នៅព្រឹកថ្ងៃទី ០២ ខែ កញ្ញា ឆ្នាំ២០១៩នេះ គ្រប់សមត្ថកិច្ចនៃកងកម្លាំងប្រដាប់អាវុធ និង គណៈបញ្ជាការឯកភាពក្រុង ស្រុកក្នុងការគ្រប់គ្រងនូវរាល់សភាពការណ៍ដែលកើតមានឡើងនៅតាមមូលដ្ឋាន ក្នុងខេត្តសៀមរាប ជាពិសេសនៅថ្ងៃទី ០៩ វិច្ឆិកាខាងមុខនេះ ដើម្បីបញ្ជៀសនូវការបង្កនូវភាពវឹកវរ ចលាចលនៅក្នុងសង្គម នេះបើតាមប្រសាសន៍របស់ ឯកឧត្តម ទៀ សីហា អភិបាលខេត្តសៀមរាប ក្នុងកិច្ចប្រជុំ របស់គណៈបញ្ជាការឯកភាពរដ្ឋបាលខេត្ត។
ដោយខេត្តសៀមរាប ជាតំបន់មានអាទិភាព បន្ទាប់ពីរាជធានីភ្នំពេញ ក្នុងការទទួលរៀបចំពិធីផ្លូវការថ្នាក់ជាតិ និងអន្តរជាតិសំខាន់ៗ មួយវិញទៀត ខេត្តប្រវត្តិសាស្ត្រមួយនេះ ក៏ជាមូលដ្ឋានសេដ្ឋកិច្ចដ៏សំខាន់ ដែលវិនិយោគលើវិស័យទេសចរណ៍ ដូច្នេះ ការថែរក្សា ការពារ សន្តិសុខ សណ្ដាប់ធ្នាប់ គឺកត្តាដែលរដ្ឋបាលខេត្តយកចិត្តទុកដាក់ខ្ពស់។
មានប្រសាសន៍សង្កត់ធ្ងន់ក្នុងកិច្ចប្រជុំ ឯកឧត្តម ទៀ សីហា ដាក់នូវវិធានការណ៍ មួយចំនួនដល់កងកម្លាំងប្រដាប់អាវុធទាំង៣ និង អាជ្ញាធរមូលដ្ឋាន ត្រូវអនុវត្តនូវគោលនយោបាយភូមិ ឃុំ មានសុវត្ថិភាព ក្នុងធានាឲ្យបាននូវសុវត្ថិភាព សន្តិសុខ សណ្តាប់ធ្នាប់ជូនប្រជាពលរដ្ឋ សំខាន់ភ្ញៀវទេសចរណ៍ជាតិ អន្តរជាតិ។ ទន្ទឹមនោះ ឯកឧត្តមក៏បានក្រើនរំលឹក ដល់គ្រប់គណៈបញ្ជាការឯក ភាពរដ្ឋបាល ក្រុង ស្រុក និងកងឯកភាពទាំងអស់ ត្រូវធ្វើការផ្សព្វផ្សាយនូវសេចក្តីណែនាំរបស់ ប្រមុខរាជរដ្ឋាភិបាល ឲ្យបានចូលជ្រៅដល់មន្ត្រីរាជការ អាជ្ញាធរ ឃុំ សង្កាត់ និង កងកម្លាំងប្រដាប់អាវុធ ព្រមទាំងប្រជាពលរដ្ឋ កុំឲ្យចាញ់បោកនូវរាល់ល្បិចកល របស់ក្រុមជ្រុលនិយម ក្នុងគោលបំណងបំផ្លាញសន្តិភាពនៅកម្ពុជា។
ក្នុងនោះ ឯកឧត្តមអភិបាលខេត្ត ក៏បានលើកឡើងផងដែរ ទៅដល់មន្ត្រីមានសមត្ថកិច្ចទៅតាមជំនាញនីមួយៗ អំពីការទប់ស្កាត់ បទល្មើសធនធានធម្មជាតិរ៉ែ ព្រៃឈើ ជលផល អំពើចោរកម្ម អំពើជួញដូរគ្រឿងញៀន ការរំលោភយកដីរដ្ឋធ្វើជាកម្មសិទ្ធ ការចរាចរណ៍ឱសថក្លែងក្លាយ រួមនិង ការប្រកួតប្រជែងមិនស្មោះត្រង់របស់ក្រុមហ៊ុនមួយចំនួន ក្នុងវិស័យទេសចរណ៍ ដែលបាននាំឲ្យភ្ញៀវទេសចរមានការថយចុះ។
អត្ថបទ និង រូបភាព ៖ លោក ម៉ី សុខារិទ្ធ
កែសម្រួលអត្ថបទ៖ លោក សេង ផល្លី
