សមត្ថកិច្ចខេត្តសៀមរាប អនុញ្ញាតឲ្យសិប្បកម្មដ្ឋានផលិតនំនៅឃុំកន្ទ្រាំង ស្រុកប្រាសាទបាគង ដំណើរការឡើងវិញ ក្រោយពិនិត្យឃើញថានំដែលផលិត គឺតាមស្តង់ដារ ទាំងផ្នែកគីមីសាស្ត្រ និងជីវសាស្ត្រ

តាមប្រភពពីបណ្ដាញទំនាក់ទំនងសង្គម ( Facebook ) ផ្លូវការរបស់រដ្ឋបាលខេត្តសៀមរាប បានឲ្យដឹងថា បន្ទាប់ពីមានការចុះផ្សាយជាបន្តបន្ទាប់លើករណីពុលនំប៉័ងនៅឃុំឃុនរាម ស្រុកបន្ទាយស្រី កាលពីថ្ងៃទី១៦ ខែសីហា ឆ្នាំ២០១៩ ហើយដែលអ្នកលក់ចែកចាយបន្តបានទិញពីសិប្បកម្មផលិត នៅឃុំកន្ទ្រាំង ស្រុកប្រាសាទបាគង និង ក្រោយកើតហេតុមក កម្លាំងសមត្ថកិច្ចនគរបាលប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តសៀមរាប , មន្ទីរឧស្សាហ កម្ម និងសិប្បកម្មខេត្តសៀមរាប និងសមត្ថកិច្ចពាក់ព័ន្ធ បានធ្វើកោសល្យវិច្ច័យយ៉ាងយកចិត្តទុកដាក់ ព្រមទាំងបានផ្អាកកន្លែងផលិតបណ្តោះអាសន្នផងដែរ និងដើម្បីយកសំណាកនំទៅពិនិត្យនៅមន្ទីរពិសោធន៍។

ប្រភពដដែលបានឲ្យដឹងទៀតថា បន្ទាប់មក មន្ទីរឧស្សាហកម្ម និងសិប្បកម្មខេត្តសៀមរាប បានយកសំណាកនំនោះ ទៅពិនិត្យនៅមន្ទីរពិសោធន៍ នៅមជ្ឈមណ្ឌលមន្ទីរពិសោធន៍ឧស្សាហកម្មកម្ពុជា លើផ្នែកគីមីសាស្ត្រ និងជីវសាស្ត្រ ដែលជាលទ្ធផលបានបង្ហាញថា នំដែលផលិតនេះ គឺតាមស្តង់ដារ ដែលអាចបរិភោគបាន ហើយជាមួយគ្នានេះ មន្ត្រីជំនាញខាងមន្ទីរឧស្សាហកម្ម និងសិប្បកម្មខេត្ត ក៏បានសន្និដ្ឋានដូចគ្នានឹងការសន្និដ្ឋានរបស់មន្ត្រីមន្ទីរសុខាភិបាលខេត្ត គឺការពុលនេះបណ្តាលមកពីអ្នកលើកយកទៅលក់បន្ត ទុកដាក់នំមិនបានល្អ មិនមានអនាម័យ នាំឲ្យនំនោះជូរផ្អូម និងខូចគុណភាព ។

រដ្ឋបាលខេត្តសៀមរាប សូមស្នើឲ្យគ្រប់ការផ្សព្វផ្សាយ គួរបានស្វែង រកព័ត៌មានឲ្យបានគ្រប់គ្រងជ្រោយ ជៀសវាងនាំឲ្យមានការភាន់ច្រឡំពីសាធារណៈមតិ ហើយជាមួយគ្នានេះ ចំពោះសិប្បកម្មដ្ឋាន ឬអាហារដ្ឋាននានា ឬអាជីវករលក់ដូរគ្រឿងឧបភោគបរិភោគទាំងអស់ សូមយកចិត្តទុកដាក់លើបញ្ហាសុវត្ថិភាពចំណីអាហារ និងអនាម័យ ជៀសវាងផលប៉ះពាល់ដល់អ្នកបរិភោគ ៕