ទីភ្នាក់ងារព័ត៌មានចិនស៊ិនហួ បានចុះផ្សាយកាលពីថ្ងៃទី១២ ខែកញ្ញា ឆ្នាំ២០១៩ថា ចិន បានបញ្ជូនផ្កាយរណប ធនធាន១គ្រឿង និងផ្កាយរណបចំនួន២គ្រឿង ទៅកាន់ដងតារាវិថី ដែលបានបាញ់ចេញពី មជ្ឈមណ្ឌលបាញ់បង្ហោះ ផ្កាយរណបតៃយួន នៅខេត្ត សានស៊ី របស់ប្រទេសចិន នៅថ្ងៃព្រហស្បតិ៍នេះ ។
ផ្កាយរណបទាំងនោះ ត្រូវបានបាញ់បង្ហោះឡើង ដោយគ្រាប់រ៉ុក្កែត Long March-4B នៅវេលាម៉ោង១១និង២៦នាទីព្រឹក ម៉ោងនៅក្រុងប៉េកាំង ។
ផ្កាយរណបធនធាន ឈ្មោះ ZY-1 02D នឹងផ្តល់ការស៊ើបការណ៍ទិន្នន័យ ដោយគ្រប់គ្រង លើការវាយតម្លៃធនធានធម្មជាតិ ត្រួតពិនិត្យមើលអេកូឡូស៊ី ទប់ស្កាត់គ្រោះមហន្តរាយ និងត្រួតពិនិត្យ ការពារបរិស្ថាន សំណង់នៅតំបន់ទីក្រុង ការដឹកជញ្ជូន និងការគ្រប់គ្រងក្នុងតំបន់ ។
ផ្កាយរណបមួយក្នុងចំណោម ផ្កាយរណបតូចចំនួន២គ្រឿង បានបាញ់បង្ហោះ ដោយគ្រាប់រ៉ុក្កែតដូចគ្នា ដែលជាកម្មសិទ្ធិ របស់សាកលវិទ្យាល័យ Beijing Normal University ដែលមានឈ្មោះថា BNU-1និងមួយទៀត ជាកម្មសិទ្ធិរបស់ក្រុមហ៊ុនឯកជន ផ្នែកបច្ចេកវិទ្យា ដែលមានមូលដ្ឋាននៅក្រុងសៀងហៃ ៕
ប្រភព៖ ដើមអំពិល ប្រែសម្រួលដោយ៖ ម៉ៅ បុប្ផាមករា
