នៅថ្ងៃទី០៦ ខែកញ្ញា ឆ្នាំ២០១៩នេះ ប្រជាពលរដ្ឋចំនួន០២សង្កាត់ ស្ថិតក្នុងភូមិថ្មី សង្កាត់ស្វាយដង្គំ និងប្រជាពលរដ្ឋនៅក្នុងភូមិត្រៀក សង្កាត់សៀមរាប បានត្អូញត្អែថា ពួកគាត់សព្វថ្ងៃនេះ មានការលំបាករស់នៅដោយសារតែទឹកស្អុយ បានហូរចេញពីលូប្រឡាយមេចូលមកក្នុងភូមិរបស់គាត់។
ជាតំណាងប្រជាពលរដ្ឋទាំងពីរភូមិ អ្នកស្រី ខៀវ ចិន្តា បានលើកឡើងថា រយៈពេលប៉ុន្មានថ្ងៃកន្លងទៅនេះ ក្រុងសៀមរាប ត្រូវបានភ្លៀងធ្លាក់មកស្ទើរតែរាល់ថ្ងៃ ដែលជាហេតុធ្វើឲ្យទឹកស្អុយនៅក្នុងលូប្រឡាយផ្លូវក្រវាត់ក្រុង បានហូរកាត់ផ្លូវគ្រួសក្រហមហៀចូលមកក្នុងភូមិ ធ្វើឲ្យផ្លូវនោះរងការខូចខាត និងបង្កជាក្លិនស្អុយពេញភូមិ។
អ្នកស្រីបន្តថា ការដែលមានទឹកស្អុយហូរចូលភូមិនេះ ដោយសារតែលូប្រឡាយធំនៅផ្លូវក្រវាត់ក្រុង ត្រូវបានបុគ្គលមួយចំនួនចាក់ដីលុប ធ្វើឲ្យទឹកដែហូរពីផ្នែកខាងលើចាល់ ហៀចូលមកក្នុងភូមិដ្ឋានប្រជាពលរដ្ឋ។ ដូច្នេះពួកគាត់បានទទូចសុំដល់អាជ្ញាធរក្រុងសៀមរាប មេត្តាចាត់វិធានការកាយបើកមុខទឹកនៅប្រឡាយធំនោះឡើងវិញ កុំឲ្យលិចភូមិដ្ឋានពួកគាត់បែបនេះទៀត។
ក្នុងឱកាសនោះដែរ ជាការឆ្លើយតបចំពោះមុខប្រជាពលរដ្ឋ លោកហាយ យង់ ប្រធានការិយាល័យអភិវឌ្ឍន៍ក្រុង និងជាតំណាងអាជ្ញាធរក្រុងសៀមរាប បានឲ្យដឹងថា ការកាយបើកមុខទឹក ខាងសាលាក្រុង នឹងមានវិធានការនាពេលខាងមុខ ។
លោកហាយ យង់ បន្តថា ដើម្បីដោះស្រាយចំពោះបញ្ហានេះ ទាំងអាជ្ញាធរ និងជំនាញនៃមន្ទីរសាធារណការ និងដឹកជញ្ជូនខេត្ត គឺត្រូវតែដាក់លូកាត់ទទឹងផ្លូវ និងបើកមុខទឹកនៅផ្នែកខាងក្រោមឲ្យទឹកហូរអស់ពីភូមិសិន។ ព្រោះមិនអាចឲ្យទឹកលិចលង់ភូមិដ្ឋានប្រជាពលរដ្ឋដូច្នេះទេ៕
អត្ថបទ និង រូបភាព ៖ជា ស្រស់, ខេង ឧត្តម
កែសម្រួល៖ អ៊ុន ណារាជ្យ
