ឯកឧត្តម លីវ សុខុន ទីប្រឹក្សាក្រសួងព័ត៌មាន និង ជាប្រធានមន្ទីរព័ត៌មានខេត្តសៀមរាប បានឲ្យដឹងថា ក្រោយពីទទួលដំណឹងតាមរយៈការចុះផ្សាយរបស់គេហទំព័រនិងទូរទស្សន៍ជាតិខេត្តសៀមរាប រៀបរាប់ពីការលំបាក និងការសុំការឧបត្ថម្ភពីសប្បុរជនរបស់មេម៉ាយទីទ័លក្រផ្ទុកមេរោគ និងពិការភ្នែកនៅភូមិអញ្ចាញ ក្នុងក្រុងសៀមរាប និង តបតាមការអំពាវនាវសុំជំនួយសប្បុរសធម៌ កាលពីពេលថ្មីៗនេះ លោក ហឿន សំនៀង នាយករងខុទ្ឋកាល័យ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការនិងដឹកជញ្ជូន និងជាអគ្គនាយករង នៃអគ្គនាយកដ្ឋានរដ្ឋបាល ហិរញ្ញវត្ថុ ក្រសួងសាធារណ:ការនិងដឹកជញ្ជូន បានឧបត្ថម្ភនូវថវិកាចំនួន៥០ម៉ឺនរៀល ដើម្បីជួយសម្រួលដល់ទុក្ខលំបាករបស់ក្រុមគ្រួសារអ្នកស្រី ឈ្មោះ សុខ សំណាង មានអាយុ៤៥ឆ្នាំ មានកូនម្នាក់ និង ម្ដាយចាស់ជរា អាយុ៧០ឆ្នាំ ក្នុងបន្ទុក ដែលសុំផ្ទះគេស្នាក់នៅស្ថិតនៅភូមិអញ្ចាញ ។
ឯកឧត្តម លីវ សុខុន បានឲ្យដឹងទៀតថា អំណោយសប្បុរសធម៌របស់លោក ហឿន សំនៀង ជាថវិកាចំនួន៥០ម៉ឺនរៀលនេះ ត្រូវបានឯកឧត្តម និង ក្រុមការងារមន្ទីរព័ត៌មានខេត្តសៀមរាប យក ទៅជូនដោយផ្ទាល់ដៃនៅទីកន្លែងរស់នៅផ្ទាល់របស់អ្នកស្រី សុខ សំណាង នាព្រឹកថ្ងៃទី០៥ ខែកញ្ញា ឆ្នាំ២០១៩ ។
ក្នុងឱកាសនោះដែរឯកឧត្តម លីវ សុខុន បានពាំនាំនូវការសាកសួរសុខទុក្ខ និង អាណិតអាសូរពីសំណាក់លោក ហឿន សំនៀង ដែលជានិច្ចជាកាលលោកតែងតែចូលរួមជួយក្នុងការងារមនុស្សធម៌ និងផ្តល់ជូនដល់ទៅតាមលទ្ឋភាពដែលអាចធ្វើបាន ជួយឧបត្ថម្ភទោះតិចតួចក្តី ដល់គ្រួសារក្រីក្រនិងជនរងគ្រោះដោយឧប្បត្តិហេតុផ្សេងៗទៅតាមភាពជាក់ស្តែង ខណៈកន្លមកលោក ហឿន សំនៀង ធ្លាប់បានជួយឧបត្ថម្ភដល់យុវជនពីររូប រស់នៅភូមិផ្លូវលាវ ឃុំប្រាសាទ ស្រុកព្រះនេត្រព្រះ ខេត្តបន្ទាយមានជ័យ ជាគ្រួសារក្រីក្រ ហើយយុវជនត្រូវខ្សែភ្លើងឆក់ធ្លាក់ខ្លួនពិការមួយជីវិត និងយុវជនម្នាក់ទៀតរស់នៅភូមិទន្លាប់ ឃុំប្រាសាទ ស្រុកព្រះនេត្រព្រះ ខេត្តបន្ទាយមានជ័យ ពិការជើងទាំងពីរ និងដៃស្តាំ តាំងពីកំណើត ហើយគ្រួសារក្រីក្រទៀត ។
