នាព្រឹកថ្ងៃទី១៥ ខែកញ្ញា ឆ្នាំ២០១៩នេះ រដ្ឋបាលខេត្ត សមាជិកក្រុមប្រឹក្សាខេត្តសៀមរាប បានអញ្ជើញចូលរួម កាន់បិណ្ឌវេនទី២ នៃពិធីបុណ្យភ្ជុំ បិណ្ឌនៅវត្តរាជបូព៌ ស្ថិតក្នុងសង្កាត់សាលាកំរើក ក្រុងសៀមរាប ខេត្តសៀមរាប ដោយមានការអញ្ជើញចូលរួមពីសំណាក់ លោកជំទាវ ស៊ិន ណម សមាជិកក្រុមប្រឹក្សាខេត្ត លោកស្រី យូ សុភា អភិបាលរងខេត្ត និងឯកឧត្តម លោកជំទាវ លោក លោកស្រី ជាប្រធាន អនុប្រធានមន្ទីរជុំវិញខេត្ត រួមជាមួយនឹងពុទ្ធបរិស័ទក្នុងខេត្ត ដោយនាំយកទៅជាមួយនូវគ្រឿងឧបភោគបរិភោគ និងទ័យ្យទានវត្ថុមួយចំនួនវេរប្រគេនដល់ព្រះសង្ឃ នៅក្នុងវត្ត រួមមាន៖ អង្ករ ២៥០ គក្រ ទឹកក្រូច ១០ កេស ទឹកសុទ្ធ ១០ កេស ទឹកត្រី ៤ យួរ ទឹកស៊ីអ៊ីវ ៤ យួរ ត្រីខ ១ កេះ ស្ករស ១០ គក្រ និង ទឹកដោះគោ ១ កេស តែ ៥ កញ្ចប់ធំ បច្ច័យសម្រាប់វត្តមួយចំនួនផងដែរ ។
ព្រះមហាវិមលធម្ម ពិន សែម សិរីសុវណ្ណោ មានថេរដិកាថា ពិធីបុណ្យភ្ជុំបិណ្ឌ គឺជាពិធីបុណ្យប្រពៃណីជាតិដ៏ធំមួយ ក្នុងចំណោមពិធីបុណ្យប្រពៃណីជាតិដទៃទៀតនៃព្រះរាជាណាចក្រកម្ពុជា។ ពិធីបុណ្យភ្ជុំបិណ្ឌនេះ ត្រូវបានប្រជាពលរដ្ឋខ្មែរប្រារព្ធឡើងជារៀងរាល់ឆ្នាំរយ:ពេល១៥ថ្ងៃ គឺចាប់ពីថ្ងៃ១រោច ខែភទ្របទ រហូតដល់ថ្ងៃ១៥រោច ខែភទ្របទ ដែលត្រូវនឹងខែកញ្ញាឬតុលា។
ព្រះអង្គ មានថេរដិកាទៀតថា ជារៀងរាល់ឆ្នាំ ប្រជាជនខ្មែរតែងតែ មានទម្លាប់ធ្វើចង្ហាន់ និងនំចំណី យកទៅប្រគេនព្រះសង្ឃ ដើម្បីឧទ្ទិសកុសលទៅដល់វិញ្ញាណក្ខន្ធប្រែត នរក ដែលជាសាច់ញាតិរបស់ខ្លួនបានសេពសោយ។ ប្រជាពលរដ្ឋខ្មែរមានជំនឿទៀតថា ក្នុងអំឡុងពេលយមបាលដោះលែងប្រែត ចំថ្ងៃដែលប្រជាពលរដ្ឋធ្វើបុណ្យឧទ្ទិសជូនដូនតារបស់ខ្លួន ព្រោះប្រជាពលរដ្ឋយើងគិតថា នៅពេលដូនតានៅរស់អាច និងធ្វើរឿងមិនល្អ ដែលអាចធ្លាក់ទៅកាន់ទីមិនសមគួរ ទើបកូនចៅធ្វើបុណ្យបញ្ជូនទៅពួកគាត់នឹងរួចផុតពីកម្មពៀរទាំងនោះ ។
