នៅថ្ងៃទី០៣ ខែកញ្ញា ឆ្នាំ២០១៩នេះ នៅរដ្ឋបាលខេត្តសៀមរាប បានរៀបចំបើកសិក្ខាសាលាផ្សព្វផ្សាយ អនុក្រឹត្យលេខ ១៩អនក្រ.បកស្តីពីការបង្កើតការិយាល័យប្រជាពលរដ្ឋនៅរដ្ឋបាលថ្នាក់ក្រោមជាតិនិងរបៀបរបបធ្វើការងាររបស់ការិយាល័យប្រជាពលរដ្ឋរាជធានី-ខេត្ត ក្រោមអធិបតីភាព ឯកឧត្តម អ៊ឹង ហឿន ប្រធានក្រុមប្រឹក្សាខេត្តនិងវត្តមាន ប្រធាននាយកដ្ឋានមុខងារ និងធនធាននៃក្រសួងមហាផ្ទៃ -លោក លោកស្រី ប្រធាន អនុប្រធានមន្ទីរ អង្គភាព អភិបាល/អភិបាលរងក្រុង-ស្រុកសរុបចំនួនប្រមាណជា១០០រូប។
ថ្លែងបើកអង្គសិក្ខាសាលានាឱកាសនោះ ឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាប មានប្រសាសន៍ថា ការិយាល័យប្រជាពលរដ្ឋបានដើរតួនាទីជាភ្នែកជាច្រមុះ របស់ពលរដ្ឋនិងថ្នាក់ដឹកនាំមន្ទីរអអ្គភាព រាជធានីខេត្ត ដើម្បីឆ្លុះបញ្ចាំងពីតម្លាភាពនិងប្រតិបត្តិការរបស់អង្គភាពច្រកចេញ-ចូលតែមួយ ដែលបាននឹងកំពុងអនុវត្តការងារថ្នាក់ខេត្ត និងថ្នាក់ក្រុងស្រុកមួយចំនួន។ការិយាល័យនេះត្រូវមានគណនេយ្យភាពចំពោះរាជរដ្ឋាភិបាល និងក្រសួងស្ថាប័ននាន របស់រាជរដ្ឋាភិបាល ក្រុមប្រឹក្សា និងប្រជាពលរដ្ឋ។
ឯកឧត្តម ប្រធានក្រុមប្រឹក្សាខេត្ត មានប្រសាសន៍បញ្ជាក់ថា ការបង្កើតយន្តការច្រកចេញចូលតែមួយ និងការិយាល័យប្រជាពលរដ្ឋ រដ្ឋបាលខេត្តនិងរដ្ឋបាលក្រុង ស្រុក ក្នុងគោលបំណងដើម្បីលើកកម្ពស់គុណភាព ប្រសិទ្ឋភាព តម្លាភាព កាត់បន្ថយពេលវេលា ច្បាស់លាស់អាចជឿទុកចិត្តបាន តម្លៃសមរម្យ ប្រកបដោយគុណភាពនិងគណនេយ្យភាព នៃ ការផ្តល់សេវារដ្ឋបាលថ្នាក់ក្រោមជាតិ តាមរយៈការប្រមូល ការផ្តល់សេវារដ្ឋបាលលើវិស័យនានា នៅកន្លែងតែមួយ និង ដើម្បីបង្កលក្ខណៈងាយស្រួលឆ្លើយតបទាន់ពេលវេលាទៅនឹងតម្រូវការសំណូមពរ និងបង្ខិតសេវាឲ្យកាន់ តែជិតប្រជាពលរដ្ឋ ជាពិសេសចូលរួមចំណែកក្នុងការទប់ស្កាត់នូវអំពើពុករលួយផងដែរ ។
ឯកឧត្តម អ៊ឹង ហឿន មានប្រសាសន៍បន្តថា ការិយាល័យប្រជាពលរដ្ឋ ដើរតួនាទីជាអ្នកសម្រុះសម្រួល ដោះស្រាយបណ្តឹងក្រៅប្រព័ន្ធតុលាការ ពាក់ព័ន្ធទៅនឹងការផ្តល់សេវាសាធារណៈ និងការគ្រប់គ្រងរដ្ឋបាលថ្នាក់ក្រោមជាតិ សំដៅដល់ការលើកកម្ពស់អភិបាលកិច្ចល្អ គណនេយ្យភាព និងបង្កើននូវជំនឿទុកចិត្តរបស់ប្រជាពលរដ្ឋនៅថ្នាក់មូលដ្ឋានស្របតាមអនុសាសន៍របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
ក្នុងនោះដែរ ឯកឧត្តមប្រធានក្រុមប្រឹក្សាខេត្ត ក៏បានធ្វើការណែនាំដល់ប្រធានការិយាល័យប្រជាពលរដ្ឋ និងមន្ត្រីក្រោមឱវាទទាំងអស់ត្រូវអនុវត្តការងារឲ្យមានប្រសិទ្ធិភាពគឺដោះស្រាយឱ្យចំបញ្ហារបស់ប្រជាជនហើយប្រធាន និងមន្ត្រី ការិយាល័យថ្មីនេះ ត្រូវតែជាបុគ្គលឯករាជ្យ ដែលរាល់ការអន្តរាគមន៍ទៅលើបញ្ហារបស់បងប្អូនប្រជាពលរដ្ឋ មិនត្រូវធ្វើឡើងដោយសារតែមានសម្ពាធខាងផ្នែកនយោបាយនោះឡើយ។
សូមជំរាបជូនថា កាវិយាល័យប្រជាពលរដ្ឋត្រូវបានបង្កើតឡើងតាមរយៈអនុក្រឹត្យលេខ ១ ៩ អនក្រ.បកចុះថ្ងៃទី០៨ ខែកុម្ភៈ ឆ្នាំ២០១៧ របស់រាជរដ្ឋាភិបាល ដែលអនុក្រឹត្យនេះមានគោលដៅកំណត់យន្តការ គោលការណ៍ បែបបទ និងនីតិវិធីនៃការសម្រុះសម្រួលដោះស្រាយបណ្តឹងនៅថ្នាក់ក្រោមជាតិ ជាមួយគ្នានេះក្រសួងមហាផ្ទៃក៍បានចេញសេចក្តីណែនាំស្តីពី របៀបរបបធ្វើការងាររបស់ការិយាល័យប្រជាពលរដ្ឋរាជធានី-ខេត្ត មានពីរផ្នែកគឺផ្នែកទទួលពាក្យបណ្តឹង និងនិងកិច្ចការរដ្ឋបាល និងផ្នែកច្បាប់ស៊ើបអង្គេត ដែលផ្នែកទាំងពីរនេះជាអ្នកជួយសម្របសម្រួលក្នុងការទទួល និងសម្រុះសម្រួលដោះស្រាយពាក្យបណ្តឹងជូនប្រជាពលរដ្ឋ ៕
អត្ថបទ និង រូបភាព ៖ យូ វង្ស
កែសម្រួល៖ អ៊ុន ណារាជ្យ
