ឯកឧត្តម ទៀ សីហា អភិបាលខេត្ត និងជាប្រធានគណៈកម្មាធិការគ្រប់គ្រងគ្រោះមហន្តរាយខេត្តសៀមរាប និងលោក ង៉ាន់ ភិរុណ អភិបាលរងខេត្តសៀមរាប បានដឹកនាំកម្លាំងចម្រុះរបស់ស្រុកពួក ក្រឡាញ់ និងស្រុកស្រីស្នំ ព្រមទាំងមន្ទីរពាក់ព័ន្ធចុះពិនិត្យប្រព័ន្ធធារាសាស្ត្រ និងស្រូវដែលរងផលប៉ះពាល់ ដោយគ្រោះរាំងស្ងួតក្នុងរដូវវស្សានេះ នៅស្រុកពួក ក្រឡាញ់ និងស្រុកស្រីស្នំ ខេត្តសៀមរាប នៅរសៀលថ្ងៃទី១៤ ខែសីហា ឆ្នាំ២០១៩ ។
ក្នុងការចុះពិនិត្យក្នុងភូមិសាស្ត្រទាំង៣ស្រុកនេះ ឯកឧត្តម ទៀ សីហា បានជំរុញឱ្យមន្ទីរធនធានទឹក និងឧតុនិយមខេត្ត រួមនិងមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប ពិនិត្យឱ្យអស់លទ្ធភាពក្នុងការជួយសង្គ្រោះស្រូវរបស់បងប្អូនប្រជាពលរដ្ឋឱ្យបានទាន់ពេលវេលា។ ឯកឧត្តម ក៏បានស្នើឱ្យ អាជ្ញាធរស្រុកត្រូវរាយការណ៍បន្ទាន់ រាល់បងប្អូនប្រជាពលរដ្ឋ ដែលនៅតែបន្តជួបបញ្ហាគ្រោះរាំងស្ងួតនេះ។ ម្យ៉ាងទៀត ត្រូវស្វែងរកប្រភពទឹក ដើម្បីធ្វើការបូមបង្ហូរចូលស្រែដែលរងគ្រោះ និងត្រូវត្រៀមពូជស្រូវសម្រាប់សង្គ្រោះតំបន់ដែលខូចខាត។
បន្ថែមពីលើនេះ ឯកឧត្តម អភិបាលខេត្ត ក៏បានក្រើនរំលឹក ដល់មន្ទីរអង្គភាពពាក់ព័ន្ឋ អំពីកិច្ចការពារ និងប្រុងប្រយ័ត្នខ្ពស់ផងដែរ ចំពោះបញ្ហាទឹកជំនន់ដែលអាចកើតឡើងភ្លាមៗ ទោះបីជាខេត្តយើងកើតមានគ្រោះរាំងស្ងួតអូសបន្លាយយូរក៏ដោយ។
លោក នួន គ្រឺះស្នា ប្រធានមន្ទីរធនធានទឹក និងឧត្តុនិយមបានមានប្រសាសន៍ឱ្យដឹងថា៖ នៅក្នុងទូទាំងខេត្តសៀមរាប មានផ្ទៃដីបង្កបង្កើនផលស្រូវប្រាំង និងវស្សាចំនួនជាង២០ម៉ឺនហិកតា ក្នុងនោះផ្ទៃដីដាំដុះស្រូវវស្សាមានជាង១៨ម៉ឺនហិកតា ប្រភពទឹកដែលសំខាន់គឺទឹកភ្លៀង និងប្រភពទឹកសំខាន់ៗបន្តបន្ទាប់ ជាផ្ទៃរងទឹកភ្លៀងហូរមកពីតំបន់ភ្នំដងរែក ភ្នំគូលែន ព្រមទាំងមានអាងស្ទាក់ទឹក ទំនប់ម្កាក់នៅស្រុកជីក្រែង ទំនប់ស្រែខ្វាវ និងអាងទឹកស្លែងស្ពាននៅស្រុកស្រីស្នំ។ដោយឡែក ប៉ែកខាងលើនៃស្ទឹងតូចៗមួយចំនួន នៃស្រុកខ្លះនៅភាគកណ្តាល នៃខេត្តសៀមរាប ពុំមានប្រភពទឹកហូរធ្លាក់ពីខាងលើនោះទេ ដែលនេះជាបញ្ហា យើងកំពុងជួបប្រទះនៅពេលជួបភាពរាំងស្ងួត។
លោក នួន គ្រឺះស្នា បញ្ជាក់ថា កន្លងមកមន្ទីរធនធានទឹក និងឧត្តុនិយម មានគម្រោងសិក្សា និងរៀបចំប្រព័ន្ឋធារាសាស្ត្រទាំងនេះឱ្យបាន១០០% ដើម្បីទាញយកទឹកពីប្រភពទឹកដែលមានស្រាប់ ប៉ុន្តែបច្ចុប្បន្នយើងធ្វើបានតែជាង៦០% ដោយសារថវិកាមានកម្រិតមិនឆ្លើយតបទៅនឹងគម្រោងផែនការ។ ចំពោះការសិក្សាលើប្រព័ន្ឋធារាសាស្ត្រនេះទៀតសោត គឺធ្វើតែនៅលើប្រព័ន្ឋប្រឡាយចាស់ៗ រីឯប្រឡាយណាជីកថ្មី ត្រូវសិក្សាជាមួយប្រជាពលរដ្ឋ និងសុំការឯកភាពពីគាត់។
អត្ថបទ និង រូបថត ៖ លោក យូ វង្ស និង លោក ស៊ាន សុផាត
កែសម្រួលអត្ថបទ ៖ លោក សេង ផល្លី
