នៅព្រឹកថ្ងៃទី១៥ ខែសីហា ឆ្នាំ២០១៩នេះ ឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាប ឯកឧត្តម ទៀ សីហា អភិបាលខេត្តសៀមរាប និងលោកជំទាវ ទាង អេង ទៀ សីហា អនុប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប ក្នុងនាមប្រធានប្រតិភូអាជ្ញាធរខេត្តសៀមរាប បានដឹកនាំប្រតិភូជាមន្ត្រីរាជការនៃរដ្ឋបាលខេត្ត និង ប្រតិភូសាខាកាកបាទក្រហមកម្ពុជាខេត្តសៀមរាប ចុះសួរសុខទុក្ខ និង នាំយកអំណោយមនុស្សធម៌ ជូនដល់អ្នករងគ្រោះក្នុងឧប្បត្តិហេតុអគ្គិភ័យផ្ទុះស្ថានីយលក់ហ្គាសមួយកន្លែង កាលពីម្សិលមិញ ដែលកំពុងសម្រាកព្យាបាលជំងឺនៅមន្ទីរពេទ្យបង្អែកខេត្ត និង មន្ទីរពេទ្យឯកជនក្នុងក្រុងសៀមរាប ។
ឯកឧត្តម ទៀ សីហា មានប្រសាសន៍ថា ឯកឧត្តម ពិតជាមានការសោកស្តាយខ្លាំងណាស់ចំពោះឧប្បត្តិហេតុគួររន្ធត់នេះ ដែលវាកើតចេញពីការធ្វេសប្រហែស របស់ម្ចាស់ស្ថានីយ ដូចអ្វីដែលសមត្ថកិច្ចជំនាញបានដាក់ចេញនូវវិធានការអនុវត្តចំពោះមុខរបរដែលមានហានីភ័យខ្ពស់ រួមមានស្ថានីយប្រេងឥន្ទនៈ និងស្ថានីយលក់ហ្គាសនេះជាដើម វាមិនត្រឹមតែបង្កវិនាសកម្មបំផ្លាញខ្លួនឯងប៉ុណ្ណោះទេ តែវាក៏បានបង្កឲ្យមានគ្រោះថ្នាក់សម្រាប់អ្នកដទៃផងដែរ ។
ក្នុងឱកាសនោះដែរ ឯកឧត្តម ទៀ សីហា ក៏បានសុំការអធ្យាស្រ័យផងដែរ ចំពោះព្រឹត្តិការណ៍គ្រោះថ្នាក់អគ្គិភ័យមួយនេះ ដែលឯកឧត្តមមិនបានចូលរួមចាត់ចែងអន្តរាគមន៍ដោយផ្ទាល់ ដោយសារឯកឧត្តមជាប់បំពេញការងារត្រួតពិនិត្យស្ថានភាពជួយសង្គ្រោះស្រូវស្រែប្រជាពលរដ្ឋ ដែលជួបវិបត្តិគ្រោះរាំងស្ងួតនៅស្រុកស្រីស្នំ ។
គួររំលឹកថា កាលពីវេលាម៉ោង១និង១៥នាទីរសៀល ថ្ងៃទី១៤ ខែសីហា ឆ្នាំ២០១៩នេះ មានករណីអគ្គិភ័យមួយបានកើតឡើង ដោយសារផ្ទុះធុងហ្គាសហើយឆេះ នៅហាងបញ្ចូលហ្គាសរថយន្តមួយកន្លែង ជារបស់ឈ្មោះ ឈុក ឈុនលី ភេទប្រុស អាយុ៤៨ ឆ្នាំ មុខរបរលក់ហ្គាស មានទីលំនៅបច្ចុប្បន្ន នៅភូមិគោកស្រុក ឃុំពួក ស្រុកពួក ខេត្តសៀមរាប ស្ថិតនៅតាមបណ្តោយផ្លូវលោកតាណឺយ ទល់មុខអតីតមន្ទីរពេទ្យនាគទេព ក្នុងភូមិបន្ទាយចាស់ សង្កាត់ស្លក្រាម ក្រុងសៀមរាប បណ្តាលឲ្យមនុស្សចំនួន១៣នាក់ មានស្រីចំនួន០៣នាក់ បានរងរបួស ក្នុងនោះរបួសធ្ងន់ចំនួន០៦នាក់ ។
