បើតាមសេចក្ដីជូនដំណឹងរបស់នាយកដ្ឋានគាំពារនិងអភិរក្សសំណង់បុរាណ បានឲ្យដឹងថា ដើម្បីចូលរួមអបអរសាទរទិវាបុណ្យបេតិកភណ្ឌពិភពលោកក្នុងឆ្នាំនេះ នៅថ្ងៃទី២១ កញ្ញា អភិរក្សដ្ឋានអង្គរ ដែលស្ថិតក្រោមការគ្រប់គ្រងរបស់នាយកដ្ឋានគាំពារ និងអភិរក្សសំណង់បុរាណនៃក្រសួងវប្បធម៌ និងវិចិត្រសិល្បៈ នឹងបើកទ្វារស្វាគមន៍ដល់សាធារណជនចូលទស្សនាតាមឃ្លាំងទុកវត្ថុបុរាណនីមួយៗពេញមួយថ្ងៃ។
គោលបំណងនៃការរៀបចំនេះដែរ ក្រៅពីការអបអរសាទរទិវាបេតិកភណ្ឌពិភពលោក ក្នុងនោះក៏ដើម្បីឱ្យមហាជនចូលទស្សនាអំពីសម្បតិ្ដបេតិកភណ្ឌជាតិខ្មែរដែលបានការពារនិងថែរក្សាទុកនៅក្នុងអភិរក្សដ្ឋានអង្គរ នាខេត្តសៀមរាបដែលមានប្រវត្តិតាំងពីសម័យបារាំងមកនេះដែរ។
ក្នុងសេចក្ដីជូនដំណឹងរបស់នាយកដ្ឋានគាំពារ និងអភិរក្សសំណង់បុរាណ បានប្រាប់សាធារណជនទាំងអស់ឲ្យដឹងដែរថា ការចូលទស្សនានេះដែរ គឺពេលព្រឹកចាប់ពីម៉ោង ០៨ដល់ម៉ោង ១១និង៣០នាទី និងពេលរសៀលចាប់ពីម៉ោង ០១ដល់ម៉ោង ០៤រសៀល ។
ព័ត៌មានជាតិ ថ្មីៗ
គួរឲ្យដឹងដែរថា អភិរក្សដ្ឋានអង្គរ ជាឃ្លាំងរក្សាទុកវត្ថុបុរាណតាមបណ្ដាប្រាសាទនានាក្នុងប្រទេស អភិរក្សដ្ឋានអង្គរត្រូវបានយាមកាមតឹងរឹង ដោយមិនសូវមានអ្នកណាបានចូលទស្សនាឡើយ ។ ចំពោះការទស្សនាប្រចាំថ្ងៃ គឺត្រឹមតែបរិវេណខាងក្រៅប៉ុណ្ណោះ ដោយឡែកក្នុងឃ្លាំងទុកវត្ថុសិល្បៈបុរាណនីមួយៗ កម្របើកជូនសាធារណជនបានទស្សនាជាសាធារណនោះទេ ៕
អត្ថបទ និង រូបភាព ៖ម៉ាត់ អារ៉ាហ្វីន
កែសម្រួល៖ អ៊ុន ណារាជ្យ
