ស្រូវពូជសែនក្រអូប និង ស្រូវខា១៥ របស់វិទ្យាស្ថានស្រាវជ្រាវដំណាំស្រូវអន្តរជាតិ ជាអំណោយរបស់ក្រសួងកសិកម្ម រុក្ខាប្រមាញ់ និង នេសាទ រួមទាំងជីសញ្ញាក្បាលក្របី ត្រូវបានចែកជូនដល់បងប្អូនប្រជាកសិករចំនួន៥០គ្រួសារមកពី៦ភូមិ ក្នុងឃុំសំរោងយា ស្រុកពួក ខេត្តសៀមរាប នាព្រឹកថ្ងៃទី០៤ ខែកញ្ញា ឆ្នាំ២០១៩នេះ ដែលក្នុងមួយគ្រួសារទទួលបានស្រូវពូជ១០០គីឡូក្រាម និង ជី ២៥ គីឡូក្រាម តាមរយៈមន្ទីរកសិកម្មរុក្ខាប្រមាញ់និងនេសាទខេត្តសៀមរាប ព្រមទាំងបានធ្វើការបង្ហាញនូវបច្ចេកទេសការព្រោះស្រូវ តាមរយៈឧបករណ៍ កសិកម្ម ដែលប្រើប្រាស់គ្រាប់ពូជតិច ហើយទទួលផលខ្ពស់ ស្ថិតនៅវាលស្រែក្នុងភូមិតាជេត ក្នុងឃុំសំរោងយា ។
លោក ស៊ិន ចាន់ថុល អភិបាលស្តីទីស្រុកពួក បានបញ្ជាក់ថា ដោយការទទួលនូវរបបទឹកភ្លៀងមានកម្រិតទាបជាងឆ្នាំមុន ជាហេតុធ្វើឲ្យមានផលប៉ះពាល់ដល់ដំណាំស្រូវ ដោយគ្រោះរាំងស្ងួត ទូទាំងស្រុកពួកសរុបជាង ២ពាន់ហិកតា ក្នុងនោះនៅឃុំសំរោងយា បានទទួលរងគ្រោះចំនួន ១៦០ហិចតាផងដែរ ។
លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់និងនេសាទខេត្តសៀមរាប បានបញ្ជាក់ថា ស្រូវពូជទាំងនេះ ជាប្រភេទពូជស្រូវអាចដាំដុះបានដោយមិនប្រកាន់រដូវ មានអាយុកាលនៃការដាំដុះរហូតដល់បានទទួលផល ក្នុងអំឡុងពី ១១០ថ្ងៃ ទៅ ១១៥ថ្ងៃ ហើយពូជស្រូវទាំងនេះ ត្រូវបានចាត់ចែងផលិតដោយវិទ្យាស្ថានស្រាវជ្រាវដំណាំស្រូវអន្តរជាតិ មានគុណភាពបន្សុទ្ធពូជមិនទាបជាង៩៥ភាគរយ ធានាការដំណុះគ្រាប់មិនទាបជាង៨០ភាគរយឡើយ ខណៈដែលប្រមុខរាជរដ្ឋាភិបាលកម្ពុជា ក៏ដូចឯកឧត្តមរដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ និង អាជ្ញាធរខេត្តសៀមរាប តែងតែបានគិតដល់បងប្អូនប្រជាកសិករដែលទទួលរងគ្រោះភាពរាំងស្ងួតធ្ងន់ធ្ងរនៅក្នុងទូទាំងខេត្តសៀមរាប ពិសេសស្រុកពួកដែលរងគ្រោះខ្លាំងជាងគេ បានបញ្ចុះនូវមន្ត្រីបច្ចេកទេសជំនាញស្រូវកសិកម្ម មកធ្វើការបង្ហាត់បង្ហាញ ដើម្បីធ្វើការស្ការនូវរាល់ផលប៉ះពាល់ខូចខាតកន្លងមក ព្រមទាំងនាំមកនូវស្រូវពូជ ជូនដល់បងប្អូនទៀតផង ។
លោក ទា គឹមសុទ្ធ បានបញ្ជាក់ទៀតថា ក្រៅពីស្រូវពូជ មន្ទីរបានសហការជាមួយក្រុមហ៊ុនផ្តល់នូវជីគីមី ដើម្បីជូនបងប្អូនប្រើប្រាស់ដាក់ស្រូវ ហើយមន្ទីរកសិកម្មខេត្ត ក៏នឹងបន្តចែកជូននូវគ្រាប់ពូជដំណាំ បន្លែ ដែលជាដំណាំរួមផ្សំក្នុងការទ្រទ្រង់ជីវភាពតាមក្រុមគ្រួសារទៀតផង ប៉ុន្តែសំខាន់ សូមបងប្អូនប្រជាកសិករ ត្រូវបង្កើននូវចំណេះដឹងរបស់ខ្លួន លើការងារបង្កបង្កើនផល និង ការប្រើប្រាស់ជី ព្រមទាំងថ្នាំសម្លាប់សត្វល្អិត ឬស្មៅ និង អនុវត្តឲ្យបានត្រឹមត្រូវទៅតាមការណែនាំរបស់ក្រសួងកសិកម្ម ៕
អត្ថបទ និង រូបថត ៖ លោក ម៉ី សុខារិទ្ធ
កែសម្រួលអត្ថបទ ៖ លោក លីវ សាន្ត