លោកស្រី យូ សុភា អភិបាលរងខេត្តសៀមរាប មានប្រសាសន៍ថា វិស័យអាណាចក្រ និងពុទ្ឋចក្រនៅកម្ពុជា គឺដើរទន្ទឹមគ្នាពុំអាចខ្វះមួយណាបានឡើយ ហេតុនេះវិស័យព្រះពុទ្ឋសាសនារីកចំរើនលូតលាស់ទៅបាន គឺអាស្រ័យដោយប្រជាពុទ្ឋបរិស័ទមានជីវភាពសម្បូរធូរធារ ជាក់ស្តែង
ប្រទេសកម្ពុជា ក្រោមការដឹកនាំរបស់សម្តេចតេជោ ហ៊ុន សែន អ្វីៗបាននឹងកំពុងរីកចំរើនជឿនលឿនទៅមុខឥតឈប់ឈរក្រោមដំបូលសន្តិភាពតែមួយប្រទេសមានស្ថេរភាពមានសុខសន្តិភាពទើបយើងមានឱកាសបានបំពេញបុណ្យតាមទៅកាលវេលាតាមគន្លងប្រពៃណីពីជីដូនជីតាបានពេញលេញដោយគ្មានក្តីបារម្ភ ។
លោកស្រី អភិបាលរងខេត្ត មានប្រសាសន៍បន្តទៀតថា ជាក់ស្ដែង វត្តរាជបូព៌ ជាបូជនីយដ្ឋាន និងបុរាណដ្ឋានដ៏ល្បីមួយនៅក្នុងខេត្តសៀមរាប ដែលបានកសាងឡើងក្នុងរវាងឆ្នាំ១៦៥០ មកម្លេះ វត្តរាជបូណ៌ជាវត្តដែលសម្បូរទៅដោយអ្នកប្រាជ្ញ និងមន្ត្រីសង្ឈ ដែលមានឋានានុក្រមខ្ពស់ៗគង់នៅដូចជាសម្ដេចព្រះសង្ឃរាជទេព វង្ស, ព្រះមហាវិមលធម្ម ពិន សែម ព្រះរាជាគណ:ថ្នាក់ទោជាដើម ។ ហើយវត្តនេះក៏ជាវត្តកំណើតរបស់សម្តេចព្រះអគ្គមហាសង្ឃរាជ ទេព វង្ស សម្តេចព្រះមហាសង្ឃរាជនៃព្រះរាជាណាចក្រកម្ពុជា ដែលព្រះអង្គសាងព្រះផ្នួសនៅវត្តនេះតាំងពីសាមណេរ តមក ហើយសម្តេចធ្លាប់មានតួរនាទីជាព្រះគ្រូសូត្រស្តាំក្នុងវត្តរាជបូណ៌នេះផងដែរ ។
លោស្រី យូ សុភា បន្ថែមថា វត្តរាជបូណ៌ ក៏ជាកន្លែងអប់រំមួយដែរ ដោយសារតែវត្តនេះ បានបើកសាលាពុទ្ធវិទ្យាល័យដែលផ្តល់ឲ្យព្រះសង្ឃក្នុងខេត្តដ៏ដូចជាព្រះសង្ឃមកពីបណ្តាខេត្តនានា មានឱកាសរៀនសូត្រនូវចំណេះដឹង ទាំងខាងពុទ្ធសាសនាក៏ដូចជាចំណេះដឹងទូទៅមានគណិតវិទ្យា វិទ្យាសាស្ត្រ និងភាសា បរទេសជាដើម។ ជាមួយគ្នានោះ វត្តមានមជ្ឈមណ្ឌលវប្បធម៌ និងសិល្បះ ដែលមាន បង្រៀននូវចំណេះដឹងខាងផ្នែករបាំ ផ្នែកដាប់ឆ្លាក់ ផ្នែកគំនូរ ផ្នែកភ្លេងបូរាណ មានទាំងស្បែក តូច ស្បែកធំ ភ្លេងពិណពាទ្យ ភ្លេងប្រពៃណី(ភ្លេងការ) ជាដើម ដែលនេះ សុទ្ធតែជាការចូលរួមថែរក្សានូវសម្បត្តិវប្បធម៌របស់ខ្មែយើង ឲ្យគង់វង្សយូរអង្វែង តទៅកូនចៅជំនាន់ក្រោយទៀត ៕
អត្ថបទ និង រូបភាព ៖អ៊ុន ណារាជ្យ