ព្រឹកថ្ងៃទី០៦ ខែសីហា ឆ្នាំ២០១៩នេះ លោក ពិន ប្រាកដ អភិបាល រងខេត្តសៀមរាប បានដឹកនាំក្រុមការងារបច្ចេកទេសរបស់មន្ទីរសាធារណការនិងដឹកជញ្ជូនខេត្ត ធ្វើការជួសជុលប៉ះសំបុកមាន់ (ជង្ហុក)ដោយប្រភេទ AC ត្រជាក់ និង បានដាក់គ្រឿងចក្រ ឈូស ឆាយផ្លូវ ស្ថិតនៅបណ្តោយផ្លូវមួយចំនួនក្នុងក្រុងសៀមរាប ដើម្បី ជួយសម្រួលដល់ការធ្វើដំណើររបស់ប្រជាពលរដ្ឋ ។
គម្រោងផ្លូវដែលកំពុងដំណើរការជួសជុលនេះ មានចំនួន០២ខ្សែ គឺ ៖
ខ្សែទី០១. ស្ថិតនៅបណ្តោយផ្លូវ៧មករា (ផ្លូវពីស្ពានថ្មវត្តដំណាក់ដល់ផ្លូវកែងជន្លង់ ) មានប្រវែង ២.៤៥០ម៉ែត្រ ដោយធ្វើការជួស ជុលប៉ះសំបុកមាន់ (ជង្ហុក) ជាប្រភេទកៅស៊ូ AC ត្រជាក់
ខ្សែ ទី០២. ផ្លូវសុខសាន ចាប់ពីមុខកេសរគោល រហូតដល់ផ្លូវក្រវ៉ាត់ក្រុង មានប្រវែង ១.៦០០ម៉ែត្រ ត្រូវបានក្រុមការងាររបស់មន្ទីរសាធារណការ និងដឹកជញ្ជូនខេត្ត បានដាក់គ្រឿងចក្រឈូសឆាយផ្លូវ ដើម្បីសម្រួលស្ថានភាពចរាចរណ៍ជូនប្រជាពលរដ្ឋ ឲ្យមានភាពងាយស្រួលជាងនេះ។
លោក ពិន ប្រាកដ អភិបាលរងខេត្តសៀមរាប មានប្រសាសន៍ថា ផ្លូវនេះ ត្រូវបានខូចខាតដោយសារទឹកភ្លៀងដក់ ហើយផ្លូវនេះមានគម្រោងជួសជុល និង ស្តារឡើងវិញនាចុងឆ្នាំ២០១៩ខាងមុខនេះ ដូច្នេះតាមរយៈនេះ សូមសំណូមពរសុំឲ្យការយោគយល់ពីសំណាក់បងប្អូនប្រជាពលរដ្ឋទាំងអស់ដែលបាននឹងកំពុងធ្វើចរាចរណ៍លើកំណាត់ផ្លូវទាំងអស់នេះ ដោយសារមានការស្ទះផ្លូវក្នុងអំឡុងពេលដែលក្រុមការងារកំពុងធ្វើការងារជួសជុល ប៉ុន្តែនៅក្រោយការឈូសឆាយរួច បងប្អូនអាចធ្វើដំណើរបានជាធម្មតា ។
លោក ពិន ប្រាកដ ក៏ បាន អំពាវនាវដល់បងប្អូនប្រជាពលរដ្ឋដែលកំពុង រស់នៅតាមបណ្តោយផ្លូវ ទាំង នេះ សូមមេត្តាកុំយកដីចំណីផ្លូវដាក់សម្ភារលក់ដូរ ឬដាក់សម្ភារផ្សេងៗទៀត ដែលធ្វើឱ្យផ្លូវមានសភាព កាន់តែតូច និងងាយកកស្ទះ ដូច្នេះអាជ្ញាធរខេត្តសង្ឃឹមយ៉ាងមុតមាំថា បងប្អូនប្រជាពលរដ្ឋនឹងចូលរួមសហការជាមួយនឹងអាជ្ញាធរ ខេត្ត ដើម្បីធ្វើការការកែលម្អសោភ័ណភាព ក្រុងសៀមរាបរបស់យើង ៕
អត្ថបទ និង រូបថត : Facebook រដ្ឋបាលខេត្តសៀមរាប
កែសម្រួលអត្ថបទ : លោក លីវ សាន្ត
