នៅព្រឹកថ្ងៃទី០៤ ខែកញ្ញា ឆ្នាំ២០១៩ នេះ លោកជំទាវ សុខ ណារ៉ូ អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប និង ជាតំណាងឯកឧត្តម ទៀ សីហា ប្រធានគណៈកម្មាធិការសាខា និងសហការី រួមទាំងមន្ត្រីនៃអនុសាខាកាកបាទក្រហមកម្ពុជាស្រុកពួក បានចុះជួបសំណេះសំណាលសាកសួរសុខទុក្ខ និងនាំយកអំណោយមនុស្សធម៌ ព្រមទាំងរទេះជនពិការចំនួន២ផង ជូនដល់ជនពិការ ចំនួន០២នាក់ នៅឃុំត្រីញ័រ ស្រុកពួក រួមមាន ៖
១- ឈ្មោះ ឈឹម ផុន ភេទប្រុស អាយុ៧៤ឆ្នាំ រស់នៅភូមិត្រីញ័រ ជាគ្រូបង្រៀនចូលនិវត្តរ៍ ដែលមានជំងឺលើសឈាមពិការមួយចំហៀងខ្លួនតាំងឆ្នាំ២០១៥ មានប្រពន្ធឈ្មោះ សាំង អ៊ីម អាយុ៦៨ឆ្នាំ មុខរបរមេផ្ទះ មានកូន៩នាក់ ក្នុងនោះស្រីចំនួន៥នាក់ ប៉ុន្តែមានគ្រួសារអស់ហើយ ដែលសព្វថ្ងៃរស់នៅជាមួយកូនស្រីពៅឈ្មោះ ឈឹម សាវរឺ មុខរបរធ្វើកម្មករនៅខេត្តសៀមរាប និង ២- ឈ្មោះ ទាត់ ម៉ៅ ភេទស្រី អាយុ៤៧ឆ្នាំ ជាស្ត្រីមេម៉ាយ រស់នៅភូមិជួយចក្រី ជាជនពិការជើងទាំង២ និង ដៃម្ខាង ហើយនិយាយពុំបានដោយសារជំងឺពេលគាត់ទៅធ្វើពលករនៅប្រទេសថៃតាំងពីឆ្នាំ២០១៧ មានកូនប្រុសម្នាក់ អាយុ១២ឆ្នាំកំពុងរៀនថ្នាក់ទី២ ពុំមានផ្ទះផ្ទាល់ខ្លួនទេ សព្វថ្ងៃស្នាក់នៅជាមួយប្អូនស្រី។
អំណោយមនុស្សធម៌ដែលបានផ្ដល់ជូន ក្នុងម្នាក់ៗទទួលបាន៖ រទេះ ជនពិការ១គ្រឿង , អង្ករ២៥គីឡូក្រាម , មី១កេស , ត្រីខ១យួរ , មុង១ , ភួយ១ , សារុង១ , ក្រមា១ , អាវយឺត២ និងថវិកាចំនួន២០ ម៉ឺនរៀល ហើយលោកជំទាវ សុខ ណារ៉ូ បានឧត្ថម្ភបន្ថែមក្នុងម្នាក់ៗ ថវិកាចំនួន៥ម៉ឺនរៀល និងអនុសាខាកាកបាទក្រហមកម្ពុជាស្រុកពួក ក៏បានឧបត្ថម្ភនូវអំណោយមួយចំនួនផងដែរ ។
មានប្រសាសន៍នាឱកាសនោះ លោកជំទាវ សុខ ណារ៉ូ បានពាំនាំនូវការផ្ដាំផ្ញើសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ក៏ដូចជាឯកឧត្តម ទៀ សីហា ប្រធានគណៈកម្មាធិការសាខា ព្រមទាំងសម្ដែងនូវការសោកស្តាយជាពន់ពេក ចំពោះអ៊ំប្រុស និងបងស្រី ដែលបានរងគ្រោះនូវជំងឺនេះ ក្នុងនាមកាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន មិនទុកចោលបងប្អូនប្រជាពលរដ្ឋក្នុងមូលដ្ឋានឱ្យនៅកណ្ដោយកណ្ដែងឡើយ ដូចពាក្យស្លោកលើកឡើងថា “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា -មិនទុកនរណាម្នាក់ចោល” ៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
