ប្រទេសកូរ៉េខាងជើង នៅថ្ងៃអាទិត្យម្សិលមិញនេះ បានច្រានចោលការចោទប្រកាន់ដែលថា ខ្លួនបានទទួលលុយ២ពាន់លានដុល្លារ តាមរយៈការវាយប្រហារ តាមអ៊ីនធឺណេត ទៅលើធនាគារ និងការផ្លាស់ប្តូររូបិយវត្ថុដោយលាក់បាំង ហើយបានចោទប្រកាន់សហរដ្ឋអាមេរិក ពីបទផ្សព្វផ្សាយពាក្យចរចាមអារាមនោះ ។
សេចក្តីថ្លែងការណ៍មួយ ធ្វើឡើងដោយមន្ត្រីនាំពាក្យគណៈកម្មាធិការ សម្រាប់សម្រួលជាតិ របស់សាធារណរដ្ឋប្រជាធិបតេយ្យ ប្រជាមានិតកូរ៉េ ដែលទទួលបន្ទុកប្រឆាំង ការលាងលុយកខ្វក់និងហិរញ្ញប្បទានភេរវកម្មនោះ ទីភ្នាក់ងារសារព័ត៌មានកូរ៉េខាងជើង KCNA បាននិយាយថា “សហរដ្ឋអាមេរិកនិងកងកម្លាំងជាសត្រូវដទៃទៀត នៅក្នុងពេលបច្ចុប្បន្ននេះ កំពុងតែពង្រីកសាយភាយ នូវពាក្យចរចាមអារាមដ៏ឈឺចាប់”។
សេចក្តីថ្លែងការណ៍ដដែលនោះ បានបន្តទៀតថា “ការប្រឌិតធ្វើឡើងដោយកងកម្លាំងជាសត្រូវបែបនេះ គ្មានអ្វីដទៃ ក្រៅពីប្រភេទហ្គេមអាក្រក់ ដែលមានគោលបំណងបំផ្លាស់កិត្តិយសរបស់សាធារណរដ្ឋយើង និងស្វែងបង្កើតភាពត្រឹមត្រូវ សម្រាប់ការដាក់ទណ្ឌកម្មនិងសម្ពាធ ប្រឆាំងសាធារណរដ្ឋប្រជាធិបតេយ្យប្រជាមានិតកូរ៉េនោះទេ”៕
ប្រភព ៖ ដើមអំពិល
ប្រែសម្រួល៖ប៉ាង កុង
