ដោយមានការសហការគាំទ្រពីអង្គការ UNICEF នៅថ្ងៃទី០៥ ខែកញ្ញា ឆ្នា២០១៩នេះ ក្រសួងសង្គមកិច្ច អតីតយុទ្ធជន និងយុវនីតិសម្បទា បានបើកវគ្គបណ្ដុះបណ្ដាលមួយនៅខេត្តសៀមរាប មានរយៈពេល២ថ្ងៃ ចាប់ពីថ្ងៃទី០៥ ដល់ថ្ងៃទី០៦ខែកញ្ញា ជូនដល់ភ្នាក់ងារសង្គមកិច្ច ស្តីពី ការងារសង្គមកិច្ចទាក់ទងនឹងអនីតិជនទំនាស់នឹងច្បាប់ ដោយផ្តោតសំខាន់ទៅលើការងារសង្គមកិច្ច និងការគ្រប់គ្រងករណី ការពិភាក្សាលើការបង្កើតទម្រង់របាយការណ៍ស្តីពីការប៉ាន់ប្រមាណសុខុមាលភាព និងស្ថានភាពសង្គមកិច្ចរបស់អនីតិជន និងការតាក់តែងមេរៀនសម្រាប់បង្រៀនបន្តដល់ថ្នាក់ស្រុក ដើម្បីឆ្លើយតបទៅនឹងតម្រូវការរបស់អនីតិជនទំនាស់នឹងច្បាប់ ស្របតាមបទដ្ឋានជាតិ អន្តរជាតិ សំដៅទប់ស្កាត់ ការប្រព្រឹត្តបទល្មើស របស់អនីតិជន និង ដើម្បីឧត្តមប្រយោជន៍របស់អនីតិជន ដែលត្រូវបានដកហូតសេរីភាព ។
វគ្គបណ្ដុះបណ្ដាលនេះ បានប្រព្រឹត្ថទៅ ក្រោមអធិបតីភាពឯកឧត្ដម ជា ចំណាន អនុរដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា និង តំណាងឯកឧត្ដម វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ដោយមានការចូលរួមសំណាក់លោក លោកស្រី ជាមន្ត្រីមកពីមន្ទីរសង្គមកិច្ច អតីតយុទ្ធជននិងយុវនីតិសម្បទា រាជធានី-ខេត្តចំនួន១២ រួមមាន៖ រាជធានីភ្នំពេញ , ខេត្តសៀមរាប , ស្ទឹងត្រែង , កំពង់ធំ , ព្រះវិហារ , ឧត្តរមានជ័យ , បន្ទាយមានជ័យ , បាត់ដំបង , ប៉ៃលិន , ពោធិសាត់ , កំពង់ឆ្នាំ និងខេត្តកំពង់ស្ពឺ ។
លោក អោ ម៉ៅ ប្រធានមន្ទីរសង្គមកិច្ចអតីតយុទ្ធជន និងយុវនីតិសម្បទាខេត្តសៀមរាប បានឲ្យដឹងថា វគ្គបណ្តុះបណ្តាលនាពេលនេះ គឺជាលើកទី២ហើយ ដែលក្រសួងបានរៀបចំឡើង ដើម្បីពង្រឹងសមត្ថភាពភ្នាក់ងារសង្គមកិច្ចដែលបានតែងតាំងចងក្រងគោលបំណងត្រីមាស ក្នុងការអនុវត្តច្បាប់ស្តីពីយុត្តិធម៌អនីតិជន ខណៈដែលច្បាប់ស្ដីពីយុត្តិធម៌អនីតិជន ជាប្រព័ន្ធយុត្តិធម៌ទំនើបមួយ ដែលផ្ដោតសំខាន់ទៅលើការបង្វែរ ដែលតម្រូវឱ្យមានការពិចាណានៅគ្រប់ដំណាក់កាលនៃនីតិវិធី ជាពិសេសដំណាក់កាលមន្ត្រីនគរបាលយុត្តិធម៌ ហើយការឃុំខ្លួនជាជម្រើសចុងក្រោយ និងមានរយៈពេលខ្លីបំផុត ។
ឯកឧត្ដម ជា ចំណាន បានបញ្ជាក់ថា ក្រសួងសង្គមកិច្ច បានព្យាយាមបញ្ចៀសអនីតិជនទំនាស់នឹងច្បាប់ ចេញពីនីតិវិធីផ្លូវការរបស់តុលាការ ដើម្បីកុំឱ្យជាប់ក្នុងបញ្ជីថ្កោលទោលផងដែរ ហើយជាមួយគ្នានេះ ភ្នាក់ងារសង្គមកិច្ច ត្រូវមានវត្តមាននៅគ្រប់ដំណាក់កាល ចាប់តាំងពីដំណាក់កាលនគរបាលយុត្តិធម៌ឡើងទៅ ហើយវត្តមានរបស់ភ្នាក់ងារសង្គមកិច្ចនេះ គឺដើម្បីផ្តល់ការគាំទ្រផ្លូវចិត្ត សេវាសង្គមចាំបាច់នានា និងធ្វើរបាយការណ៍ប៉ាន់ប្រមាណស្តីពីសុខុមាលភាព និងស្ថានភាពសង្គមរបស់អនីតិជន ដូច្នេះក្នុងឱកាសនេះ សុំឱ្យសិក្ខាកាមទាំងអស់ យកចិត្តទុកដាក់ស្តាប់ កត់ត្រា និង លើកជាសំណួរ ដើម្បីទទួលបានចំណេះដឹង និងបទពិសោធន៍ល្អៗបន្ថែមទៀត ទាក់ទងនឹងការងារសង្គមកិច្ច ដែលគ្រូឧទ្ទេស នឹងធ្វើបទបង្ហាញជូននៅពេលនេះ ៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
