នៅក្នុងឱកាសបិទបញ្ជប់មហោស្រពសិល្បៈចម្រៀងខ្មែរជាសាកលថ្នាក់ខេត្តលើកទី៥ នៅសៀមរាប នៅថ្ងៃទី០៣ ខែកញ្ញា ឆ្នាំ២០១៩នេះ លោកស្រី យូ សុភា អភិបាលរងខេត្តសៀមរាប បានអំពាវនាវ ឲ្យប្រជាពលរដ្ឋខ្មែរ ចូលរួមថែរក្សាប្រពៃណីវប្បធម៌ដ៏ផូរផង់ដូនតាខ្មែរឲ្យបានគង់វង្ស ដោយស្មារតីទទួលខុសត្រូវខ្ពស់ ។ ក្នុងសម័យកាលសាកលភាវូបនីយកម្ម រួមទាំងសម័យកាលជឿនលឿននៃបច្ចេកវិទ្យានាពេលបច្ចុប្បន្ននេះ វាបានបង្ករឲ្យមានការធ្លុះធ្លាយរបាំងព្រំដែនវប្បធម៌ បង្ករឲ្យមានការហូរចូលនៃវប្បធម៌បរទេសយ៉ាងគំហុក ។ និយាយយ៉ាងដូច្នេះ មិនមែនជាការចោទប្រកាន់ថា វប្បធម៌បរទេសសុទ្ធតែមិនល្អទាំងអស់នោះទេ ក៏ប៉ុន្តែអ្វីដែលអាចទទួលបានពីបរទេស ក៏ត្រូវតែទទួលយក ដោយមិនមែនទទួលយកទាំងឬសទាំងគល់នោះទេ គឺត្រូវទទួលយកក្នុងការវិភាគគ្រប់ជ្រុងជ្រោយ ដើម្បីភាពជឿនលឿននិងការរីកចំរើនទាន់សម័យ ក្នុងព្រំដែនមួយ គឺសម័យមិនមែនបរទេស តែបូរាណមិនមែនអន់ថយ ។
លោកស្រី យូ សុភា មានប្រសាសន៍ទៀតថា យើងទាំងអស់គ្នាត្រូវតែចងចាំ បុព្វបុរសដូនតាខ្មែរបានកសាងនិងបន្សល់ទុកបេតិកភណ្ឌទាំងរូបីនិងអរូបី សិល្បៈ វប្បធម៌ ប្រពៃណី សម្រាប់កូនចៅខ្មែរមកដល់ជំនាន់នេះ តើកូនខ្មែរជំនាន់បច្ចប្បន្ន បានធ្វើអ្វីខ្លះហើយ សម្រាប់កូនចៅខ្មែរនៅជំនាន់នៃសម័យកាលអនាគត ។
តាមការកំណត់របស់ក្រសួងវប្បធម៌និងវិចត្រសិល្បៈ លើគ្រប់បណ្តាវិញ្ញាសារប្រឡង មានតែបេក្ខជននិងបេក្ខនារីជាប់ចំណាត់ថ្នាក់លេខ១ប៉ុណ្ណោះ ដែលមានឱកាសបានចូលរួមបន្តការប្រកួតប្រជែងនៅរាជធានីភ្នំពេញ ក្នុងមហោស្រពសិល្បៈចម្រៀងខ្មែរជាសាកលថ្នាក់ជាតិ នាពាក់កណ្តាលខែតុលា ឆ្នាំ២០១៩ ។
ព័ត៌មានជាតិ ថ្មីៗ
គួរឲ្យដឹងដែរថា លទ្ធផលដែលមហោស្រព ដែលទទួលបានរួមមាន លើវិញ្ញាសារចម្រៀងសម័យ ផ្នែកបុរសបានទៅលើបេក្ខជន អូន សុខាណារិទ្ធ ពាក់ស្លាកលេខ១ ផ្នែកនារីបានទៅលើបេក្ខនារី សួន សីហា ពាក់ស្លាកលេខ១២ លើវិញ្ញាសារចម្រៀងប្រពៃណីក្នុងនោះមានចម្រៀងបាសាក់ផងដែរ ផ្នែកបុរសបានទៅលើបេក្ខជន ផន ចាន់ធឿន ពាក់ស្លាកលេខ២៤ ផ្នែកនារីបានទៅលើបេក្ខនារី សំ សុខា ពាក់ស្លាកលេខ ២៥ ៕
អត្ថបទ និង រូបភាព ៖ ងិន គឹមឡេង
កែសម្រួល៖ អ៊ុន ណារាជ្យ
