កាលពីពេលថ្មីៗកន្លងទៅនេះ អាជ្ញាធរឃុំកែវពណ៌ ស្រុកពួក បានដឹកនាំប្រជាពលរដ្ឋក្នុងសហគមន៍មេជ្រៃប្រមាណជិត៣០០នាក់ ចូលរួមក្នុងកម្មវិធីសម្អាតបរិស្ថាននៅតំបន់ជុំវិញវត្តមេជ្រៃ ជាពិសេសការរើសសម្អាតសំរាមប្លាស្ទិក ដែលពួកគាត់យល់ថា ជារនាំងខណ្ឌមិនឱ្យអ្នកទេសចរចូលមកកាន់សហគមន៍របស់ខ្លួន ។
លោក សាម ឈឿយ មេឃុំកែវពណ៌ បានឲ្យដឹងថា សហគមន៍មេជ្រៃនេះមានភូមិសាស្ដ្រជាប់បឹងទន្លេសាប ហើយក៏ជាតំបន់លិចទឹកមួយ ដែលភ្ញៀវជាតិ និង អន្តរជាតិ តែងតែធ្វើដំណើរចូលមកទស្សនាកំសាន្តជារៀងរាល់ថ្ងៃផងដែរ ជាពិសេសនៅពេលរដូវវស្សា ប៉ុន្តែកន្លងមក បញ្ហាសំរាមប្លាស្ទិក បានកើតមានឡើងនៅតំបន់នេះ ដែលបានធ្វើឲ្យប៉ះពាល់ដល់បរិស្ថានក្នុងតំបន់ រួមទាំងការប៉ះពាល់ដល់អារម្មណ៍របស់អ្នកទេសចរផងដែរ ខណៈសំរាមប្លាស្ទិកនេះ កំពុងក្លាយជាបញ្ហាដ៏ឈឺក្បាលសម្រាប់ពិភពលោក ព្រោះបានធ្វើឱ្យប៉ះពាល់ធ្ងន់ធ្ងរទាំងបរិយាកាសនិងជីវចម្រុះ ហើយវាមានអាយុកាលរាប់រយឆ្នាំនៅលើភពផែនដីនេះ ។
លោក សាម ឈឿយ បានឲ្យដឹងបន្ថែមថា សហគមន៍នេសាទនេះ តែងពឹងអាស្រ័យផលខ្លាំងលើផលនេសាទ ខណៈសព្វថ្ងៃនេះដោយសារធនធានធម្មជាតិកាន់តែតិចទៅៗ ធ្វើឱ្យសហគមន៍ទាំងនោះងាកមើលឱកាសផ្សេងទៀតដើម្បីអភិវឌ្ឍន៍ជីវភាពពួកគេ គឺការរៀបចំជាតំបន់ទេសចរឲ្យកាន់តែមានភាពទាក់ទាញ ដូច្នេះពេលនេះ យើងបានចាប់ផ្តើមផែនការពីមួយជំហានទៅមួយជំហាន ក្នុងបំណងដើម្បីលុបបំបាត់សំរាម និងអប់រំឱ្យប្រជាពលរដ្ឋ ឲ្យយល់ដឹងពីការទុកដាក់សំរាម ព្រោះថា ប្រសិនណាបរិស្ថាននៅតំបន់របស់ខ្លួនស្អាត នោះនឹងអាចទាញទេសចរកាន់តែច្រើនចូលមកកម្សាន្តក្នុងសហគមន៍ដែលមានភូមិសាស្ដ្រជាប់បឹងទន្លេសាបមួយនេះ ។