ព័ត៌មានជាតិ ថ្មីៗ
បើតាមការរៀបរាប់របស់អ្នកស្រី សុខ សំណាង បានឲ្យដឹងថា អ្នកស្រី បានខិតខំប្រឹងតស៊ូរស់នៅជាមួយកូនម្នាក់ និង ម្ដាយចាស់ជរាម្នាក់វ័យ ៧០ឆ្នាំ ដោយគ្មានផ្ទះសម្បែងតាំងពីឆ្នាំ២០០៣មក ដែលបច្ចុប្បន្នសុំខ្ទមចាំដីលោកតាម្នាក់ សម្រាប់ស្នាក់អាស្រ័យ ដែលស្ថិតក្នុងភូមិអញ្ចាញ សង្កាត់នគរធំ ក្រុងសៀមរាប ទោះជាលំបាកយ៉ាងណាក៏ដោយ ក្រុមគ្រួសារអ្នកស្រី និងអ្នកស្រី មិនបានដើរសុំទានគេ ដើម្បីយកប្រាក់មកទិញចំណីអាហារប្រចាំថ្ងៃឡើយ ។
អ្នកស្រី បានរំលឹកពីប្រវត្តិគ្រួសារថា បន្ទាប់ពីប្ដីអ្នកស្រីបានស្លាប់ទៅ អ្នកស្រីបានធ្លាក់ខ្លួនឈឺ ហើយក៏បានទៅពិនិត្យសុខភាព ទើបដឹងថាខ្លួនបានឆ្លងមេរោគអេដស៍ពីប្ដី ពេលនោះអ្នកស្រីបានឈប់ធ្វើការពីរោងចក្រនៅរាជធានីភ្នំពេញ និងបានមករស់នៅខេត្តសៀមរាបក្នុងឆ្នាំ២០០៣ ដែលនៅពេលនោះ អ្នកស្រីក៏បានទៅទទួលសេវាព្យាបាលពីមន្ទីរពេទ្យបង្អែកខេត្តសៀមរាប ដើម្បីទទួលថ្នាំប្រឆាំងមេរោគអេសដ៍ ជាអកុសលនៅឆ្នាំ២០០៧ អ្នកស្រី បានធ្លាក់ខ្លួនពិការភ្នែកទាំងសងខាងទៅ រីឯបងប្អូនអ្នកស្រីនៅខេត្តផ្សេង មានជីវភាពលំបាក ពុំមានលទ្ធភាពជួយអ្នកស្រីទេ ។
អ្នកស្រី សុខ សំណាង បានរៀបរាប់ទៀតថា៖ កន្លងមក អ្នកស្រីក៏ធ្លាប់ទាក់ទងទៅអាជ្ញាធរមូលដ្ឋាន និងមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តសៀមរាប ដើម្បីសុំដីសង់លំនៅដ្ឋានផងដែរ តែអាជ្ញាធរថា ពុំមានដីនោះទេ ហើយតាមរយៈឯកឧត្តម លីវ សុខុន ដែលកំពុងមានវត្តមាននាពេលនេះ សូមសំណូមពរដល់ឯកឧត្តម ជា ច័ន្ទបរិបូរណ៍ រដ្ឋលេខាធិការក្រសួងព័ត៌មាន និង ជាប្រធានក្រុមការងារថ្នាក់ជាតិចុះមូលដ្ឋានស្រុកក្រឡាញ់ និង ឯកឧត្តម ម៉ូត ទូល័ស ទីប្រឹក្សាក្រសួងព័ត៌មាន មេត្តាជួយដោះស្រាយនូវការលំបាកនេះ សម្រាប់គ្រួសារអ្នកស្រីផង ។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
