នៅព្រឹកថ្ងៃទី១៣ ខែកញ្ញា ឆ្នាំ២០១៩នេះ ក្រុមការងារថ្នាក់ជាតិចុះជួយមូលដ្ឋានស្រុកជីក្រែង បានរៀបចំ
វេទិកាសាធារណៈថ្នាក់ជាតិមួយ ស្ដីអំពី”ការផ្ដល់សេវាសាធារណៈ (សេវាតម្រូវការ និងសេវាសំណូមពរ)” ដើម្បីត្រួតពិនិត្យ និងគាំទ្រការអនុវត្តកម្មវិធីនយោបាយនិងយុទ្ធសាស្ត្រចតុកោណដំណាក់កាលទី ៤ ប្រចាំខែកញ្ញា ឆ្នាំ២០១៩ ស្ថិតនៅវត្តខ្នារធ្នង់ ឃុំគោកធ្លកក្រោម ស្រុកជីក្រែង ខេត្តសៀមរាប និងមានសមាសភាព៣៨១នាក់ ក្នុងនោះស្រី១៣៤នាក់។
មានវត្តមានដឹកនាំវេទិកាសាធារណៈនេះ ឯកឧត្តម ព្រហ្ម សិទ្ធត្រា ប្រធានក្រុមការងារថ្នាក់ជាតិចុះជួយមូលដ្ឋានស្រុកជីក្រែង និង ជារដ្ឋលេខាធិការ នៃក្រសួងយុត្តិធម៌ បានមានប្រសាសន៍បើកកម្មវិធីថា វត្តមានរបស់ក្រុមការងារថ្នាក់ជាតិ នៅពេលនេះ គឺដើម្បីដោះស្រាយ នូវរាល់បញ្ហា និងសំណូមពររបស់ប្រជាពលរដ្ឋទាំងអស់ក្នុងស្រុកជីក្រែង ដូច្នេះសូមប្រជាពលរដ្ឋ ដែលមានវត្តមាននៅទីនេះ សូមលើកជាសំណួរ ក៏ដូចជាសំណូមពរដល់ក្រុមការងារជំនាញធ្វើការដោះស្រាយ។
ដោយមានការសម្របសម្រួលពីលោក ពៅ ប៊ុនធឿនអភិបាលស្រុកជីក្រែង ប្រជាពលរដ្ឋដែលមានវត្តមាននៅទីនោះ បានលើកជាសំណួរចម្រុះជាច្រើន ដែលពាក់ព័ន្ធទៅនឹងជីវភាពរស់នៅប្រចាំថ្ងៃរបស់ពួកគាត់ ក្នុងនោះរួមមាន:
• សំណូមពរកសាងផ្លូវ
• សំណូមពរលើកទឹកចិត្តដល់សិស្សពូកែចាប់ពីនិទ្ទេស A ដល់និទ្ទេស C និងគ្រូបង្រៀនបំប៉នមុនប្រឡង
• បញ្ហាការរាលដាលជំងឺឆ្លងបណ្ដាលឲ្យសត្វពាហនៈងាប់ ជាពិសេសសត្វជ្រូក
• បញ្ហាសំរាមនៅតាមដងផ្លូវ និងក្នុងការបង្ហូរទឹកសម្អុយចូលស្ទឹងជីក្រែង
• បញ្ហាផ្គត់ផ្គង់អគ្គិសនីដោយសេវាករអគ្គិសនី
បញ្ហា និងសំណូមពរខាងលើ ត្រូវបានក្រុមការងារមន្ទីរអង្គភាពជំនាញដែលមានវត្តមាននៅទីនោះ ធ្វើការបកស្រាយ និងខ្លះទៀតទទួលយកទៅដោះស្រាយ ដោយឡែកសំណូមពរ និងបញ្ហាមួយចំនួនទៀត ដែលមិនទាន់ដោះស្រាយ ដោយសារមន្ទីរអង្គភាពជំនាញបានស្នើទៅក្រសួងពាក់ព័ន្ធរួចហើយ តែនៅរង់ចាំការសម្រេច និងអនុវត្តផ្ទាល់ពីក្រសួងសាម៉ី។
ទន្ទឹមនោះ ចំពោះសំណួរពាក់ព័ន្ធនឹងការផ្ដល់សេវាសាធារណៈនានាក្នុងមូលដ្ឋាន ក្រុមការងារមន្ទីរអង្គភាពជំនាញ បានធ្វើការបកស្រាយជូនប្រជាពលរដ្ឋភ្លាមៗ ដែលធ្វើឲ្យពួកគាត់យល់ និងអាចទទួលយកបាន។
អត្ថបទ និង រូបភាព ៖ លោក សេង ផល្លី
