នៅព្រឹកថ្ងៃទី១១ ខែកញ្ញា ឆ្នាំ២០១៩ ឯកឧត្តម ទៀ សីហា អភិបាលខេត្តសៀមរាប អញ្ជើញចុះពិនិត្យការដ្ឋានផ្លូវមួយកន្លែង មានប្រវែង២៣៥ម៉ែត្រ នៅក្បែរតំបន់ផាប់ស្ទ្រីត ស្ថិតក្នុងភូមិស្ទឹងថ្មី សង្កាត់ស្វាយដង្គុំ ក្រុងសៀមរាប ដែលគ្រោងនឹងស្ថាបនាជាផ្លូវកៅស៊ូបេទីម ក្នុងឆ្នាំ២០១៩នេះ។
តាមការឲ្យដឹងពី មន្ត្រីទទួលបន្ទុកផ្នែកការដ្ឋាន នៃមន្ទីរសាធារណការ និងដឹកជញ្ជូនខេត្តសៀមរាប បាននិយាយថា ដោយឯកឧត្តមអភិបាលខេត្ត មើលឃើញពីការលំបាក ក្នុងការធ្វើចរាចរណ៍ នៅលើផ្លូវមួយខ្សែនេះ ឯកឧត្តមបានណែនាំ ដល់មន្ទីរសាធារណការ និងដឹកជញ្ជូនខេត្តសៀមរាប ដាក់គ្រឿងចក្រ កិនបង្ហាប់ផ្លូវ ដែលមានការខូចខាតនេះជាមុនសិន ដើម្បីសម្រួលចរាចរណ៍ជូនប្រជាពលរដ្ឋ។
ដោយឡែក គម្រោងផ្លូវកៅស៊ូបេទីម ប្រវែង ២៣៥ម៉ែត្រ នឹងធ្វើការស្ថាបនាក្នុងឆ្នាំ២០១៩នេះ បន្ទាប់ពីដំណើរការស្នើសុំថវិការបស់រដ្ឋបាលសាលាខេត្តសៀមរាប ទៅក្រសួងសេដ្ឋកិច្ច និងហិរញ្ញវត្ថុ ត្រូវបានសម្រេច ខណៈបច្ចុប្បន្នកំពុងតែដំណើរការ។
ឆ្លៀងក្នុងឱកាសចុះពិនិត្យការដ្ឋានផ្លូវនេះដែរ ឯកឧត្តម ទៀ សីហា ក៏បានចុះពិនិត្យផ្លូវមួយចំនួន ដែលជាតំបន់សំបូរភ្ញៀវបរទេសឆ្លងកាត់ ទៅកំសាន្តនៅតំបន់ផាប់ស្ទ្រីត លើសពីនោះឯកឧត្តមអភិបាលខេត្ត ក៏បានជួបសំណេះសំណាល សួរសុខទុក្ខប្រជាពលរដ្ឋក្នុងតំបន់ទាំងនោះផងដែរ។
សូមជម្រាបថា ក្រៅពីការចុះពិនិត្យការដ្ឋានផ្លូវមួយខ្សែនេះ នៅថ្ងៃទី០៦ ខែសីហា ឆ្នាំ២០១៩ លោក ពិន ប្រាកដ អភិបាល រងខេត្តសៀមរាប ក៏បានដឹកនាំក្រុមការងារបច្ចេកទេសរបស់មន្ទីរសាធារណការនិងដឹកជញ្ជូនខេត្ត ធ្វើការជួសជុលប៉ះសំបុកមាន់មួយចំនួនផងដែរ។
សូមបញ្ជាក់ថា ផ្លូវមួយខ្សែនេះ ពុំស្ថិតនៅក្នុងគម្រោង តារាងផែនការអនុវត្តការងារ ១០០ថ្ងៃ របស់មន្ទីរសាធារណការ និងដឹកជញ្ជូនខេត្តសៀមរាប ដែលគិតចាប់ពីសប្តាហ៍ទី៣ ខែសីហា ដល់ សប្តាហ៍ទី២ ខែវិច្ឆិកា ឆ្នាំ២០១៩ ឡើយ។
អត្ថបទ និង រូបភាព ៖ លោក សេង ផល្លី
