ទីភ្នាក់ងារព័ត៌មានចិនស៊ិនហួ បានចុះផ្សាយនៅរាត្រីថ្ងៃទី៤ ខែកញ្ញា ឆ្នាំ២០១៩ថា ប្រព័ន្ធផ្សព្វផ្សាយក្នុងស្រុកឥណ្ឌា បានរាយការណ៍ថា មានចំនួនអ្នកស្លាប់ដោយសារផ្ទុះឆេះរោងចក្រផលិតកាំជ្រួចមួយកន្លែង នៅរដ្ឋ Punjab ភាគខាងជើងនៃប្រទេសឥណ្ឌា បណ្តាលឲ្យស្លាប់មនុស្សរហូតដល់១៧នាក់ ។
សារព័ត៌មានជាតិ របស់ឥណ្ឌា The Hindustan Times បានរាយការណ៍ឲ្យដឹងថា ឧប្បត្តិហេតុបានកើតឡើងនៅក្នុងតំបន់ Batala ស្រុក Gurdaspur នៅរដ្ឋ Punjab ។
ក្រុមការងារឆ្លើយតបនឹងគ្រោះមហន្តរាយជាតិ និងកងកម្លាំងទទួលខុសត្រូវគ្រោះមហន្តរាយរដ្ឋ នឹងត្រូវដាក់ពង្រាយសម្រាប់ប្រតិបត្តិការជួយសង្គ្រោះ ។
លោក Amarinder Singh រដ្ឋមន្ត្រីប្រចាំរដ្ឋ Punjab បានលើកឡើងនៅលើបណ្តាញសង្គម Twitter ថា “នេះជាការសោកស្តាយជាពន់ពេក ចំពោះករណីផ្ទុះបណ្តាលឲ្យសម្លាប់មនុស្សនៅក្នុងរោងចក្រផលិតកាំជ្រួច នៅតំបន់ Batala ” ។
យោងតាមសេចក្តីរាយការណ៍ដំបូង បានឲ្យដឹងថា មនុស្សប្រមាណ៥០នាក់ មានភាពភ័យខ្លាច ខណៈនៅជាប់គាំងនៅក្នុងពេលផ្ទុះនោះ ។
ប្រភព ៖ដើមអំពិល
ប្រែសម្រួលដោយ៖ ម៉ៅ បុប្ផាមករា
កែសម្រួលដោយ ៖ សេង ផល្លី
