នៅព្រឹកថ្ងៃទី១៧ ខែកញ្ញា ឆ្នាំ២០១៩នេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា អញ្ជើញជាអធិបតីដ៏ខ្ពង់ខ្ពស់ ក្នុងពិធីបើកសន្និសីទថ្នាក់រដ្ឋមន្ត្រីការងារលើកទី៣ នៅខេត្តសៀមរាប ដែលមាន៥ប្រទេស រួមមាន៖ កម្ពុជា ឡាវ មីយ៉ាន់ម៉ា ថៃ និងវៀតណាម ក្នុងនោះកម្ពុជាធ្វើជាម្ចាស់ផ្ទះ ក្រោមប្រធានបទ «ការឆ្ពោះទៅកាន់កិច្ចគាំពារពលករទេសន្តរប្រវេសន៍នៅក្នុងប្រទេស CLMTV៖ កិច្ចសហប្រតិបត្តិការវិស័យសន្តិសុខសង្គម»។
តាមរយៈ សន្និសីទថ្នាក់រដ្ឋមន្ត្រីការងារ ក្នុងក្របខណ្ឌប្រទេសទាំង៥ ហៅកាត់ថា CLMTV នេះ រៀបចំឡើងរៀងរាល់ ២ឆ្នាំម្ដង លើកដំបូងនៅឆ្នាំ២០១៥ នៅប្រទេសថៃ និងលើកទី២ ឆ្នាំ២០១៧ រៀបចំនៅប្រទេសវៀតណាម។
កិច្ចប្រជុំបន្តបន្ទាប់ នៃសន្និសីទថ្នាក់រដ្ឋមន្ត្រីការងារ ក្នុងក្របខណ្ឌនៃកិច្ចសហប្រតិបត្តិការ របស់ក្រុមប្រទេស CLMTVពីរលើកនាពេលកន្លងមក បានផ្តោតសំខាន់លើគោលនយោបាយ ច្បាប់ និងបទដ្ឋាននានា នីតិវិធី និងយន្តការសម្រាប់ផ្តល់ការគាំពារ ការពារសិទ្ធិ និងអត្ថប្រយោជន៍របស់ពលករទេសន្តប្រវេសន៍ ដែលរាជរដ្ឋាភិបាលកម្ពុជា បាននឹងកំពុងអនុវត្តន៍ ធានាការពារដល់សិទ្ធពលករ ដែលចេញទៅធ្វើការនៅក្រៅប្រទេសស្របច្បាប់ នៅតាមបណ្ដាប្រទេសជាសមាជិក ដែលបានបង្កើតឱ្យមានកិច្ចសហប្រតិបត្តិការទ្វេភាគី និងពហុភាគីជាច្រើន។ ក្នុងនោះ ការជ្រើសរើសពលករប្រកបដោយប្រសិទ្ធភាព កម្មវិធីតម្រង់ទិសមុនការចេញដំណើរ និងក្រោយការត្រឡប់មកវិញ កិច្ចសហប្រតិបត្តិការក្នុងការអភិវឌ្ឍជំនាញ និងបញ្ហាវិស័យការងារផ្សេងៗទៀត រួមមានការងារបន្ត និងកិច្ចសហប្រតិបត្តិការនាពេលអនាគត។
ដោយឡែក ផ្អែកតាមសេចក្តីថ្លែងការណ៍ នៃសន្និសីទថ្នាក់រដ្ឋមន្ត្រីការងារលើកទី២ កាលពីឆ្នាំ២០១៧ និងលទ្ធផលនៃកិច្ចប្រជុំថ្នាក់មន្ត្រីជាន់ខ្ពស់ការងារលើកទី៤ កាលពីឆ្នាំ២០១៨ នៅប្រទេសវៀតណាម CLMTV បានឯកភាពគ្នាជំរុញឱ្យមានយន្តការ ក្នុងការផ្ទេរអត្ថប្រយោជន៍នៃរបបសន្តិសុខសង្គម ពីប្រទេសទទួលមកប្រទេសបញ្ជូនពលករ ដោយបានផ្ដួចផ្ដើមគំនិត ចំនួន៧ចំណុចរួមមាន៖
– ទី១ សិក្សារៀបចំច្បាប់ និងគោលនយោបាយជាតិមានសង្គតិភាពគ្នាជាមួយនឹងបទដ្ឋាន ឬលិខិតតូបករណ៍គតិយុត្តអន្តរជាតិ ពាក់ព័ន្ធនឹងចល័តភាពនៃរបបសន្តិសុខសង្គម សម្រាប់ពលករទេសន្តរប្រវេសន៍
– ទី២ ផ្តល់ និងផ្លាស់ប្តូរទិន្នន័យជាក់លាក់អំពីពលករទេសន្តរប្រវេសន៍ ដែលគ្របដណ្តប់ដោយរបបសន្តិសុខសង្គមនៅក្នុងប្រទេស CLMTV
– ទី៣ បង្កើនការចូលរួមរបស់កម្មករនិយោជិត និយោជក និងរដ្ឋាភិបាលនៅកម្រិតជាតិ ដើម្បីអភិវឌ្ឍ និងអនុវត្តគំនិតផ្តួចផ្តើមអំពីចល័តភាពនៃរបបសន្តិសុខសង្គម សម្រាប់ពលករទេសន្តរប្រវេសន៍នៃប្រទេស CLMTV
– ទី៤ ធ្វើការងារឆ្ពោះទៅកាន់ការរៀបចំក្របខណ្ឌរួមសម្រាប់ប្រទេស CLMTV ស្តីពីចល័តភាពនៃរបបសន្តិសុខសង្គមសម្រាប់ពលករទេសន្តរប្រវេសន៍
– ទី៥ ជំរុញការចុះកិច្ចព្រមព្រៀងទ្វេភាគីស្តីពី ចល័តភាពនៃរបបសន្តិសុខសង្គម សម្រាប់ពលករទេសន្តរប្រវេសន៍នៃប្រទេស CLMTV ចំពោះផ្នែកសេដ្ឋកិច្ចដែលពាក់ព័ន្ធ
– ទី៦ ពង្រឹងយន្តការនៅក្នុងប្រទេស CLMTV អំពីរបៀបទទួលបាននូវអត្ថប្រយោជន៍ពីរបបសន្តិសុខសង្គម
– ទី៧៖ លើកកម្ពស់ការសម្របសម្រួលរវាងស្ថាប័នទទួលបន្ទុករបបសន្តិសុខសង្គម នៅក្នុងប្រទេស CLMTV។
អត្ថបទ ៖ លោក សេង ផល្លី
រូបភាព ៖