លោកមេឃុំកែវពណ៌ បានឲ្យដឹងទៀតថា ការអប់រំអំពីការថែរក្សាបរិស្ថាន មិនមែនជារឿងងាយស្រួលប៉ុន្មានទេ ហើយក៏មិនអាចធ្វើតែឯកឯងបានដែរ ដែលក្នុងនោះ ត្រូវការការចូលរួមពីប្រជាពលរដ្ឋ និងផ្សព្វផ្សាយឱ្យបានទូលំទូលាយពីកិច្ចការទាំងនេះ ដើម្បីឱ្យសហគមន៍មួយមានបរិស្ថានស្អាត និងជាទីទស្សនារបស់ភ្ញៀវទេសចរ ខណៈកន្លងមកខាងឃុំខ្វះខាតធនធានក្នុងការកៀងគរប្រជាពលរដ្ឋចូលរួមសម្អាតបរិស្ថាននេះ ប៉ុន្តែកម្មវិធីនៅពេលនេះ ជាចំណុចចាប់ផ្តើមមួយដ៏ល្អ ដើម្បីបញ្ជ្រាបចំណេះដឹងដល់ពលរដ្ឋទៅលើបញ្ហាបរិស្ថាន និង ប្រែក្លាយសហគមន៍របស់ខ្លួន កា្លយជាគោលដៅអេកូទេសចរណ៍ដ៏ទាក់ទាញដូចតំបន់កំពង់ភ្លុក , តំបន់កំពង់ឃ្លាំង និងតំបន់ចុងឃ្នៀសផងដែរ។
លោក សាម ឈឿយ មេឃុំកែវពណ៌ បានឲ្យដឹងបន្ថែមទៀតថា សហគមន៍មេជ្រៃ ស្ថិតនៅប៉ែកខាងត្បូងស្រុកពួក និង ប៉ែកខាងលិចនៃក្រុងសៀមរាប មានភូមិសាស្ដ្រជាប់បឹងទន្លេសាប និង ជាតំបន់មានផ្ទះលិចទឹក ប៉ុន្តែតំបន់នេះនៅមិនទាន់មានការអភិវឌ្ឍច្រើននៅឡើយ បើយើងធៀបនឹងតំបន់កំពង់ឃ្លាំង កំពង់ភ្លុក និងតំបន់ចុងឃ្នៀសជាដើម ហើយភ្ញៀវទេសចរមួយចំនួន ទៅកម្សាន្តនៅតំបន់នេះនៅរដូវទឹកទន្លេសាបឡើងធំ ព្រោះងាយស្រួលធ្វើដំណើរតាមទូក រីឯក្នុងរដូវប្រាំងហេដ្ឋារចនាសម្ព័ន្ធមានភាពលំបាកបន្ដិច ហើយដោយសារហេដ្ឋារចនាសម្ព័ន្ធនៅទីនេះមិនទាន់ល្អ ទើបធ្វើឱ្យសហគមន៍របស់លោកមិនអាចទាញប្រយោជន៍បានច្រើនពីវិស័យទេសចរណ៍ ។
លោក ស៊ា សុផល ប្រធានអង្គការទំពាំងស្នងឫស្សី ដែលបានសម្របសម្រួលសហការជាមួយអាជ្ញាធរឃុំកែវពណ៌ក្នុងកម្មវិធីសម្អាតបរិស្ថាននេះ បានឱ្យដឹងថា រដូវប្រាំងនៅឆ្នាំនេះបានអូសបន្លាយយូរ ទើបលោកមានពេលវេលាសមរម្យក្នុងការរៀបចំកម្មវិធីសម្អាតនៅសហគមន៍មេជ្រៃនេះ ព្រោះមេជ្រៃ ក៏ស្ថិតក្នុងគម្រោងធំរបស់អង្គការលោកដែរ ដើម្បីឱ្យបរិស្ថាននៅបឹងទន្លេសាបស្អាត ហើយបញ្ហាបរិស្ថានជាចំណុចក្ដៅរបស់សហគមន៍នេះ ប្រសិនបើបរិស្ថានស្អាត ការរស់នៅរបស់អ្នកភូមិក៏មានសុខភាពល្អ ប្រសិនបើបរិស្ថានស្អាត តំបន់អេកូទេសចរណ៍នៅទីនេះក៏ទាក់ទាញទេសចរបានកាន់តែច្រើនបន្ថែមទៀត ៕
អត្ថបទ និង រូបថត ៖ លោក ម៉ាត់ អារីហ្វីន
កែសម្រួលអត្ថបទ ៖ លោក លីវ សាន្ត
