ក្នុងឱកាសចុះត្រួតពិនិត្យបច្ចេកទេស និងតាមដានការសាងសង់ ដែលកំពុងដំណើរការរៀបចំទីលានមុខប្រាសាទអង្គរវត្ត (Angkor Wat Parvis) នាព្រឹកថ្ងៃទី០៤ ខែកញ្ញា ឆ្នាំ២១០៩នេះ លោក យិត ចាន់ដារដ្ឋ អគ្គនាយករង និងជាតំណាងដ៏ខ្ពង់ខ្ពស់របស់ឯកឧត្តម ហង់ ពៅ អគ្គនាយក នៃអាជ្ញាធរជាតិអប្សរា មានប្រសាសន៍ថា អាជ្ញាធរជាតិអប្សរា មានគម្រោងសំណង់មួយចំនួន ស្ថិតនៅពីមុខ និងខាងលិចប្រាសាទអង្គរវត្ត ក្នុងគោលបំណងលើកតម្លៃរមណីយដ្ឋានអង្គរ ឱ្យមានបរិស្ថានល្អស្អាត កាត់បន្ថយផលប៉ះពាល់អវិជ្ជមាននានាលើប្រាសាទ ទេសភាព និងធម្មជាតិ រក្សាបាននូវសណ្តាប់ធ្នាប់របៀបរៀបរយ និងភាពថ្លៃថ្នូរក្នុងការប្រកបមុខរបររបស់បងប្អូនប្រជាពលរដ្ឋ ។
លោក យិត ចាន់ដារដ្ឋ បានបញ្ជាក់បន្ថែមថា ផ្នែកសំខាន់ៗនៃគម្រោងនេះរួមមាន៖ សាងសង់ចំណតយានយន្តគ្រប់ប្រភេទ (បានសាងសង់រួចរាល់) , កន្លែងបដិសណ្ឋារកិច្ច និងផ្តល់ព័ត៌មាន , កន្លែងផ្ញើអីវ៉ាន់ , កន្លែងសម្រាករង់ចាំ , កន្លែងលក់ដូរសម្រាប់ប្រជាពលរដ្ឋដែលមានតូបលក់ដូរស្រាប់ពីមុន , សាលពិព័រណ៍ , សារមន្ទីរលំហ និង កន្លែងអាជីវកម្មដែលមានស្តង់ដារអន្តរជាតិ ជាដើម ដែលគម្រោងនេះនឹងបញ្ចប់ទាំងស្រុងក្នុងរយៈពេល១២ខែ ។
ក្នុងឱកាសនោះដែរ លោក យិត ចាន់ដារដ្ឋ បានណែនាំ និង ជំរុញដល់ក្រុមការងារ នៅការដ្ឋានសាងសង់ ត្រូវបង្កើនការងារឱ្យបានទាន់ពេលវេលា និងគោរពតាមបទដ្ឋានបច្ចេកទេស នៃផែនការមេ ដោយរក្សាបាននូវគុណតម្លៃផ្នែកបេតិកភណ្ឌ ទាំងផ្នែកវប្បធម៌ និងបរិស្ថាន ។
ព័ត៌មានជាតិ ថ្មីៗ
សូមបញ្ជាក់ថា កន្លងមកអាជ្ញាធរជាតិអប្សរា និងរដ្ឋាភិបាលស្វីស បានកសាងទីលានមុខប្រាសាទបន្ទាយស្រីមួយ ធ្វើជាគម្រូរួចមកហើយ និងបានសម្ពោធដាក់ឱ្យដំណើរការតាំងពីថ្ងៃទី១៦ ខែមីនា ឆ្នាំ២០០៩ មកម្លេះ ៕
អត្ថបទ និង រូបថត ៖ លោក ម៉ាត់ អារីហ្វីន
កែសម្រួលអត្ថបទ ៖ លោក លីវ សាន្ត
