រដ្ឋាភិបាលអារ៉ាប៊ីសាអូឌីត បានឲ្យដឹងថាយន្តហោះ Drone បានវាយប្រហារទៅលើទីតាំងប្រេង ចំនួនពីរនៅភាគខាងកើត នៃប្រទេសរបស់ខ្លួន កាលពីថ្ងៃមុន ដែលកាត់បន្ថយការផលិតប្រេងឆៅ ប្រចាំថ្ងៃរបស់ខ្លួនជិតពាក់កណ្តាល ដោយសហរដ្ឋអាមេរិក បានស្តីបន្ទោសទៅលើអ៊ីរ៉ង់ ពាក់ព័ន្ធនឹងការវាយប្រហារនេះ។
រដ្ឋមន្ត្រីក្រសួងថាមពល Abdulaziz bin Salman បានឲ្យដឹងនៅក្នុងសេចក្តីថ្លែងការណ៍មួយថា ការវាយប្រហារទៅលើទីតាំងប្រេង របស់រដ្ឋអារ៉ាប៊ីសាអ៊ូឌីត Aramco នៅ Abqaiq និង Khurais បានកាត់បន្ថយផលិតកម្មរបស់ប្រទេសនេះប្រមាណ ៥,៧ លានបារ៉ែល ក្នុងមួយថ្ងៃដែលស្មើនឹង ៥ ភាគរយនៃការផ្គត់ផ្គង់ពិភពលោក។ តាមសេចក្តីរាយការណ៍មិនមានកម្មករនៅតាមរោងចក្រត្រូវបានរងរបួសនោះទេ។
ក្រុមឧទ្ទាម Houthi ដែលជាសម្ព័ន្ធមិត្តអ៊ីរ៉ង់ នៅក្នុងប្រទេសយេម៉ែនដែលនៅជិតខាងបានអះអាងទទួលខុសត្រូវចំពោះការវាយប្រហារនេះដោយអ្នកនាំពាក្យ Houthi បានឲ្យដឹងថាយន្តហោះ Drone ចំនួន ១០ គ្រឿងត្រូវបានប្រើប្រាស់។ នេះគឺជាការវាយប្រហារធំបំផុតលើហេដ្ឋារចនាសម្ព័ន្ធប្រេងរបស់អារ៉ាប៊ីសាអូឌីតដោយក្រុមឧទ្ទាម៕
ប្រភព៖ដើមអំពិល
ដោយ ឈូក បូរ៉ា
