កាលនេះពីពេលថ្មីៗកន្លងទៅនេះ អាជ្ញាធរជាតិអប្សរា បានចេញសេចក្ដីជូនដំណឹងមួយ ស្ដីពីការជីកប្រឡាយតាមព្រំផ្ទៃដីព្រៃឈើ ដើម្បីការពារ និងរក្សាព្រៃឈើក្នុងឧទ្យានអង្គរ ដោយបានបញ្ជាក់ថា ជាយូរលង់មកហើយព្រៃឈើដែលស្ថិតនៅក្នុងឧទ្យានអង្គរ និងនៅជុំវិញអង្គរជាប្រភេទព្រៃស្រោង ពាក់កណ្តាលស្រោង និងព្រៃឈ្លោះ មានសត្វស្ទើរគ្រប់ប្រភេទរស់នៅជាព្រៃធម្មជាតិមានសម្រស់ស្រស់បំព្រងគួរជាទីគាប់ចិត្ត ហើយមិនត្រឹមប៉ុណ្ណោះ ព្រៃឈើនៅក្នុងឧទ្យានអង្គរ មានផលប្រយោជន៍យ៉ាងសំខាន់ដល់ភាពគង់វង្សនៃប្រាសាទ ហើយទោះបីកន្លងមក អាជ្ញាធរជាតិអប្សរា ខិតខំទប់ស្កាត់ និងការពារព្រៃឈើឱ្យប្រសើរឡើង ក៏នៅមានជនខិលខូចមួយក្តាប់តូច នៅបន្តកាប់ទន្ទ្រានដីព្រៃឈើបន្តិចម្តងៗ ដើម្បីពង្រីកផ្ទៃដីផ្ទះសម្បែង ស្រែចំការ និងចាប់យកដីព្រៃជាកម្មសិទ្ធផ្ទាល់ខ្លួន។ល។
សេចក្ដីជូនដំណឹងបានបញ្ជាក់បន្ថែមថា ដើម្បីអាចឱ្យអាជ្ញាធរជាតិអប្សរាមានលទ្ធភាពគ្រប់គ្រងទិន្នន័យព្រៃឈើកាន់តែច្បាស់លាស់និងប្រកបដោយនិរន្តរភាព ដើម្បីការពារ និងរក្សាព្រៃឈើនៅក្នុងឧទ្យានអង្គរឱ្យមានភាពគង់វង្សយូរអង្វែង នាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាននៃអាជ្ញាធរជាតិអប្សរា នឹងធ្វើការជីកប្រឡាយតាមព្រំផ្ទៃដីព្រៃឈើ ដោយយកប្រឡាយធ្វើរបងការពារការកាប់ទន្ទ្រានព្រៃឈើបន្តទៀត ។
ការងារជីកប្រឡាយនេះមានចំនួន១៨ខ្សែ មានប្រវែងសរុប២៧,៧៧៧ម៉ែត្រ ដែលស្ថិតនៅតាមទីតាំង រួមមាន ៖ ភូមិគោកបេង ភូមិគោកតាចាន់ ភូមិទក្សិណត្បូង និងភូមិគោកដូង សង្កាត់គោកចក ក្រុងសៀមរាប , ភូមិមណ្ឌលបី សង្កាត់ស្លក្រាម ក្រុងសៀមរាប , – ភូមិក្រវ៉ាន់ ភូមិអារក្សស្វាយ ភូមិអញ្ចាញ ភូមិស្រះស្រង់ត្បូង និងភូមិស្រះស្រង់ជើង សង្កាត់នគរធំ ក្រុងសៀមរាប និង ភូមិអូរទទឹង និងភូមិថ្នល់ទទឹង ឃុំព្រះដាក់ ស្រុកបន្ទាយស្រី ខេត្តសៀមរាប ខណៈដែលការងារនេះនឹងចាប់ផ្តើមអនុវត្តពីថ្ងៃទី០១ ខែកញ្ញា ឆ្នាំ២០១៩ តទៅ ៕
ព័ត៌មានជាតិ ថ្មីៗ
អត្ថបទ និង រូបថត ៖ លោក ម៉ាត់ អារីហ្វីន
កែសម្រួលអត្ថបទ ៖ លោក លីវ សាន្ត
