ស្ត្រីមេម៉ាយមានផ្ទុកមេរោគអេដស៍ម្នាក់ បានខិតខំប្រឹងតស៊ូរស់នៅជាមួយកូនម្នាក់ និង ម្ដាយចាស់ជរាម្នាក់វ័យ ៧០ឆ្នាំ ដោយគ្មានផ្ទះសម្បែងតាំងពីឆ្នាំ២០០៣ ស្ថិតក្នុងភូមិអញ្ចាញ សង្កាត់នគរធំ ក្រុងសៀមរាប ខេត្តសៀមរាប។ បច្ចុប្បន្នលោកស្រី សុខ សំណាង មានអាយុ៤៥ឆ្នាំ ព្រមទាំងពិការភ្នែកទាំងសងខាងទៀតផង ទោះជាលំបាកយ៉ាងណាក៏ដោយ ក្រុមគ្រួសារលោកស្រី និងលោកស្រី សុខចិត្តរកបានមួយថ្ងៃរស់មួយថ្ងៃ ក៏មិនដើរសុំទាន ដើម្បីយកប្រាក់មកទិញចំណីអាហារប្រចាំថ្ងៃឡើយ។
លោកស្រី សុខ សំណាង បានបញ្ជាក់ថា បន្ទាប់ពីប្ដីលោកស្រីបានស្លាប់ លោកស្រីបានធ្លាក់ខ្លួនឈឺ លោកស្រីក៏បានទៅពិនិត្យសុខភាព ទើបដឹងថាខ្លួនបានឆ្លងមេរោគអេដស៍ពីប្ដី។ មួយរយៈក្រោយមក លោកស្រីបានឈប់ធ្វើការនៅរោងចក្រនៅរាជធានីភ្នំពេញ និងបានមករស់នៅខេត្តសៀមរាបក្នុងឆ្នាំ២០០៣ នៅពេលនោះ លោកស្រីក៏បានទៅទទួលសេវាព្យាបាលពីមន្ទីរពេទ្យបង្អែកខេត្តសៀមរាប ដើម្បីទទួលថ្នាំប្រឆាំងមេរោគអេសដ៍ ជាអកុសលនៅឆ្នាំ២០០៧ លោកស្រី បានធ្លាក់ខ្លួនពិការភ្នែកទាំងសងខាង។
លោកស្រី បញ្ជាក់បន្ថែមថា បច្ចុប្បន្ននេះ លោកស្រីសុំខ្ទមចាំដីលោកតាម្នាក់ស្នាក់នៅ ដោយពុំមានប្រកបរបរអ្វីឡើយ គឺពឹងម្ដាយ និងកូនរកចិញ្ចឹម រីឯបងប្អូនលោកស្រីនៅខេត្តផ្សេង មានជីវភាពលំបាក ពុំមានលទ្ធភាពជួយលោកស្រីទេ ក្រៅពីនោះលោកស្រីក៏ធ្លាប់ទាក់ទងទៅអាជ្ញាធរមូលដ្ឋាន និងមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តសៀមរាប ដើម្បីរកដីសម្រាប់សង់លំនៅដ្ឋានផងដែរ តែអាជ្ញាធរថា ពុំមានដីនោះទេ។
((ឃ្លីបសំឡេងលោកស្រី សុខ សំណាង))
ដោយមានទុក្ខលំបាកដោយសារពិការភាព និងមានផ្ទុកមេរោគអេដស៍ មិនអាចប្រកបរបរចិញ្ចឹមជីវិត លោកស្រី បានជួបប្រទះបញ្ហាកង្វះខាតស្បៀងអាហារទទួលទានប្រចាំថ្ងៃ។ ជាមួយនោះ លោកស្រី សុខ សំណាង បានទាក់ទងតាមទូរសព្ទទៅ ឯកឧត្តម ជុំ កុសល ទីប្រឹក្សាសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជារដ្ឋលេខាធិការក្រសួងព័ត៌មាន ក្នុងកម្មវិធីនាទីវប្បធម៌ របស់ប៉ុស្តិវិទ្យុបាយ័ន ដើម្បីសុំជំនួយឧបត្ថម្ភ។ បន្ទាប់ពីទទួលបានដំណឹងនេះ ពីឯកឧត្តម ជុំ កុសល ជាការឆ្លើយតប នៅថ្ងៃទី១៤ ខែសីហា ឆ្នាំ២០១៩ ឯកឧត្តម ជា ចន្ទបរិបូរណ៍ រដ្ឋលេខាធិការ ក្រសួងព័ត៌មាន និង ឯកឧត្តម ម៉ូត ទូល័ស ទីប្រឹក្សាក្រសួងព័ត៌មាន តាមរយៈមន្ទីរព័ត៌មានខេត្តសៀមរាប បាននាំយកស្បៀងអាហារមួយចំនួន រួមនិងថវិកាខ្លះដើម្បីជួយសម្រួលដល់ទុក្ខលំបាករបស់ក្រុមគ្រួសារលោកស្រី។
អំណោយដែលបានចែកជូននាពេលនោះ រួមមានអង្ករ១០០គីឡូក្រាម ជាអំណោយរបស់ឯកឧត្តម ម៉ូត ទូល័ស និង ថវិកា១៥ម៉ឺនរៀល ទឹកស៊ីអីវ ១យួរ ទឹកត្រី ១យូរ ជាអំណោយរបស់ឯកឧត្តម ជា ចន្ទបរិបូរណ៍។ លើសពីនោះ ឯកឧត្តមទាំងបី ក៏នឹងខិតខំស្វែងរកសប្បុរជនបន្ថែមទៀត ដើម្បីជួយសម្រាលដល់ទុក្ខលំបាករបស់ លោកស្រី សុខ សំណាង និងក្រុមគ្រួសារផងដែរ។
អត្ថបទ និងរូបភាព៖ លោក សេង ផល្លី លោក ថៃ មករា និង លោក ខេង ឧត្តម
