សមត្ថកិច្ចនគរបាលខេត្តសៀមរាប បានឲ្យដឹងថា បន្ទាប់ពីឃាត់ខ្លួនមនុស្សចំនួន០៥នាក់ ដែលជាប់សង្ស័យពាក់ព័ន្ធនឹងករណី លួចគោ កាលពីយប់ថ្ងៃទី០៣ ខែកញ្ញា ឆ្នាំ២០១៩កន្លងទៅនេះ កម្លាំងនគរបាលព្រហ្មទណ្ឌខេត្តសៀមរាប សហការជាមួយកម្លាំងនគរបាលស្រុកប្រាសាទបាគង និង កម្លាំងនគរបាលក្រុងសៀមរាប បានស្រាវជ្រាវឃាត់ខ្លួនជនសង្ស័យមួយក្រុមបន្ថែមទៀត មានមនុស្សចំនួន០៤នាក់ កាលពីថ្ងៃទី០៤ ខែកញា ឆ្នាំ២០១៩ ម្សិលមិញនេះ រួមជាមួយនឹងរថយន្តមួយគ្រឿង ពាក់ស្លាកលេខ ភ្នំពេញ ៣A-៨២៨៤ ។
សមត្ថកិច្ចបានឲ្យដឹងទៀតថា ជនសង្ស័យទាំង០៤នាក់នេះ រួមមាន ៖
១. ឈ្មោះ ប្រាក់ សៀប ភេទប្រុស អាយុ៥៨ឆ្នាំមុខរបរកសិករ ,
២. ឈ្មោះ សីម ប៉ិច ហៅប៉ុក ភេទប្រុស អាយុ៥៧ឆ្នាំ មុខរបរកសិករ ដែលអ្នកទាំងពីរនាក់នេះមានស្រុកកំណើតភូមិគក់ ឃុំផ្ទះព្រៃ ស្រុកសំពៅមាស ខេត្តពោធិ៍សាត់ ទីលំនៅបច្ចុប្បន្នភូមិគក់ ឃុំផ្ទះព្រៃ ស្រុកសំពៅមាស ខេត្តពោធិ៍សាត់ ហើយបើតាមចម្លើយសារភាពរបស់ជនសង្ស័យទាំង០២នាក់នេះ បានបញ្ជាក់ថា ពួកគេបានធ្វើសកម្មភាពលួចក្របីនៅស្រុកពួកចំនួន០២លើក និងលួចគោចំនួន០១លើក ដែលមានបក្ខពួកសរុបចំនួន៤នាក់ ហើយបានឡើងរថយន្តឱ្យឈ្មោះ ណាត យកទៅលក់នៅខេត្តបាត់ដំបង ។
៣. ឈ្មោះ គឿម កន ភេទប្រុស អាយុ២៩ឆ្នាំ រស់នៅភូមិត្រាំពែ ឃុំត្រាំពែ ស្រុកបាកាន ខេត្តពោធិ៍សាត់ ហើយតាមចម្លើយសារភាពរបស់ជនសង្ស័យថា ខ្លួននិងបក្សពួកបានធ្វើសកម្មភាពលួចក្របីនៅស្រុកបន្ទាយស្រី រួចហើយដាក់ឡានយកទៅលក់ ។
៤. ឈ្មោះ ម៉ាត់ វណ្ណាត ហៅណាត អាយុ ៣៦ ឆ្នាំជនជាតិ ខ្មែរឥស្លាម មានមុខរបរជាងធ្មេញ មានស្រុកកំណើតភូមិចុងខ្លុង ឃុំអូសណ្ដាន់ ស្រុកក្រគរ ខេត្តពោធិ៍សាត់ ពាក់ព័ន្ធអំពើលួចមានស្ថានទម្ងន់ទោស(លួចគ្នាច្រើន) ។
សមត្ថកិច្ច បានឲ្យដឹងបន្ថែមទៀតថា តាមចម្លើយសារភាពរបស់ឈ្មោះ ម៉ាត់ វណ្ណាត បានបញ្ជាក់ថា គេធ្លាប់ធ្វើសកម្មភាពជាមួយនឹងបក្សពួកចំនួន០៧នាក់ផ្សេងទៀត មកពីខេត្តពោធិ៍សាត់ ហើយបានលួចក្របីនៅស្រុកពួកចំនួន០៣លើក ដែលក្នុងមួយលើកៗ មានចំនួន០៤ក្បាល សរុបចំនួន១២ក្បាល , លួចសរុបនៅក្នុងខេត្តសៀមរាប ចំនួន០៩លើក ក្នុងនោះមានលួចគោមួយលើក និងក្របីចំនួន០៨លើក ក្នុងពេលដែលលួចទាំង០៩លើកនេះ រូបគេបានយកទៅលក់នៅខេត្តបាត់ដំបង និងខេត្តពោធិ៍សាត់ ដោយដឹកតាមរថយន្តរបស់ខ្លួនគេផ្ទាល់ ពាក់ស្លាកលេខ ភ្នំពេញ ៣A-៨២៨៤ ។
សមត្ថកិច្ចនគរបាលខេត្តសៀមរាប បានឲ្យដឹងថា បច្ចុប្បន្ន ជនសង្ស័យនិងវត្ថុតាង ត្រូវបានសមត្ថកិច្ចកសាងសំណុំរឿង បញ្ជូនទៅសាលាដំបូងខេត្ត ដើម្បីចាត់ការតាមនីតិវិធីច្បាប់ ។
គួររំលឹកថា កាលពីវេលាម៉ោង០១:២០នាទីយប់ ឈានចូលថ្ងៃទី០៣ ខែកញ្ញា ឆ្នាំ២០១៩កន្លងទៅនេះ កម្លាំងនគរបាលព្រហ្មទណ្ឌខេត្តសៀមរាប សហការជាមួយកម្លាំងនគរបាលស្រុកប្រាសាទបាគង , ស្រុកពួក និង កម្លាំងប្រជាការពារស្រុកប្រាសាទបាគងផង បានឃាត់ខ្លួនមនុស្សចំនួន០៤នាក់ មានស្រុកកំណើតនៅខេត្តពោធិ៍សាត់ ជាប់សង្ស័យពាក់ព័ន្ធនឹងករណីលួចគោ និង សត្វគោចំនួន០៣ក្បាល ដែលដឹកដោយរថយន្តកូរ៉េមួយគ្រឿង ពណ៌ស ចំណុះបីតោនកន្លះ ពាក់ស្លាកលេខភ្នំពេញ 3C-1555 នៅចំណុចភូមិត្រាង ឃុំកណ្ដែក ស្រុកប្រាសាទបាគង ហើយក្រោយពីសាកសួរចម្លើយជនសង្ស័យទាំង០៤នាក់នេះ កម្លាំងនគរបាលស្រុកប្រាសាទបាគង បានចុះទៅឃាត់ខ្លួនជនសង្ស័យម្នាក់បន្ថែមទៀត នៅភូមិដូនំ ឃុំមានជ័យ ស្រុកប្រាសាទបាគង ខេត្តសៀមរាប ៕
អត្ថបទ និង រូបថត ៖ លោក ថាច់ ពិសុទ្ធ និង លោក ម៉ី សុខារិទ្ធ
កែសម្រួលអត្ថបទ ៖ លោក លីវ សាន្ត