សមត្ថកិច្ចនគរបាលខេត្តសៀមរាប បានឲ្យដឹងថា ដោយមានការយកចិត្តទុកដាក់ និង សម្របសម្រួលពីឯកឧត្តម ទៀ សីហា អភិបាលខេត្តសៀមរាប ដែលជាជំហានដំបូង ក្រោយពីកើតហេតុ ជនរងគ្រោះទាំងអស់ត្រូវបានបញ្ជូនទៅព្យាបាលជំងឺ ទាំងនៅមន្ទីរពេទ្យរដ្ឋ ពេទ្យឯកជន និងមួយចំនួនបានបញ្ជូនបន្តទៅព្យាបាលនៅប្រទេសថៃ រួមមាន ៖
១-ឈ្មោះ ABIGAIL ALEXANDER ភេទស្រី អាយុ ១៨ឆ្នាំ សញ្ជាតិអាមេរិក មុខរបរគ្រូបង្រៀនភាសាអង់គ្លេស នៅសាលា IQ កំពុងទទួលការព្យាបាលនៅរាជធានីភ្នំពេញ។
២-ឈ្មោះ ZOE ELEFTHERIOU ភេទស្រី អាយុ២២ឆ្នាំ សញ្ជាតិអង់គ្លេស មុខរបរគ្រូបង្រៀនភាសាអង់គ្លេស នៅសាលាIQ កំពុងទទួលការព្យាបាលនៅប្រទេសថៃ។
៣-ឈ្មោះ កែវ ប៉ុង ភេទប្រុស អាយុ៤៤ឆ្នាំ នៅភូមិបន្ទាយចាស់ សង្កាត់ស្លក្រាម ក្រុងសៀមរាប សម្រាកនៅមន្ទីរពេទ្យបង្អែកខេត្តសៀមរាប។
៤-ឈ្មោះ ឈាន ខុន ភេទប្រុស អាយុ២០ឆ្នាំ ជាងគំនូ នៅភូមិបន្ទាយចាស់ ទៅព្យាបាលនៅមន្ទីរពេទ្យខេត្តសុរិន្ទ ប្រទេសថៃ ។
៥-ឈ្មោះ យិន ខាន់ ភេទប្រុស អាយុ២៣ឆ្នាំ មេជាងគំនុ ភូមិបន្ទាយចាស់ សម្រាកព្យាបាលនៅមន្ទីរពេទ្យសង់តេ ក្នុងក្រុងសៀមរាប ។
៦-ឈ្មោះ ទ្រុតម៉ែ ភេទប្រុស អាយុ២១ឆ្នាំ ជាងគំនូ នៅភូមិបន្ទាយចាស់ ទៅព្យាបាលនៅមន្ទីរពេទ្យខេត្តសុរិន្ទ ប្រទេសថៃ ។
៧-ឈ្មោះ សែ សីគឹមសាន ភេទប្រុស អាយុ២១ឆ្នាំ ជាងគំនូ នៅភូមិបន្ទាយចាស់ ទៅព្យាបាលនៅមន្ទីរពេទ្យខេត្តសុរិន្ទ ប្រទេសថៃ ។
៨-ឈ្មោះ ហួត រ័ត្នមុនី ភេទប្រុស អាយុ៦៦ឆ្នាំ សមាជិកភូមិបន្ទាយចាស់ ទៅសម្រាកព្យាបាលនៅផ្ទះ។
៩-ឈ្មោះ ហូត មុន្ទីពិសាខ ភេទប្រុស អាយុ៣៥ឆ្នាំ មុខរបរនគរបាលអន្តរាគមន៍ ទៅព្យាបាលនៅមន្ទីរពេទ្យខេត្តសុរិន្ទ ប្រទេសថៃ ។
១០-ឈ្មោះ ជើងខាវដាង (ហៃ ខាវជាង)ភេទស្រី អាយុ៣២ឆ្នាំ បុគ្គលិកលក់ហ្គាស ទៅព្យាបាលនៅមន្ទីរពេទ្យខេត្តសុរិន្ទ ប្រទេសថៃ ។
១១-ឈ្មោះ មឿន គុយ ភេទប្រុស អាយុ៤១ឆ្នាំ អ្នកបើកឡានដឹកហ្គាស ទៅព្យាបាលនៅមន្ទីរពេទ្យខេត្តសុរិន្ទ ប្រទេសថៃ ។
១២.ឈ្មោះ តែម លាងហេង ភេទប្រុស អាយុ២៤ឆ្នាំ មុខរបរមន្ត្រីរាជការ នៅភូមិជ្រាវ សង្កាត់ជ្រាវ សម្រាកព្យាបាលនៅមន្ទីរពេទ្យនាគទេព ក្នុងក្រុងសៀមរាប ។
១៣-ឈ្មោះ ឡុង រិន ភេទប្រុស អាយុ៣៦ឆ្នាំ មុខរ មុខរបរលក់ស៊ុប នៅភូមិដកពោធិ៍ សង្កាត់ស្លក្រាម សម្រាកព្យាបាលនៅមន្ទីរពេទ្យនាគទេព ក្នុងក្រុងសៀមរាប ៕
អត្ថបទ និង រូបថត ៖ លោក ងិន គឹមឡេង និង លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
