ព្រឹត្តិការណ៍ដាំពូជកូនឈើក្រញូង ក្នុងសួនដាំដើមឈើអនុស្សាវរីយ៍ លើផ្ទៃដី ៥ហិតាកន្លះ នៃតំបន់ចំការព្រៃពូជឈើក្រញូង ក្នុងទំហំផ្ទៃដីសារុបប្រមាណជា ជិត ១,៩០០ហិចតា នៅថ្ងៃទី១៥ ខែកញ្ញា ឆ្នាំ២០១៩ ស្ថិតក្នុងភូមិត្រពាំងថ្ម ឃុំឃុនរាម ស្រុកបន្ទាយស្រី ខេត្តសៀមរាប ដែលមានអ្នកចូលរួមប្រមាណជាង១ពាន់នាក់ ក្រោមប្រធានបទ “ទេសចរម្នាក់ ដើមឈើមួយដើម”។
លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប បានឲ្យដឹងថា ៖ តំបន់ចំការឈើពូជក្រញូងនេះ គ្រប់គ្រងដោយខណ្ឌរដ្ឋបាលព្រៃឈើសៀមរាប មានចម្ងាយជិត១០០គីឡូម៉ែត្រពីក្រុងសៀមរាប ។ សួនដាំកូនឈើអនុស្សាវរីយ៍នេះ បានបង្កើតឡើងនៅក្នុងឆ្នាំ២០១៥ ។ មកទល់នឹងឆ្នាំ២០១៩ សួនដាំកូនឈើអនុស្សាវរីយ៍ បានទទួលស្វាគមន៍ភ្ញៀវជាតិ អន្តរជាតិ មន្ត្រីរាជការ និងថ្នាក់ដឹកនាំជាន់ខ្ពស់ សរុបបានចំនួន៥៣លើក និងមានកូនឈើប្រមាណជាជិត ១ ៣០០ដើម ជាប្រភេទឈើក្រញូងនិងឈើទាល ត្រូវបានដាំក្នុងសួនអនុស្សាវរីយ៍នេះ។ ដោយឡែក នៅថ្ងៃនេះ គឺជាព្រឹត្តិការណ៍ដ៏ធំមួយ ដែលមិនធ្លាប់មាន ក្នុងរយៈពេល៤ឆ្នាំកន្លងមក។
លោក ម៉ុង ប៊ុនលឹម នាយខណ្ឌរដ្ឋបាលព្រៃឈើសៀមរាប បានបង្ហាញឲ្យដឹងដែរថា ៖ ការបង្កើតឡើងសួនដាំកូនឈើអនុស្សាវរីយ៍នេះ មិនត្រឹមតែជាការបំផុសចលនាដាំកូនឈើឡើងវិញនោះទេ តែក៏ជាផែនការនៃការរៀបចំតំបន់នេះឲ្យក្លាយជាគោលដៅ ព្រៃឈើបម្រើសេវាកម្មទេសចរណ៍ធម្មជាតិ ផងដែរ ។
មានវត្តមានជាអធិបតីក្នុងឱកាសនោះ លោក នាក់ ណេរ៉ុន អភិបាលរងខេត្តសៀមរាប មានប្រសាសន៍ថា ៖ ការចូលរួមរបស់ប្រតិបត្តិករទេសចរ និងប្រជាពលរដ្ឋគ្រប់ស្រទាប់វណ្ណៈ ក្នុងឱកាសដាំកូនឈើនេះ គឺជាសារសកម្មភាព ដើម្បីពញ្ញាក់ស្មារតីប្រជាពលរដ្ឋ ឲ្យមានការចូលរួមអភិរក្សព្រៃឈើនៅកម្ពុជា។ នេះគឺជាចាប់ផ្តើមប្រវត្តិសាស្ត្រថ្មីមួយទៀត ក្នុងការចូលរួមស្តារបរិស្ថាន និងព្រៃឈើនៅកម្ពុជា ជាមួយនឹងការសម្លឹងឃើញមោទនភាព ដោយការបន្សល់ទុកមរតកនៃមនុស្សជំនាន់បច្ចុប្បន្ន សម្រាប់កូនចៅជំនាន់ក្រោយៗទៀត។ នេះមិនត្រឹមតែជាសមិទ្ធផលសម្រេចបាន ក្នុងការស្តារព្រៃឈើឡើងវិញនោះទេ តែក៏ជាការបន្សល់ទុកនូវមរតកស្មារតីនៃការបន្តវេនផងដែរ ដើម្បីបង្កើនផ្ទៃបៃតងនៃភពផែនដី ។
សូមជម្រាបថា កូនឈើក្រញូងដែលបានដាំនាពេលនោះ ត្រូវបានផ្ដល់ជូនដោយឥតថ្លៃ ប៉ុន្តែដើម្បីធានាដល់ការលូតលាស់ បានល្អ និងជាអនុស្សាវរីយ៍ អ្នកចូលរួមដាំ ត្រូវចំណាយ១៥ដុល្លារក្នុងដើមឈើមួយដើម ដល់អ្នកដែលផ្ដល់សេវាថែទាំ ទន្ទឹមនោះ ម្ចាស់អ្នកដាំអាចទៅមើលកូនឈើអនុស្សាវរីយ៍របស់ខ្លួនបានគ្រប់ពេលវេលា ៕
អត្ថបទ និង រូបភាព ៖ លោក ងិន គឹមឡេង លោក យូ វង្ស និងលោក ខេង ឧត្តម
កែសម្រួលអត្ថបទ៖ លោក សេង ផល្លី
