កាលពីព្រឹកថ្ងៃទី០៦ ខែកញ្ញា ឆ្នាំ២០១៩នេះ ឯកឧត្តម ទៀ សីហា អភិបាលខេត្តសៀមរាប អមដំណើរដោយលោក លោកស្រី ជាថ្នាក់ដឹកនាំមន្ទីរ អង្គភាពនានាក្នុងខេត្ត រួមជាមួយនឹងអាជ្ញាធរស្រុកពួក បាននាំយកអំណោយរាជរដ្ឋាភិបាលកម្ពុជា សម្រាប់កិច្ចគាំពារ និងសង្គ្រោះប្រជាពលរដ្ឋងាយរងគ្រោះ ចែកជូនដល់ប្រជាពលរដ្ឋរងគ្រោះដោយគ្រោះធម្មជាតិ និងទីទ័លក្រ ចំនួន៣៨០គ្រួសារ នៅឃុំចំនួន០៤ ក្នុងស្រុកពួក រួមមានឃុំសសរស្តម្ភ , មុខប៉ែន , ពោធិទ្រាយ និង ឃុំព្រៃជ្រូក តាមរយៈក្រសួងសង្គមកិច្ច អតីតយុទ្ធជន និងយុវនីតិសម្បទា និង មន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តសៀមរាប ដែលបានរៀបចំឡើងនៅវត្តត្រកៀត ក្នុងឃុំមុខប៉ែន ។
ឯកឧត្តម ទៀ សីហា អភិបាលខេត្តសៀមរាប មានប្រសាសន៍ថា មានស្ថាប័នជាតិជាច្រើនទៀត ដូចជាគណៈកម្មាធិការជាតិគ្រប់គ្រងគ្រោះមហន្តរាយជាដើម ដែលកំពុងដើរតួនាទីយ៉ាងសំខាន់ ក្នុងយន្តការនៃការជួយសង្គ្រោះប្រជាពលរដ្ឋក្នុងគ្រាជួបគ្រោះអាសន្នផ្សេងៗ ដូចជាគ្រោះធម្មជាតិ គ្រោះវិបត្តិដែលកើតឡើងដោយឧប្បទ្ទវហេតុធ្ងន់ធ្ងរ ជាមួយនឹងការចូលរួមដ៏ចាំបាច់នៃចលនាសប្បុរសធម៌ផងដែរ ដែលជាកម្លាំងចលករនៃសិល្បៈចែករំលែក អានុសាសន៍ដ៏ខ្ពង់ខ្ពង់សម្តេចតេជោ ហ៊ុន សែន ប្រមុខនៃរាជរដ្ឋាភិបាលកម្ពុជា ហើយក្នុងនាមអាជ្ញាធរខេត្តសៀមរាប សូមសម្ដែងនូវអំណរគុណយ៉ាងជ្រាលជ្រៅ ចំពោះប្រមុខរាជរដ្ឋាភិបាលកម្ពុជា ដែលជានិច្ចកាល តែងយកចិត្តទុកដាក់ខ្ពស់នូវសុខទុក្ខរបស់ប្រជាពលរដ្ឋគ្រប់មូលដ្ឋាន ដែលជួបប្រទះនូវភាពក្រីក្រ និង គ្រោះធម្មជាតិផ្សេងៗ ខណៈដែលសម្ដេចតេជោ ធ្លាប់បានមានប្រសាសន៍ថា មិនទុកឲ្យពលរដ្ឋណាម្នាក់ស្លាប់ដោយសាររង គ្រោះ ដោយអត់អាហារនោះឡើយ ។
ឯកឧត្តម ទៀ សីហា មានប្រសាសន៍បន្ថែមថា របាយការណ៍គឺវាសំខាន់ណាស់ ត្រូវផ្តល់តាមខ្សែរយៈទាក់ទងឲ្យបានរហ័សបំផុត រាល់បាតុភាពនៃគ្រោះវិបត្តិកើតឡើងនៅមូលដ្ឋាន ដើម្បីស្ថាប័នមានភារកិច្ច ចាត់ការដំណោះស្រាយទាន់ពេលវេលា ដូច្នេះក្នុងឱកាសនេះ សូមឲ្យមន្ត្រីមូលដ្ឋានគ្រប់លំដាប់ថ្នាក់ បន្ថែមការយកចិត្តទុកដាក់ឲ្យបានខ្ពស់ ចំពោះសុខទុក្ខប្រជាពលរដ្ឋ ដែលកំពុងស្ថិតក្នុងកាលៈ ទេសៈ នាំការបង្កភ័យវិបត្តិដោយគ្រោះធម្មជាតិ ជាមួយនឹងការចាត់ទុកថា មូលដ្ឋានជនបទ គឺជាមូលដ្ឋានដែលងាយរងគ្រោះ និង សូមអំពាវនាវដល់បងប្អូនប្រជាពលរដ្ឋទាំងអស់ ត្រូវយកចិត្តទុកដាក់ថែទាំសុខភាពរបស់ខ្លួនឲ្យបានល្អ ហើយប្រសិនបើមានជំងឺអ្វីកើតឡើង សូមទៅពិនិត្យ និង ព្យាបាលជំងឺនៅតាមមណ្ឌលសុខភាពដែលនៅជិតបំផុត ឲ្យបានទាន់ពេលវេលា ចៀសវាងទុកយូរ បណ្ដាលឲ្យទៅជាជំងឺធ្ងន់ធ្ងរ ។
សូមបញ្ជាក់ថា រាជរដ្ឋាភិបាលកម្ពុជា បានដាក់ចេញនូវគោលនយោបាយគាំពារសង្គម ក្នុងនោះរួមមាន គាំពារមនុស្សវ័យចំណាស់ និង គាំពារទៅលើសុខុមាលភាពស្ត្រីនិងកុមារ ពិសេសបានអនុវត្តឧបត្ថម្ភសាច់ប្រាក់ដល់ស្ត្រីមានផ្ទៃពោះ សម្រាប់ការពិនិត្យផ្ទៃពោះ និង សម្រាលកូន និង កុមារក្រោមអាយុ២ឆ្នាំ ក្នុងគ្រួសារក្រីក្រ ដោយអនុវត្តចាប់ពីថ្ងៃទី០១ ខែមិថុនា ឆ្នាំ២០១៩នេះតទៅ ខណៈក្នុងឆ្នាំ២០១៩ បានផ្តល់អំណោយជាសម្ភារប្រើប្រាស់ និងគ្រឿងបរិភោគ ជូនមនុស្សចាស់ជរា ជនងាយរងគ្រោះ និងជនរងដោយគ្រោះធម្មជាតិនៅក្នុងក្រុងសៀមរាប , ស្រុកសូទ្រនិគម , ស្រុកអង្គរជុំ , ស្រុកអង្គរជុំ , ស្រុកក្រឡាញ់ និង ស្រុកប្រាសាទបាគង សរុបចំនួន១២៩គ្រួសារ ៕
អត្ថបទ និង រូបថត : លោក ងិន គឹមឡេង
កែសម្រួលអត្ថបទ : លោក លីវ សាន្ត
