ងៃទី១៩ ខែកុម្ភៈ ក្នុងនេះ ផ្នែកបឋមសិក្សា មានវិញ្ញាសារកីឡាបាល់ទាត់ បាល់ទះ បាល់បោះ និង អត្តពលកម្ម ស្មើនឹង ៣៥ ក្រុម ។ ផ្នែកមធ្យមសិក្សារួមមាន បាល់ទាត់ បាល់ទះ បាល់បោះ ប៉េតង់ និង តេក្វាន់ដូរ WTF ស្មើនិង ១៤០ក្រុម ។ សរុបកីឡាករ មានចំនួន ១,៩៤១នាក់ ក្នុងនេះមាន កុមារី និង យុវនារី ចំនួន ៧១២នាក់ មកពីបណ្តាសាលារៀនកម្រិតបឋមសិក្សានិងមធ្យមសិក្សាទាំង ១២ ក្រុង-ស្រុក ទូទាំងខេត្តសៀមរាប ៕
អត្ថបទ និង រូបថត : លោក ងិន គឹមឡេង
កែសម្រួលអត្ថបទ : លោក សេង ផល្លី
