នៅព្រឹកថ្ងៃទី០៤ ខែមីនា ឆ្នាំ២០១៩នេះ លោក នាក់ ណេរ៉ុន ឋានន្តរស័ក្ដិឧត្តមមន្ត្រី ថ្នាក់លេខ៦ ជាអភិបាលស្រុកស្រីស្នំ ត្រូវបានប្រកាសទទួលតំណែងជាអភិបាលរង នៃគណៈអភិបាលខេត្តសៀមរាប បំពេញបន្ថែមជំនួសឯកឧត្តម ទៀ សីហា ដែលត្រូវបានតែងតាំងជាអភិបាលខេត្តសៀមរាបនាពេលកន្លងមក ។
តាមរយៈអនុក្រឹត្យស្ដីពីការតែងតាំងមន្ត្រីរាជការ លេខ ១០៤ អនក្រ.តត ចុះថ្ងៃទី៣១ ខែមករា ឆ្នាំ២០១៩ របស់រាជរដ្ឋាភិបាលកម្ពុជា ដែលចុះហត្ថលេខាដោយសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។
ពិធីប្រកាសមុខតំណែងនេះ បានប្រព្រឹត្តនៅសាលប្រជុំធំសាលាខេត្តសៀមរាប ក្រោមអធិបតីភាពឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃ តំណាងដ៏ខ្ពង់ខ្ពស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ , ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប និង ឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាប និងមានការចូលរួមពីសំណាក់ឯកឧត្តម លោកជំទាវ លោក លោកស្រី ជាគណៈប្រតិភូក្រសួងមហាផ្ទៃ អភិបាលរងខេត្ត សមាជិកក្រុមប្រឹក្សាខេត្ត នាយករដ្ឋបាលសាលាខេត្ត មេបញ្ជាការកងកម្លាំងប្រដាប់អាវុធ ប្រធានមន្ទីរ អង្គភាព អភិបាលក្រុង ស្រុក ក្រុមប្រឹក្សាឃុំ សង្កាត់ និងមន្ត្រីសាលាខេត្តប្រមាណជាង៣០០នាក់ ។
ព័ត៌មានជាតិ ថ្មីៗ
គួររំលឹកថា លោក នាក់ ណេរ៉ុន ធ្លាប់បានបំពេញការងារជាអភិបាលស្រុកវ៉ារិន និង អភិបាលស្រុកស្រីស្នំ ក្នុងរយៈពេលសរុបចំនួន២១ឆ្នាំមកហើយ ៕
អត្ថបទ និង រូបថត ៖ សហការី
កែសម្រួលអត្ថបទ ៖ លោក លីវ សាន្ត
