នៅវេលាម៉ោង ៣:៣០ នាទីទៀបភ្លឺថ្ងៃទី ១៦ ខែកញ្ញា ឆ្នាំ ២០១៩ មានគ្រោះថ្នាក់ចរាចរណ៍មួយកើតឡើង រវាងរថយន្តនិងម៉ូតូ ស្ថិតនៅត្រង់ចំណុចផ្លូវបំបែកជាបួនភ្លើងស្តុបសុខា ភូមិមណ្ឌល២ សង្កាត់ស្វាយដង្គំ ក្រុងសៀមរាប លើផ្លូវជាតិលេខ៦ បណ្ដាលឲ្យយុវជនម្នាក់ស្លាប់ រីឯអ្នកបើកបររថយន្តរត់គេចខ្លួនបាត់។
តាមការឲ្យដឹងពីសមត្ថកិច្ចជំនាញ គ្រោះថ្នាក់ចរាចរណ៍នេះបង្កឡើងដោយរថយន្តឡង់គ្រីស័រ ពណ៌ ស ពាក់ស្លាកលេខភ្នំពេញ 2BD-5878 អ្នកបើកបរមិនស្គាល់អត្តសញ្ញា បើកបរក្នុងល្បឿនលឿន ទិសដៅ ពីលិចទៅកើត បានទៅបុកម៉ូតូមួយគ្រឿងម៉ាក Zoomer X ពណ៌បៃតង ពាក់ស្លាកលេខសៀមរាប 1V- 5028 បណ្ដាលឲ្យ អ្នកបើកបរម៉ូតូឈ្មោះ ប៊ន ឡឹក ភេទប្រុស អាយុ២០ ឆ្នាំរស់នៅភូមិត្រពាំងសេះ សង្កាត់គោកចក ក្រុងសៀមរាប ខេត្តសៀមរាប ស្លាប់។
ក្រោយពីកើតហេតុ កម្លាំងនគរបាលជំនាញ បានចុះទៅពិនិត្យកន្លែងកើតហេតុធ្វើការវាស់វែង និងធ្វេីកំណត់ហេតុយកវត្ថុតាងមករក្សាទុកនៅការិយាល័យជំនាញ ដើម្បីអនុវត្តនីតិវិធីបន្ត។ ចំណែកឯសាកសពជនរងគ្រោះ កម្លាំងសម្ថកិច្ចបានប្រគល់ជូន ក្រុមគ្រួសារយកទៅធ្វើបុណ្យតាមប្រពៃណី។
អត្ថបទ និង រូបភាព ៖ លោក ថាច់ ពិសុទ្ធ
កែសម្រួលអត្ថបទ៖ លោក សេង ផល្លី
